ପଞ୍ଜାବ ନିର୍ବାଚନ: ଦୁଇଟି ଆସନରୁ ନିର୍ବାଚନ ଲଢିବେ ମୁଖ୍ୟମନ୍ତ୍ରୀ ଚରଣଜିତ ସିଂହ ଚନ୍ନି, କେଜ୍ରିଓ୍ଵାଲଙ୍କ ଆକ୍ଷେପ

ଚଣ୍ଡିଗଡ: ପଞ୍ଜାବ କଂଗ୍ରେସ ପ୍ରାର୍ଥୀଙ୍କ ଆଉ ଏକ ତାଲିକା ଜାରି କରିଛି। ୮ ପ୍ରାର୍ଥୀଙ୍କୁ ନେଇ ଜାରି ଏହି ତାଲିକାରେ ସବୁଠୁ ପ୍ରମୁଖ ନାମ ମୁଖ୍ୟମନ୍ତ୍ରୀ ଚରଣଜିତ ସିଂହ ଚନ୍ନିଙ୍କ ରହିଛି। ଚନ୍ନିଙ୍କୁ ଭଦୋରା ସଂରକ୍ଷିତ ଆସନରୁ ଦଳ ପ୍ରାର୍ଥୀ କରିଛି। ଚନ୍ନି ନିଜର ପରମ୍ପରାଗତ ଆସନ ଚମକୌରରୁ ମଧ୍ୟ ନିର୍ବାଚନ ଲଢୁଛନ୍ତି। ଏହି ପରି ଚନ୍ନି ଚଳିତ ବିଧାନସଭା ନିର୍ବାଚନରେ ଦୁଇଟି ଆସନରୁ ପ୍ରାର୍ଥୀ ହୋଇଛନ୍ତି। ଚରଣଜିତ ସିଂହ ଚନ୍ନିଙ୍କ ବ୍ୟତୀତ ଏହି ତାଲିକାରେ ଅଟାରୀ ଆସନରୁ ତରସେମ ସିଂହ ସିୟାଲକା, ଖେମକରନରୁ ସୁଖପାଲ ସିଂହ ଭୁଲ୍ଲର, ନଓ୍ଵାଁ ସହରରୁ ସତବୀର ସିଂହ ସୈନୀ, ଲୁଧିଆନା ସାଉଥରୁ ଈଶ୍ଵରଜୋତ ସିଂହ ଚୀମା, ଜଲାଲବାଦରୁ ମୋହନ ସିଂହ, ବରନାଲାରୁ ମନୀଷ ବଂଶଲ ଏବଂ ପଟିଆଲାରୁ ବିଷ୍ଣୁ ଶର୍ମାଙ୍କୁ କଂଗ୍ରେସ ପ୍ରାର୍ଥୀ କରିଛି।

ଚନ୍ନି ଦୁଇଟି ଆସନରୁ ନିର୍ବାଚନ ଲଢିବା ଉପରେ ଆକ୍ଷେପ କରିଛି ଆମ୍ ଆଦମୀ ପାର୍ଟି। ଦଳର ସଂଯୋଜକ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ଵାଲ କହିଛନ୍ତି, ଚନ୍ନି ନିଜର ଚମକୌର ଆସନରୁ ପରାଜୟ ଭୟରେ ଅନ୍ୟ ଏକ ଆସନରୁ ନିର୍ବାଚନ ଲଢୁଛନ୍ତି। ସର୍ଭେରେ ମଧ୍ୟ ଚନ୍ନି ନିଜର ପରମ୍ପରାଗତ ଆସନରୁ ନିର୍ବାଚନ ହାରୁଛନ୍ତି। ଏଥିପାଇଁ କଂଗ୍ରେସ ତାଙ୍କୁ ଦୁଇଟି ସିଟ୍ରେ ଲଢାଇବାକୁ ନିଷ୍ପତ୍ତି ନେଇଛି।