ହାର୍ଟଆଟାକ୍ ଆଶଙ୍କା ଦୂର କରେ କଞ୍ଚାଲଙ୍କା
କଞ୍ଚାଲଙ୍କାରେ ଅନେକ ପୋଷକ ତତ୍ତ୍ୱ ଏବଂ ଆଣ୍ଟିଅକ୍ସିଡାଣ୍ଟ ରହିଥାଏ ଯାହା ସ୍ବାସ୍ଥ୍ୟ ପାଇଁ ଲାଭଦାୟକ ହୋଇପାରେ। କଞ୍ଚା ଲଙ୍କାରେ ଭିଟାମିନ ସି, ଭିଟାମିନ ଏ, ବିଟା-କ୍ୟାରୋଟିନ୍, ଆଇରନ ଏବଂ ପୋଟାସିୟମ ଭଳି ଉପାଦାନ ପ୍ରଚୁର ପରିମାଣରେ ମିଳିଥାଏ। ଏହା ବ୍ୟତୀତ ଏଥିରେ ‘କ୍ୟାପସାଇସିନ’ ନାମକ ଏକ ବିଶେଷ ଉପାଦାନ ଅଛି, ଯାହା ଏହାକୁ ମସଲାଦାର କରିଥାଏ। ଏହି କ୍ୟାପସାଇସିନ ଆମ ଶରୀର ପାଇଁ ଅନେକ ଉପାୟରେ ଲାଭଦାୟକ ହୋଇପାରେ।
ଅନେକ ଗବେଷଣାରୁ ଜଣାପଡ଼ିଛି, କଞ୍ଚା ଲଙ୍କାରେ ଥିବା କ୍ୟାପସାଇସିନ ହାର୍ଟ ପାଇଁ ଭଲ। ଏହା ଶରୀରରେ ଖରାପ କୋଲେଷ୍ଟ୍ରଲ (LDL) ହ୍ରାସ କରିବାରେ ସାହାଯ୍ୟ କରେ ଏବଂ ଭଲ କୋଲେଷ୍ଟ୍ରଲ (HDL) ବଜାୟ ରଖିବାରେ ସାହାଯ୍ୟ କରେ। ଏହା ସହିତ, ଏହା ରକ୍ତ ସଞ୍ଚାଳନକୁ ଉନ୍ନତ କରେ ଏବଂ ରକ୍ତ ଧମନୀରେ ଚର୍ବି ଜମାକୁ ହ୍ରାସ କରିବାରେ ସାହାଯ୍ୟ କରିପାରେ। ଏହା ହାର୍ଟଆଟାକ୍ ଏବଂ ଷ୍ଟ୍ରୋକର ଆଶଙ୍କାକୁ ହ୍ରାସ କରିପାରିବ। ଏହା ବ୍ୟତୀତ, କଞ୍ଚା ଲଙ୍କାରେ ଆଣ୍ଟି-ଅକ୍ସିଡାଣ୍ଟ ଥାଏ, ଯାହା ଶରୀରରେ ପ୍ରଦାହ କମ କରିଥାଏ। ପ୍ରଦାହକୁ ମଧ୍ୟ ହାର୍ଟଆଟାକ୍ ଏକ ପ୍ରମୁଖ କାରଣ ଭାବରେ ବିବେଚନା କରାଯାଏ।
କଞ୍ଚା ଲଙ୍କା କେବଳ ହାର୍ଟ ସମ୍ବନ୍ଧୀୟ ସମସ୍ୟା ସହିତ ଲଢ଼ିବାରେ ସହାୟକ ନୁହେଁ ବରଂ କ୍ୟାନସର ଭଳି ରୋଗ ସହିତ ଲଢ଼ିବାରେ ମଧ୍ୟ ସହାୟକ ହୋଇଥାଏ। ଏଥିରେ ଥିବା ଆଣ୍ଟି-ଅକ୍ସିଡାଣ୍ଟ ଶରୀରରେ ମୁକ୍ତ ରାଡିକାଲ୍ସକୁ ଦୂର କରିବାରେ କାମ କରେ। ମୁକ୍ତ ରାଡିକାଲ୍ସ କ୍ଷତିକାରକ ଉପାଦାନ ଯାହା କୋଷଗୁଡ଼ିକୁ କ୍ଷତି ପହଞ୍ଚାଇ କ୍ୟାନସର ରୋଗ ସୃଷ୍ଟି କରିପାରେ। କଞ୍ଚା ଲଙ୍କାରେ ମିଳୁଥିବା କ୍ୟାପସାଇସିନ କିଛି ପ୍ରକାରର କ୍ୟାନସର କୋଷକୁ ବୃଦ୍ଧି ପାଇବାରୁ ରୋକିପାରେ। ବିଶେଷକରି ପ୍ରୋଷ୍ଟେଟ, ପେଟ୍ ଏବଂ ଫୁସଫୁସ କ୍ୟାନସରେ ରୋଗରେ ଏଥିରୁ ଲାଭ ମିଳିଥାଏ।