ମୋବାଇଲ ଚଳାଉଥିବା ପ୍ରତ୍ୟେକ ବ୍ୟକ୍ତିଙ୍କୁ ସରକାର ଦେବେ ଏକ ୟୁନିକ୍ ଆଇଡି ନମ୍ବର: ଜାଣନ୍ତୁ କାହିଁକି ଓ ଏହାର କ’ଣ ଫାଇଦା ?
ନୂଆଦିଲ୍ଲୀ: ଭାରତ ସରକାର ଖୁବ୍ ଶୀଘ୍ର ମୋବାଇଲ୍ ଗ୍ରାହକମାନଙ୍କୁ ଏକ ସ୍ୱତନ୍ତ୍ର ଆଇଡି ନମ୍ବର ପ୍ରଦାନ କରିବେ । ଏହି ଆଇଡି ନମ୍ବର ଏକ ପରିଚୟ କାର୍ଡ ପରି କାର୍ଯ୍ୟ କରିବ, ଯେଉଁଥିରେଆମର ପ୍ରାଥମିକ ଏବଂ ଆଡ୍-ଅନ୍ ଫୋନ୍ ସଂଯୋଗ ସହିତ ଜଡିତ ସମସ୍ତ ବିଷୟରେ ସୂଚନା ରହିବ ।
ଯେପରିକି ଆପଣ କେତେ ଫୋନ୍ ବ୍ୟବହାର କରନ୍ତି, ଆପଣଙ୍କ ପାଖରେ କେତେ ସିମ୍ କାର୍ଡ ଅଛି, କେଉଁ ସିମ୍ କେଉଁଠାରେ ସକ୍ରିୟ ଅଛି ଏବଂ ଆପଣଙ୍କ ନାମରେ କେତେ ସିମ୍ କାର୍ଡ ଜାରି କରାଯାଇଛି । ଦି ଫାଇନାନ୍ସିଆଲ୍ ଏକ୍ସପ୍ରେସର ରିପୋର୍ଟ ଅନୁଯାୟୀ, ଏହି ଆଇଡି ନମ୍ବର ସହାୟତାରେ ସରକାର ଆପଣଙ୍କ ମୋବାଇଲ୍ ସମ୍ବନ୍ଧୀୟ ସମସ୍ତ ତଥ୍ୟକୁ ଗୋଟିଏ ସ୍ଥାନରେ ରଖିବେ ଏବଂ ଆବଶ୍ୟକ ହେଲେ ଏହାକୁ କିଛି ନମ୍ବର ମାଧ୍ୟମରେ ଆକ୍ସେସ୍ କରାଯାଇପାରିବ ।
ଏହି ୟୁନିକ୍ ଆଇଡି ଠିକ୍ ୧୪ ଅଙ୍କ ବିଶିଷ୍ଟ ଆୟୁଷ୍ମାନ ଭାରତ ଡିଜିଟାଲ୍ ସ୍ୱାସ୍ଥ୍ୟ ଆକାଉଣ୍ଟ ପରି ଆଧାର କାର୍ଡ ସହିତ ଲିଙ୍କ ହେବ । ଏହି ଏବିଏଚଏ ନମ୍ବରର ସାହାଯ୍ୟରେ ଆପଣଙ୍କର ସମସ୍ତ ସ୍ୱାସ୍ଥ୍ୟ ଇତିହାସ ଗୋଟିଏ ସ୍ଥାନରେ ରହିଥାଏ ଏବଂ ଆପଣଙ୍କୁ ସମସ୍ତ ରିପୋର୍ଟ ଏବଂ ଡକ୍ୟୁମେଣ୍ଟକୁ ବିଭିନ୍ନ ସ୍ଥାନରୁ ଡାକ୍ତରଙ୍କ ନିକଟକୁ ନେବାକୁ ପଡିବ ନାହିଁ ଏବଂ ଡାକ୍ତରମାନେ ଏବିଏଚଏ ନମ୍ବର ସାହାଯ୍ୟରେ ଆପଣଙ୍କର ସମସ୍ତ ରେକର୍ଡକୁ ସହଜରେ ଜାଣିପାରିବେ । ସେହିଭଳି ମୋବାଇଲ୍ ଆଇଡି ମଧ୍ୟ କାମ କରିବ ।
କାହିଁକି ଆବଶ୍ୟକ :-
ତେବେ ଏହି ୟୁନିକ୍ ମୋବାଇଲ୍ ଆଇଡି ଏଥିପାଇଁ ଅଣାଯାଇଛି, ଯାହା ଦ୍ୱାରା ଟ୍ରାକିଂ ସିଷ୍ଟମ ପ୍ରଭାବଶାଳୀ ହୋଇପାରିବ ଏବଂ ସାଧାରଣ ବ୍ୟବହାରକାରୀଙ୍କୁ ଠକାମିରୁ ସୁରକ୍ଷିତ ରଖାଯାଇପାରିବ । ଏହି ଆଇଡି ନମ୍ବର ସାହାଯ୍ୟରେ ସରକାର ନକଲି ସିମ୍ କାର୍ଡ ଏବଂ ଅତ୍ୟଧିକ ଆବଣ୍ଟିତ ସିମ୍ କାର୍ଡ ବାତିଲ କରିବାକୁ ସକ୍ଷମ ହେବେ । ଏବେ ଟେଲିକମ୍ ବିଭାଗ ବିଭିନ୍ନ ଲାଇସେନ୍ସପ୍ରାପ୍ତ ସେବା କ୍ଷେତ୍ର (ଏଲଏସଏ) ରେ ଏଆଇ- ଆଧାରିତ ମୁଖ ଚିହ୍ନିବା ପ୍ରଯୁକ୍ତିକୁ ବ୍ୟବହାର କରି ଅଡିଟ୍ କରିଥାଏ ଏବଂ ତା’ପରେ ଅଧିକ ଆବଣ୍ଟିତ ସିମ୍ କାର୍ଡଗୁଡିକ ବ୍ଲକ୍ କରାଯାଇଥାଏ ।
ଯେତେବେଳେ ଆପଣ ଏକ ନୂଆ ସଂଯୋଗ ପାଇଁ ଆବେଦନ କରିବେ ସେତେବେଳେ ଏହି ୟୁନିକ୍ ଆଇଡି ଆପଣଙ୍କୁ ସରକାର ପ୍ରଦାନ କରିବେ । ଏହା ସହିତ ଏକ ନୂଆ ସିମ୍ କାର୍ଡ କିଣିବାବେଳେ, ଏହାକୁ କିଏ ବ୍ୟବହାର କରିବ ତାହା ମଧ୍ୟ ଆପଣଙ୍କୁ କହିବାକୁ ପଡିବ । ଆପଣଙ୍କ ସିମ୍ କାର୍ଡ ବ୍ୟତୀତ ଆୟ, ବୟସ, ଶିକ୍ଷା ସହିତ ଅନ୍ୟାନ୍ୟ ସୂଚନା ମଧ୍ୟ ମୋବାଇଲ୍ ଆଇଡି ନମ୍ବରରେ ସଂଗୃହିତ ହେବ ।
