ଶାହାରୁଖ ଖାନ, ଅକ୍ଷୟ କୁମାର ଏବଂ ଅଜୟ ଦେବଗନଙ୍କୁ ସରକାରୀ ନୋଟିସ୍: ପାନ ମସଲା ଆଡ୍ କରିବା ପଡିଲା ମହଙ୍ଗା
ନୂଆଦିଲ୍ଲୀ: ବଲିଉଡ ଅଭିନେତା ଶାହାରୁଖ ଖାନ, ଅକ୍ଷୟ କୁମାର ଏବଂ ଅଜୟ ଦେବଗନଙ୍କର ପାନ ମସଲାକୁ ପ୍ରସାର କରିବା ମାମଲା ପୁଣି ଥରେ ଚର୍ଚ୍ଚାକୁ ଆସିଛି । ତେବେ ଆହ୍ଲାବାଦ ହାଇକୋର୍ଟର ଲଖନଉ ବେଞ୍ଚର ଅବମାନନା ଆବେଦନ ଉପରେ କେନ୍ଦ୍ର ସରକାର ବର୍ତ୍ତମାନ ଏହାର ଉତ୍ତର ଦେଇଛନ୍ତି । ପାନ ମସଲା ବିଜ୍ଞାପନ ମାମଲାରେ ଶାହାରୁଖ, ଅଜୟ ଏବଂ ଅକ୍ଷୟ କୁମାରଙ୍କୁ ନୋଟିସ ଜାରି କରାଯାଇଥିବା ନେଇ ଆହ୍ଲାବାଦ ହାଇକୋର୍ଟର ଲଖନଉ ବେଞ୍ଚକୁ କେନ୍ଦ୍ର ସରକାର ସୂଚନା ଦେଇଛନ୍ତି ।
ଏହି ମାମଲାରେ କେନ୍ଦ୍ର ସରକାରଙ୍କ ଓକିଲ କହିଛନ୍ତି ଯେ, ସୁପ୍ରିମକୋର୍ଟ ମଧ୍ୟ ଏହି ମାମଲାର ଶୁଣାଣି କରୁଛନ୍ତି, ତେଣୁ ଏହି ଆବେଦନକୁ ଖାରଜ କରାଯିବା ଉଚିତ୍ । ଏହି ମାମଲାର ପରବର୍ତ୍ତୀ ଶୁଣାଣି ତାରିଖ ୯ ମେ ୨୦୨୪ ପାଇଁ ସ୍ଥିର କରାଯାଇଛି । ଜଷ୍ଟିସ ରାଜେଶ ସିଂ ଚୌହାନଙ୍କ ଏକକ ବେଞ୍ଚ ଏହି ଅବମାନନା ଆବେଦନ ଉପରେ ଏହି ଆଦେଶ ଦେଇଛନ୍ତି । ଜଷ୍ଟିସ ରାଜେଶ ସିଂ ଚୌହାନଙ୍କ ବେଞ୍ଚ ଆବେଦନକାରୀଙ୍କ ପ୍ରତିନିଧିତ୍ୱ ଉପରେ ନିଷ୍ପତ୍ତି ନେବାକୁ କେନ୍ଦ୍ର ସରକାରଙ୍କୁ ନିର୍ଦ୍ଦେଶ ଦେଇଛି ।
ତେବେ ପାନ୍ ମସଲାର ପ୍ରଚାର କରୁଥିବା ଶାହାରୁଖ, ଅକ୍ଷୟ ଏବଂ ଅଜୟ ଦେବଗନଙ୍କୁ ପଦ୍ମ ପୁରସ୍କାରରେ ସମ୍ମାନିତ କରାଯାଇଛି । ଏଭଳି ପରିସ୍ଥିତିରେ ପିଟିସନ ଦାଖଲ କରିଥିବା ଓକିଲ ମୋତିଲାଲ ଯାଦବଙ୍କ ମତରେ, ଯୁବକମାନଙ୍କ ପାଇଁ ତାଙ୍କର ପଦକ୍ଷେପ ଠିକ ନୁହେଁ । ମୋତିଲାଲ ଯାଦବ ଏହା ମଧ୍ୟ କହିଛନ୍ତି ଯେ, ଷ୍ଟାରମାନେ ଏହା କରି ଦ୍ୱନ୍ଦ୍ୱରେ ପଡୁଛନ୍ତି । ଗତ ଅଗଷ୍ଟ ୨୦୨୩ ରେ ହାଇକୋର୍ଟ ଏହି ଆବେଦନ ଉପରେ କୌଣସି ପ୍ରତିକ୍ରିୟା ନ ଦେଇ କ୍ୟାବିନେଟ ସଚିବ, ମୁଖ୍ୟ କମିଶନର ଏବଂ ଉପଭୋକ୍ତା ସୁରକ୍ଷା ପ୍ରାଧିକରଣକୁ ଅବମାନନା ନୋଟିସ ଜାରି କରିଥିଲେ ।
