BSNLକୁ ନେଇ ସରକାରଙ୍କ ବଡ଼ ଘୋଷଣା: କେନ୍ଦ୍ର କ୍ୟାବିନେଟରେ ୧.୬୪ ଲକ୍ଷ କୋଟି ଟଙ୍କା ମଞ୍ଜୁର

ନୂଆଦିଲ୍ଲୀ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟ ବୈଠକରେ ଗୁରୁତ୍ୱପୂର୍ଣ୍ଣ ନିଷ୍ପତି ନିଆଯାଇଛି । ଧାରାବାହିକ ଭାବେ କ୍ଷତିରେ ଚାଲିଥିବା ଟେଲିକମ ରାଷ୍ଟ୍ରୟତ କମ୍ପାନୀ ବିଏସଏନଏଲକୁ ସଂଜିବନୀ ମିଳିଛି । ଏଥିସହିତ ଦେଶର ଅପହଞ୍ଚ ଗାଁମାନରେ ଟେଲି ଯୋଗାଯୋଗ ସେବା ପହଞ୍ଚାଇବା ପାଇଁ ସରକାର ଉଦ୍ୟମ କରିଛନ୍ତି । ଟେଲିକମ୍ ହେଉଛି ଏକ ରଣନୀତିକ କ୍ଷେତ୍ର ।

ଟେଲିକମ୍ ବଜାରରେ ବିଏସଏନଏଲର ଉପସ୍ଥିତି ଏକ ମାର୍କେଟ ବାଲାନ୍ସର୍ ଭାବରେ କାର୍ଯ୍ୟ କରେ । ଗ୍ରାମାଞ୍ଚଳରେ ଟେଲିକମ୍ ସେବା ବିସ୍ତାର, ସ୍ୱଦେଶୀ ପ୍ରଯୁକ୍ତିର ବିକାଶ ଏବଂ ବିପର୍ଯ୍ୟୟ ପ୍ରଶମନ କ୍ଷେତ୍ରରେ ବିଏସଏନଏଲ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ । ବିଏସଏନଏଲକୁ ଆର୍ଥିକ ଦୃଷ୍ଟିରୁ ସକ୍ଷମ କରିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟ ବିଏସଏନଏଲର ୧.୬୪ ଲକ୍ଷ ଟଙ୍କା ମୂଲ୍ୟର ପୁନ ଉଦ୍ଧାର ପ୍ୟାକେଜକୁ ଅନୁମୋଦନ କରିଛି ।

କ୍ୟାବିନେଟ୍ ଦ୍ୱାରା ଅନୁମୋଦିତ ପୁନର୍ଜୀବନ ପଦକ୍ଷେପଗୁଡିକ ବିଏଏସଏନଏଲ ସେବାଗୁଡିକର ନବୀକରଣ, ସ୍ପେକ୍ଟ୍ରମ୍ ଆବଣ୍ଟନ, ଏହାର ବାଲାନ୍ସ ସିଟ୍ ଉପରେ ଚାପ ପକାଇବା ଏବଂ ଭାରତ ବ୍ରଡବ୍ୟାଣ୍ଡ ନିଗମ ଲିମିଟେଡକୁ ବିଏସଏନଏଲ ସହିତ ମିଶ୍ରଣ କରି ଏହାର ଫାଇବର ନେଟୱାର୍କକୁ ବୃଦ୍ଧି କରିବା ଉପରେ ଧ୍ୟାନ ଦେଇଥାଏ । ସମସ୍ତଙ୍କ ପାଇଁ ଡିଜିଟାଲ୍ ଅନ୍ତର୍ଭୁକ୍ତ ଏବଂ ସଂଯୋଗୀକରଣ ହେଉଛି ସରକାରଙ୍କ ବିକାଶ ଏଜେଣ୍ଡାର ଏକ ଅବିଚ୍ଛେଦ୍ୟ ଅଙ୍ଗ ।

ଗତବର୍ଷ ସରକାର ୫ ଟି ରାଜ୍ୟର ୪୪ ଟି ଜିଲ୍ଲାର ୨୯ହଜାର ୬୧୬ଟି ଅପହଞ୍ଚ ଗ୍ରାମରେ ୪ଜି ମୋବାଇଲ୍ ସେବା ଯୋଗାଇବା ପାଇଁ ଏକ ପ୍ରକଳ୍ପ ଅନୁମୋଦନ କରିଛନ୍ତି । ଏଥିରେ ୧୯ହଜାର ୭୨୨ଟି ମୋବାଇଲ ଟାୱାର ସ୍ଥପନ କରାଯିବ । ୨୦୨୧ ମସିହାରେ ସ୍ୱାଧୀନତା ଦିବସ ଅଭିଭାଷଣରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସରକାରୀ ଯୋଜନାରେ ପରିପୂର୍ଣ୍ଣ ହେବାକୁ ଆହ୍ୱାନ ଦେଇଥିଲେ । କେନ୍ଦ୍ର କ୍ୟାବିନେଟ୍ ଆଜି ୨୬ହଜାର ୩୧୬ କୋଟି ଟଙ୍କା ବ୍ୟୟରେ ଦେଶର ଅପହଁଚ ଗ୍ରାମଗୁଡିକରେ ୪ଜି ମୋବାଇଲ୍ ସେବା ଯୋଗାଇଦେବାକୁ ଅନୁମୋଦନ କରିଛି ।

ଏହି ପ୍ରକଳ୍ପ ଦୁର୍ଗମ ତଥା କଷ୍ଟସାଧ୍ୟ ଅଞ୍ଚଳରେ ୨୯ହଜାର ୬୧୬ଟି ଅପହଞ୍ଚ ଗ୍ରାମରେ ୪ଜି ମୋବାଇଲ୍ ସେବା ଯୋଗାଇବ । ପୁନଃ ଥଇଥାନ, ନୂତନ ବସତି, ବିଦ୍ୟମାନ ଅପରେଟରଙ୍କ ଦ୍ୱାରା ସେବା ପ୍ରତ୍ୟାହାର ଇତ୍ୟାଦି ହିସାବରେ ୨୦ ପ୍ରତିଶତ ଅତିରିକ୍ତ ଗ୍ରାମ ଅନ୍ତର୍ଭୂକ୍ତ କରିବାକୁ ଏହି ପ୍ରକଳ୍ପର ବ୍ୟବସ୍ଥା ରହିଛି । ଏଥିସହ କେବଳ ୨ଜି /୩ ଜି ସଂଯୋଗ ଥିବା ୬,୨୭୯ ଗାଁକୁ ୪ଜିକୁ ଉନ୍ନିତ କରାଯିବ ।

ଏହି ପ୍ରକଳ୍ପ ୪ଜି ଟେକ୍ନୋଲୋଜି ବ୍ୟବହାର କରି ବିଏସଏନଏଲ ଦ୍ୱାରା କାର୍ଯ୍ୟକାରୀ ହେବ ଏବଂ ୟୁନିଭର୍ସାଲ ସର୍ଭିସ ବାଧ୍ୟତାମୂଳକ ପାଣ୍ଠି ମାଧ୍ୟମରେ ଅର୍ଥ ପ୍ରଦାନ କରାଯିବ । ଏହି ପ୍ରକଳ୍ପର ମୂଲ୍ୟ ୨୬,୩୧୬ କୋଟି ଟଙ୍କା ଧାର୍ଯ୍ୟ କରାଯାଇଛି ଓ ଏହି ପ୍ରକଳ୍ପ ଆଗାମୀ ୫ ବର୍ଷରେ ଶେଷ ହେବବୋଲି କୁହାଯାଇଛି । କେନ୍ଦ୍ର ଆଇଟି ମନ୍ତ୍ରୀ ଅଶ୍ୱନୀ ବୈଷ୍ଣବ ଗଣମାଧ୍ୟମକୁ ଏ ସମ୍ପର୍କରେ ସୂଚନା ଦେଇଛନ୍ତି ।

ସେହିପରି ଗ୍ରାମାଞ୍ଚଳରେ ମୋବାଇଲ୍ ସଂଯୋଗ ଯୋଗାଇବା ପାଇଁ ସରକାରଙ୍କ ଦୂରଦୃଷ୍ଟି ଦିଗରେ ଏହି ପ୍ରକଳ୍ପ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ । ଏହି ପ୍ରକଳ୍ପ ମୋବାଇଲ୍ ବ୍ରଡବ୍ୟାଣ୍ଡ ମାଧ୍ୟମରେ ବିଭିନ୍ନ ଇ-ଶାସନ ସେବା, ବ୍ୟାଙ୍କିଙ୍ଗ୍ ସେବା, ଟେଲି ମେଡିସିନ୍, ଟେଲି-ଶିକ୍ଷା ଇତ୍ୟାଦି ବିତରଣକୁ ପ୍ରୋତ୍ସାହିତ କରିବ ଏବଂ ଗ୍ରାମାଞ୍ଚଳରେ ନିଯୁକ୍ତି ସୃଷ୍ଟି କରିବ ।