କାଲିଠୁ ଆରମ୍ଭ ହେବ ଜେଇଇ ମେନ୍ ସେସନ୍ ୨ ପରୀକ୍ଷା, ଜାଣନ୍ତୁ ଡ୍ରେସ୍ କୋଡ୍ ଓ ଗାଇଡଲାଇନ୍

ନୂଆଦିଲ୍ଲୀ: ଜେଇଇ ମେନ୍ ୨୦୨୫ ସେସନ୍ ୨ ପରୀକ୍ଷା ଆସନ୍ତାକାଲି ଅର୍ଥାତ୍ ଏପ୍ରିଲ ୨ ରୁ ଆରମ୍ଭ ହେବ । ଏହି ପରୀକ୍ଷା ୯ ଏପ୍ରିଲ ପର୍ଯ୍ୟନ୍ତ ଚାଲିବ । ପେପର ୧ ବିଇ/ବିଟେକ୍ ଦୁଇଟି ସିଫ୍ଟରେ ଏବଂ ପେପର ୨ ବି.ଆର୍କ ଏବଂ ବି.ପ୍ଲାନିଂ ଗୋଟିଏ ସିଫ୍ଟରେ ହେବ । ପରୀକ୍ଷା ପ୍ରଥମ ସିଫ୍ଟରେ ସକାଳ ୯ଟାରୁ ମଧ୍ୟାହ୍ନ ୧୨ଟା ଏବଂ ଦ୍ୱିତୀୟ ସିଫ୍ଟରେ ଅପରାହ୍ନ ୩ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଅନୁଷ୍ଠିତ ହେବ । ପରୀକ୍ଷା କେନ୍ଦ୍ରରେ ପରୀକ୍ଷା ଦେଉଥିବା ଛାତ୍ରଛାତ୍ରୀମାନଙ୍କୁ କେଉଁ ଡ୍ରେସ୍ କୋଡ୍ ଏବଂ ଗାଇଡଲାଇନ୍ ପାଳନ କରିବାକୁ ପଡିବ, ଆସନ୍ତୁ ଜାଣିବା…

ଏହି ପରୀକ୍ଷା ଦେଶବ୍ୟାପୀ ବିଭିନ୍ନ କେନ୍ଦ୍ରରେ ସିବିଟି ମୋଡରେ ନ୍ୟାସନାଲ୍ ଟେଷ୍ଟିଂ ଏଜେନ୍ସି ଦ୍ୱାରା ପରିଚାଳିତ ହେବ । ୨ ଏପ୍ରିଲରେ ପରୀକ୍ଷା ପାଇଁ ଆଡମିଟ୍ କାର୍ଡ ଜାରି କରାଯାଇଛି । ଯେଉଁ ଛାତ୍ରଛାତ୍ରୀମାନେ ଏପର୍ଯ୍ୟନ୍ତ ସେମାନଙ୍କର ହଲ୍ ଟିକେଟ୍ ଡାଉନଲୋଡ୍ କରିନାହାଁନ୍ତି । ସେମାନେ ଏନଟିଏର ଅଫିସିଆଲ୍ ୱେବସାଇଟ୍ ଯାଇ ପଞ୍ଜିକରଣ ନମ୍ବର ଏବଂ ଜନ୍ମ ତାରିଖ ଦେଇ ଏହାକୁ ଡାଉନଲୋଡ୍ କରିପାରିବେ । ପ୍ରବେଶ ପତ୍ର ବିନା କୌଣସି ଛାତ୍ରଙ୍କୁ ପରୀକ୍ଷା କେନ୍ଦ୍ରରେ ପ୍ରବେଶ କରିବାକୁ ଅନୁମତି ଦିଆଯିବ ନାହିଁ ।

ଡ୍ରେସ୍ କୋଡ୍ କ’ଣ?
ପରୀକ୍ଷା ଦେବାକୁ ଯାଉଥିବା ଛାତ୍ରଛାତ୍ରୀମାନେ କେବଳ ହାଲୁକା ଏବଂ ଆରାମଦାୟକ ପୋଷାକ ପିନ୍ଧିବା ଉଚିତ । ଛାତ୍ରଛାତ୍ରୀମାନେ ସ୍କୁଲ ପୋଷାକ ପିନ୍ଧି ମଧ୍ୟ ଯାଇପାରିବେ । ଛୋଟ ସର୍ଟସ୍ କିମ୍ବା ମିନି ସ୍କର୍ଟ ଇତ୍ୟାଦି ପିନ୍ଧିବା ଉପରେ ନିଷେଧ ଅଛି । ଆପଣ ଘଣ୍ଟା କିମ୍ବା ଅନ୍ୟ କୌଣସି ଇଲେକ୍ଟ୍ରୋନିକ୍ ଉପକରଣ ଧରି ପରୀକ୍ଷା ହଲ୍ ଭିତରକୁ ପ୍ରବେଶ କରିପାରିବେ ନାହିଁ । ଏହା ସହ ଅଳଙ୍କାର କିମ୍ବା ଅନ୍ୟ କୌଣସି ଧାତୁ ସାମଗ୍ରୀ ଉପରେ ମଧ୍ୟ ନିଷେଧ କରାଯାଇଛି । ଛାତ୍ରମାନେ ଜୋତା ପିନ୍ଧି ଯାଇପାରିବେ ।

ଗାଇଡଲାଇନ୍:
ଛାତ୍ରଛାତ୍ରୀମାନେ ଆଡମିଟ୍ କାର୍ଡ ସହିତ ଆଧାର କାର୍ଡ, ପାନ୍ କାର୍ଡ କିମ୍ବା ଭୋଟର ପରିଚୟ ପତ୍ର ଭଳି ଏକ ଫଟୋ ଥିବା ସରକାରୀ ପରିଚୟ ପତ୍ର ନେବାକୁ ପଡିବ । ଏହା ସହିତ ଦୁଇଟି ରଙ୍ଗୀନ ପାସପୋର୍ଟ ଆକାରର ଫଟୋ ମଧ୍ୟ ରଖନ୍ତୁ । ଆଡମିଟ୍ କାର୍ଡରେ ନିକଟରେ ଉଠାଇଥିବା କଲର୍ ଫଟୋ ଲଗାଯିବା ଆବଶ୍ୟକ । ଛାତ୍ରଛାତ୍ରୀମାନେ ସେମାନଙ୍କ ସହିତ ଏକ ବଲ୍ପଏଣ୍ଟ କଲମ ନେବାକୁ ପଡିବ ।