TCSର ୱାର୍କ ଫ୍ରମ୍ ହୋମ୍ କର୍ମଚାରୀଙ୍କୁ ବଡ଼ ଝଟକା: ଅଫିସ୍ ନଗଲେ ମିଳିବନି ଏହି ବୋନସ୍

ନୂଆଦିଲ୍ଲୀ: ଦେଶର ଅଗ୍ରଣୀ ସଫ୍ଟୱେର୍ କମ୍ପାନୀ ଟିସିଏସ୍ ନିଜର ୱାର୍କ ଫ୍ରମ୍ ହୋମ କର୍ମଚାରୀଙ୍କୁ ବଡ଼ ଝଟକା ଦେଇଛି । କରୋନା ମହାମାରୀ ସମୟରେ ଟିସିଏସର ୱାର୍କ ଫ୍ରମ୍ ହୋମ୍ ନିଷ୍ପତ୍ତି ଏବେ ସେମାନଙ୍କ ପାଇଁ ଏକ ସମସ୍ୟା ପାଲଟିଛି ।

କମ୍ପାନୀ ଦ୍ୱାରା ଦିଆଯାଇଥିବା ଲଗାତାର ଅଲ୍ଟିମେଟମ୍ ସତ୍ତ୍ୱେ ଅନେକ କର୍ମଚାରୀ ଅଫିସକୁ ଆସି କାମ କରୁନାହାଁନ୍ତି । ଯେଉଁଥିପାଇଁ ବର୍ତ୍ତମାନ ଟିସିଏସ୍ ଏପରି କର୍ମଚାରୀଙ୍କୁ ଏକ ନୂଆ ଆଦେଶ ଦେଇଛି ଯେ ଯଦି ସେମାନେ ଅଫିସକୁ ଆସନ୍ତି ନାହିଁ ତେବେ ସେମାନେ ପରଫରମେନ୍ସ ବୋନସ୍ ପାଇବେ ନାହିଁ । ତେବେ କମ୍ପାନୀ ଚାହୁଁଛି ଯେ ସମସ୍ତ କର୍ମଚାରୀ ଅଫିସରେ କାମ କରନ୍ତୁ । ଏଥିପାଇଁ କମ୍ପାନୀ ୱାର୍କ ଫ୍ରମ୍ ହୋମ୍ ବଦଳରେ ହାଇବ୍ରିଡ ମଡେଲ ଲାଗୁ କରିଛି ।

କିନ୍ତୁ ବର୍ତ୍ତମାନ ଟିସିଏସ୍ ସେହି କର୍ମଚାରୀମାନଙ୍କୁ ପରଫରମେନ୍ସ ବୋନସ୍ ନ ଦେବାକୁ ନିଷ୍ପତ୍ତି ନେଇଛି ଯେଉଁମାନେ ଅଫିସକୁ ଆସୁନାହାଁନ୍ତି ଏବଂ ଘରୁ ଲଗାତାର ଭାବରେ କାର୍ଯ୍ୟ କରୁଛନ୍ତି । ଏପ୍ରିଲ ୧୮ ରେ ଜାରି କରାଯାଇଥିବା ଏକ ଇଣ୍ଟର୍ନଲ ମେମୋରେ କମ୍ପାନୀ କହିଛି ଯେ, ଯଦି ଜଣେ କର୍ମଚାରୀଙ୍କ ଉପସ୍ଥିତି ୬୦ ପ୍ରତିଶତରୁ କମ୍ ତେବେ ସେ ଭେରିଏବଲ୍ ପେ ଅର୍ଥାତ୍ ପରଫରମେନବୋନସ୍ ପାଇବେ ନାହିଁ । କର୍ମଚାରୀମାନଙ୍କୁ ସପ୍ତାହରେ ୩ ଦିନ ଅଫିସରୁ କାମ କରିବାକୁ ପଡ଼ିବ ।

ସପ୍ତାହରେ ୩ ଦିନ ଅଫିସରୁ କାମ କରିବା ଜରୁରୀ :-

ଲାଇଭ ମେଣ୍ଟ ରିପୋର୍ଟ ଅନୁଯାୟୀ, ୬୦ ପ୍ରତିଶତ ଉପସ୍ଥାନକୁ ନେଇ ଟାଟା କନ୍ସଲଟାନ୍ସ ସେବା କଠୋର ହୋଇଛି । କମ୍ପାନୀ ନିଶ୍ଚିତ କରିବାକୁ ଚେଷ୍ଟା କରୁଛି ଯେ, ଏହାର କର୍ମଚାରୀମାନେ ସପ୍ତାହରେ ଅତି କମରେ ତିନି ଦିନ ଅଫିସରୁ କାମ କରନ୍ତି । ଟିସିଏସ ସେହି କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଚାହୁଁଛି, ଯେଉଁମାନେ ଅଫିସରୁ କାର୍ଯ୍ୟକୁ ଗମ୍ଭୀରତାର ସହ ନେଉନାହାଁନ୍ତି । ତେଣୁ କମ୍ପାନୀ ଅଫିସରୁ କାର୍ଯ୍ୟକୁ ଭେରିଏବଲ୍ ପେ କିମ୍ବା ବାର୍ଷିକ ବୋନସ୍ ସହିତ ଯୋଡିଛି ।

ଅଫିସକୁ ନ ଆସିବା କାରଣ ଦିଅ ଏବଂ ଅନୁମୋଦନ ନିଅ :-

କମ୍ପାନୀର ଇଣ୍ଟର୍ନଲ ମେମୋରେ କୁହାଯାଇଛି ଯେ, ସେହି କର୍ମଚାରୀଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରିବ ଯେଉଁମାନେ ୮୫ ପ୍ରତିଶତ କିମ୍ବା ଅଧିକ ଉପସ୍ଥାନକୁ ଗୁରୁତର ସହ ନେଉନାହାଁନ୍ତି । କମ୍ପାନୀ କହିଛି ଯେ ଯଦି କୌଣସି କର୍ମଚାରୀ ଉପସ୍ଥାନ ନିୟମ ପାଳନ କରୁନାହାଁନ୍ତି ତେବେ ତାଙ୍କୁ କାରଣ ଦର୍ଶାଇବାକୁ ପଡିବ । ଏହା ବ୍ୟତୀତ ଏଥିପାଇଁ କାର୍ଯ୍ୟାଳୟରୁ ଅନୁମୋଦନ ମଧ୍ୟ ନେବାକୁ ପଡିବ । ବର୍ତ୍ତମାନ କମ୍ପାନୀ ଏହି କାର୍ଯ୍ୟ ଉପରେ ନୀରବତା ବଜାୟ ରଖିଛି ।