ଦେଶର ୧୨ ଜଣ ବିଶିଷ୍ଟ ବୈଜ୍ଞାନିକଙ୍କୁ ୨୦୨୨ ଲାଗି ମିଳିବ ସମ୍ମାନଜନକ ଶାନ୍ତିସ୍ୱରୂପ ଭଟ୍ଟନାଗର ପୁରସ୍କାର
ନୂଆଦିଲ୍ଲୀ: ଦୁଇ ବର୍ଷର ବ୍ୟବଧାନ ପରେ ଆଜି ଦେଶର ସର୍ବୋଚ୍ଚ ବାର୍ଷିକ ବିଜ୍ଞାନ ପୁରସ୍କାର ଶାନ୍ତି ସ୍ୱରୂପ ଭଟ୍ଟନାଗର ପୁରସ୍କାର ଘୋଷଣା କରାଯାଇଛି । ଦେଶର ୧୨ ଜଣ ବିଶିଷ୍ଟ ବୈଜ୍ଞାନିକଙ୍କୁ ୨୦୨୨ ମସିହା ଲାଗି ସମ୍ମାନଜନକ ଶାନ୍ତିସ୍ୱରୂପ ଭଟ୍ଟନାଗର ପୁରସ୍କାର ପ୍ରଦାନ କରାଯିବ । ବୈଜ୍ଞାନିକ ଏବଂ ଔଦ୍ୟୋଗିକ ଅନୁସନ୍ଧାନ ପରିଷଦ – ସି.ଏସ୍.ଆଇ.ଆର୍.ର ମହାନିର୍ଦ୍ଦେଶକ ଡକ୍ଟର ଏନ୍. କଲୈସେଲ୍ଭି, କେନ୍ଦ୍ର ବିଜ୍ଞାନ ଏବଂ ବୈଷୟିକ ବିଭାଗ ମନ୍ତ୍ରୀ ଡକ୍ଟର ଜିତେନ୍ଦ୍ର ସିଂହଙ୍କ ଉପସ୍ଥିତିରେ ଏହି ଘୋଷଣା କରିଛନ୍ତି । ୭ଟି ବର୍ଗରେ ଏହି ପୁରସ୍କାର ଦିଆଯିବ, ଯଥା – ଭୌତିକ ବିଜ୍ଞାନ, ଜୀବ ବିଜ୍ଞାନ, ଇଞ୍ଜିନିୟରିଂ, ଗଣିତ, ଚିକିତ୍ସା, ରସାୟନ ବିଜ୍ଞାନ ଏବଂ ପୃଥିବୀ ବିଜ୍ଞାନ ।
ଏହି ଅବସରରେ କେନ୍ଦ୍ର ବିଜ୍ଞାନ ଏବଂ ପ୍ରଯୁକ୍ତିବିଦ୍ୟା ମନ୍ତ୍ରୀ ଡକ୍ଟର ଜିତେନ୍ଦ୍ର ସିଂ କହିଛନ୍ତି ଯେ, ଜି -୨୦ ଶିଖର ସମ୍ମିଳନୀ ଭାରତର ବୈଷୟିକ ଦକ୍ଷତା ଏବଂ ଏହାର ଅର୍ଥନୈତିକ ଶକ୍ତି ପ୍ରଦର୍ଶନ ପାଇଁ ଏକ ବିନ୍ଦୁ ପାଲଟିଛି । ଆଜି ଠାରୁ ସିଏସଆଇଆର-ଏନଆଇଏସସିପିଆର ରେ ଏକ ଲାବୋରେଟୋରୀ କାର୍ଯ୍ୟକ୍ରମ ଆରମ୍ଭ ହୋଇଛି ଯାହା ୧୬ ସେପ୍ଟେମ୍ବର ପର୍ଯ୍ୟନ୍ତ ଚାଲିବ । ଏହା ଏକ ଅଭିଯାନ ଯେଉଁଥିରେ ସିଏସଆଇଆରର ପ୍ରତ୍ୟେକ ଲାବୋରେଟୋରୀ ଏକ ସପ୍ତାହ ମଧ୍ୟରେ ଦେଶର ଲୋକଙ୍କୁ ଏହାର ଅନନ୍ୟ ଚିନ୍ତାଧାରା ଏବଂ ବୈଷୟିକ ସଫଳତାକୁ ପ୍ରଦର୍ଶନ କରିଥାଏ ।
