ଦିନେ ମୋତେ ଦେଶରୁ ବହିଷ୍କାର କରାଯାଇଥିଲା…ଆଜି ସେ ନିଜେ ଏହାର ଶିକାର ହେଲେ, ଶେଖ୍ ହସିନାଙ୍କ ନୀତିକୁ ନେଇ ସମାଲୋଚନା କରିଛନ୍ତି ତସଲିମା ନାସରିନ୍
ନୂଆଦିଲ୍ଲୀ: ବାଂଲାଦେଶରେ ସଂରକ୍ଷଣ ପ୍ରସଙ୍ଗକୁ ଜାରି ରହିଥିବା ବିରୋଧ ପ୍ରର୍ଦଶନ ବର୍ତ୍ତମାନ ଚିନ୍ତାର ବିଷୟ ପାଲଟିଛି । ଦେଶରେ ସ୍ଥିତି ଅଣାୟତ ହୋଇଯାଇଛି । ଏଥିମଧ୍ୟରେ ପ୍ରଧାନମନ୍ତ୍ରୀ ଶେଖ୍ ହସିନା ନିଜ ପଦରୁ ଇସ୍ତଫା ଦେଇ ଦେଶ ଛାଡ଼ି ପଳାଇଛନ୍ତି । ଏଭଳି ସ୍ଥିତିରେ ବାଂଲାଦେଶରେ ଅନ୍ତରୀଣ ସରକାର ଗଠନ କରିବା ନେଇ ସେନା ମୁଖ୍ୟ ଜେନେରାଲ ୱକାର-ଉଜ୍-ଜମାନ୍ କହିଛନ୍ତି ।
ବାଂଲାଦେଶରେ ଚାରିଆଡ଼େ ହିଂସାର ମାହୋଲ । ଶେଖ୍ ହସିନାଙ୍କ ଇସ୍ତଫା ପରେ ବିକ୍ଷୋଭକାରୀ ତାଙ୍କ ଆବାସରେ ପ୍ରବେଶ କରି ଭଙ୍ଗାରୁଜା କରିବା ସହ ଚୋରି ମଧ୍ୟ କରିଥିଲେ । ବାଂଲାଦେଶରେ ମୌଳିକବାଦୀ(Fundamentalist)ଙ୍କ ଏଭଳି କାର୍ଯ୍ୟକୁ ଚାରିଅଡ଼େ ନିନ୍ଦା କରାଯାଉଛି । ଅପରପକ୍ଷରେ ବାଂଲାଦେଶର ବିଶିଷ୍ଟ ଲେଖିକା ତସଲିମା ନାସରିନ୍ ଦେଶର ଏଭଳି ଅବସ୍ଥାକୁ ନେଇ ଚିନ୍ତା ପ୍ରକାଶ କରିଛନ୍ତି । ଏହି ପରିସ୍ଥିତି ପାଇଁ ସେ ଶେଖ୍ ହସିନାଙ୍କୁ ଦାୟୀ କରିଛନ୍ତି । ବାଂଲାଦେଶରୁ ନିର୍ବାସିତ ହେବା ପରେ ଭାରତରେ ରହୁଥିବା ତସଲିମା ନାସରିନ୍ ‘ଏକ୍ସ’ରେ ଏକ ପୋଷ୍ଟ ଶେୟାର କରି ଲେଖିଛନ୍ତି, ‘୧୯୯୯ରେ ତାଙ୍କ ମାଆଙ୍କୁ ଶେଷ ସମୟରେ ଦେଖିବା ପାଇଁ ମଧ୍ୟ ବାଂଲାଦେଶରେ ପ୍ରବେଶ ଅନୁମତି ନଥିଲା । କିଛି ମୌଳିକବାଦୀଙ୍କୁ ଖୁସି କରିବା ପାଇଁ ଶେଖ୍ ହସିନା ଏପରି କରିଥିଲେ । ଆଜି ଛାତ୍ର ଆନ୍ଦୋଳନରେ ସେହିମାନେ ସାମିଲ ଅଛନ୍ତି ଯେଉଁମାନେ ଶେଖ୍ ହସିନାଙ୍କୁ ଦେଶ ଛାଡ଼ିବା ପାଇଁ ବାଧ୍ୟ କରିଛନ୍ତି ।’
Hasina in order to please Islamists threw me out of my country in 1999 after I entered Bangladesh to see my mother in her deathbed and never allowed me to enter the country again. The same Islamists have been in the student movement who forced Hasina to leave the country today.
— taslima nasreen (@taslimanasreen) August 5, 2024
ସେ ଆହୁରି ମଧ୍ୟ ଲେଖିଛନ୍ତି, ‘ଶେଖ୍ ହସିନା ଇସ୍ତଫା ଦେଇ ଦେଶ ଛାଡ଼ିଛନ୍ତି । ଏଥିପାଇଁ ସେ ନିଜେ ଦାୟୀ । ସେ ମୌଳିକବାଦୀଙ୍କୁ ପ୍ରୋତ୍ସାହିତ କରୁଥିଲେ । ତାଙ୍କ ଲୋକଙ୍କୁ ଦୁର୍ନୀତି ସହ ଜଡ଼ିତ ହେବାକୁ ଅନୁମତି ଦେଇଛନ୍ତି । ବର୍ତ୍ତମାନ ବାଂଲାଦେଶ ପାକିସ୍ତାନ ଭଳି ହେବା ଉଚିତ ନୁହେଁ । ସେନା ଶାସନ କରିବା ଉଚିତ ନୁହେଁ । ରାଜନୌତିକ ଦଳଗୁଡ଼ିକୁ ଗଣତନ୍ତ୍ର ଏବଂ ଧର୍ମନିରପେକ୍ଷତା ଆଣିବା ଉଚିତ ।’
Hasina had to resign and leave the country. She was responsible for her situation. She made Islamists to grow. She allowed her people to involve in corruption. Now Bangladesh must not become like Pakistan. Army must not rule.Political parties should bring democracy & secularism.
— taslima nasreen (@taslimanasreen) August 5, 2024