ଘର ଅଗଣାରେ ସ୍ୱାମୀର ଶବ ସତ୍କାର କଲେ ମହିଳା… କାରଣ ଅତ୍ୟନ୍ତ ଲଜ୍ଜାଜନକ

ନୂଆଦିଲ୍ଲୀ : ଜଣେ ମହିଳା ନିଜ ଘରେ ସ୍ୱାମୀଙ୍କ ମୃତଦେହକୁ ସତ୍କାର କରିଛନ୍ତି । ତେବେ ଏଭଳି ଘଟାଇବା ପଛରେ କ’ଣ ରହିଛି କାରଣ ତାହା ସମସ୍ତଙ୍କୁ ଚକିତ କରିଛି । ମିଳିଥିବା ସୂଚନା ଅନୁଯାୟୀ ମହିଳାଙ୍କ ଘରୁ ଧୂଆଁ ବାହାରିଥିଲା । ସ୍ଥାନୀୟ ଲୋକ ଦେଖିଲା ପରେ ତାଙ୍କ ଘରକୁ ଆସିଥିଲେ । ପରେ ଜାଣିବାକୁ ପାଇଥିଲେ ଯେ ମହିଳା ଜଣଙ୍କ ଘରେ ନିଜ ସ୍ୱାମୀଙ୍କ ଶବସତ୍କାର କରୁଛନ୍ତି । ଏନେଇ ପୋଲିସକୁ ସୂଚନା ଦିଆଯାଇଥିଲା, ପୋଲିସ ପହଞ୍ଚିଲା ପରେ ପ୍ରକୃତ ସତ ସାମ୍ନାକୁ ଆସିଥିଲା ।

ମହିଳା ଜଣଙ୍କ ଚାଞ୍ଚଲ୍ୟକର ବୟାନ ଦେଇଥିଲେ । ସେ କହିଥିଲେ ଯେ ତାଙ୍କର ଏଭଳି କରିବା ପଛର କାରଣ ହେଉଛି ଦୁଇ ପୁଅ । ମହିଳାଙ୍କ କହିବା ଅନୁଯାୟୀ ତାଙ୍କ ଦୁଇ ପୁଅ ବାପାଙ୍କ ମୃତ୍ୟୁ ଖବର ଜାଣିଲା ପରେ ବହୁତ ବଡ ସମସ୍ୟା ସୃଷ୍ଟି କରିବେ । ସମ୍ପତ୍ତି ଉପରେ ଅଧିକାର ସାବ୍ୟସ୍ତ କରିବା ସହ ପରସ୍ପର ମଧ୍ୟରେ ଲଢିବେ । ତେଣୁ ସେମାନଙ୍କୁ ଲୁଚାଇବାକୁ ଯାଇ ସ୍ୱାମୀର ଶବକୁ ଘରେ ଜାଳି ଦେଇଥିଲେ । ଆନ୍ଧ୍ର ପ୍ରଦେଶ କୁର୍ନୁଲରେ ଘଟିଛି ଏହି ଘଟଣା ।

ସୋମବାର ଏହି ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଲା ପରେ ମହିଳା ଜଣକ ପୋଲିସକୁ କହିଛନ୍ତି ଯେ ତାଙ୍କ ଦୁଇ ପୁଅ ସେମାନଙ୍କ କଥା ବୁଝାସୁଝା କରୁନାହଁନ୍ତି । ଗୋଟିଏ ପୁଅ ସହରରେ ମେଡିସିନ ଦୋକାନ କରିଥିବାବେଳେ ଅନ୍ୟ ଜଣେ କାନାଡାରେ ରହୁଛି । ବାପା ବଞ୍ଚିଥିବା ବେଳେ ସେମାନେ ବାପାଙ୍କୁ ପଚାରୁନଥିଲେ କେବଳ ସମ୍ପତ୍ତି ଲୋଭରେ ସେମାନେ ଘରକୁ ଆସୁଥିଲେ । ସେମାନେ ଯଦି ଜାଣିଥାନ୍ତେ ବାପାଙ୍କ ମୃତ୍ୟୁ ହୋଇଛି ତାହାଲେ ସମ୍ପତ୍ତି ପଇଁ ଲଢେଇ କରିଥାନ୍ତେ । ତେଣୁ ସମ୍ପର୍କୀୟମାନଙ୍କୁ ନ ଜଣାଇ ଘରେ ଶବଦାହ କରିବାର ନିଷ୍ପତ୍ତି ନେଇଥିଲି ବୋଲି ମହିଳା ଜଣଙ୍କ ପୋଲିସକୁ ବୟାନ ଦେଇଛନ୍ତି । ପୋଲିସ ମହିଳାଙ୍କୁ ପଚରାଉଚରା କରୁଛି। ସେ ସନ୍ଦେହ କରୁଛନ୍ତି ଯେ ତାଙ୍କ ମାନସିକ ସ୍ଥିତି ଠିକ୍ ନୁହେଁ। ପୋଲିସ ମାମଲା ରୁଜୁ କରି ଅଧିକ ତଦନ୍ତ ଆରମ୍ଭ କରିଛି।