ପୁରୀରେ ବାଣ ତିଆରି ସମୟରେ ବିସ୍ପୋରଣ, ୩ ଗୁରୁତର ଥିବା ସୂଚନା

ପୁରୀ: ପୁରୀ ସଦର ଥାନା ଅଧୀନ ବାଟଗାଁ ରାଉତ ସାହିରେ ଗୁରୁବାର ବାଣ ବିସ୍ଫୋରଣ ହୋଇ ୩ଜଣ ଗୁରୁତର ହୋଇଛନ୍ତି। ଗୁରୁତର ମଧ୍ୟରେ ଜଣେ ମହିଳା ଥିବା ବେଳେ ୨ଜଣ ନାବାଳକ ବୋଲି ଜଣାପଡିଛି।

ଗୁରୁତରମାନେ ହେଲେ ଗୁଲା ରାଉତ, ଲିପା ରାଉତ ଓ ସଞ୍ଜୟ ଜେନା l ସେମାନଙ୍କ ଅବସ୍ଥା ଗୁରୁତର ହେବାରୁ ପ୍ରାଥମିକ ଚିକିତ୍ସା ପରେ କଟକ ସ୍ଥାନାନ୍ତର କରାଯାଇଛି।

ପୁରୀ ସଦର ମୁଖ୍ୟ ଚକିତ୍ସାଳୟରେ ବର୍ଣ୍ଣ ୟୁନିଟ ନ ଥିବାରୁ ୩ଜଣଙ୍କୁ ସ୍ଥାନାନ୍ତର କରାଯାଇଥିବା ସୂଚନା ମିଳିଛି। ସଞ୍ଜୟ ଜେନା, ଗୁଲା ରାଉତଙ୍କ ୮୦ ପ୍ରତିଶତ ପୋଡି ଯାଇଥିବା ବେଳେ ଲିପା ରାଉତଙ୍କ ୫୦ ପ୍ରତିଶତ ପୋଡି ଯାଇଥିବା ଜଣାପଡିଛି l

ମିଳିଥିବା ସୂଚନା ମୁତାବକ, ସା ସମୟରେ ଲିପା ରାଉତଙ୍କ ଘରେ ତିଆରି ବାଣ ବିକ୍ରି ହେଉଥିବା ସଞ୍ଜୟ ଜେନା ଖବର ପାଇ ବାଣ କିଣିବା ପାଇଁ ଯାଇଥିଲେ। ସେଠାରେ ଲିପା ରାଉତ ଓ ଗୁଲା ରାଉତ ସଞ୍ଜୟଙ୍କ ପାଇଁ ବାଣ ତିଆରି କରିବା ସମୟରେ ଏହି ବିସ୍ପୋରଣ ଘଟିଥିଲା। ଫଳରେ ୩ଜଣ ଗୁରୁତର ଆହତ ହୋଇଛନ୍ତି।