ଟିଭି ଆଙ୍କରଙ୍କୁ ଦେଖି ପାଗଳ ହେଲେ ମହିଳା; ବାହା ହେବା ପାଇଁ କଲେ ଅପହରଣ, ଏବେ…
ହାଇଦ୍ରାବାଦ: ହାଇଦ୍ରାବାଦରେ ଜଣେ ମହିଳା ଜଣେ ଟିଭି ଆଙ୍କରଙ୍କୁ ବିବାହ କରିବା ପାଇଁ ତାଙ୍କୁ ଅପହରଣ କରି ନେଇଛନ୍ତି। ଜଣେ ମହିଳା ବ୍ୟବସାୟୀ ଜଣେ ଟିଭି ମ୍ୟୁଜିକ୍ ଚ୍ୟାନେଲ୍ ଆଙ୍କରଙ୍କୁ ବିବାହ କରିବା ଉଦ୍ଦେଶ୍ୟରେ ଦିନେ ତାଙ୍କୁ ଅପହରଣ କରି ନେଇଥିବା ଅଭିଯୋଗ ହୋଇଛି। ତେବେ ପୋଲିସ ଉକ୍ତ ମହିଳାଙ୍କୁ ଗିରଫ କରିଛି।
ସୂଚନା ଅନୁଯାୟୀ, ମହିଳା ଜଣକ ଡିଜିଟାଲ ମାର୍କେଟିଂ ବ୍ୟବସାୟ କରନ୍ତି। ୩୧ ବର୍ଷୀୟା ମହିଳା ଦୁଇ ବର୍ଷ ତଳେ ବିବାହ ୱେବସାଇଟ ଶାଦି ମାଟ୍ରିମୋନିରେ ଟିଭି ଆଙ୍କରଙ୍କ ଫଟୋ ଦେଖିଥିଲେ। ତାଙ୍କ ଫଟୋ ଦେଖି ସେ ଏତେ ଆକର୍ଷିତ ହୋଇଯାଇଥିଲେ ଯେ ସେ ତାଙ୍କ ସହ ଚାଟିଂ କରିବା ଆରମ୍ଭ କରିଥିଲେ । ତେବେ ପରେ ମହିଳା ଜଣକ ଜାଣିବାକୁ ପାଇଥିଲେ ଯେ ଆକାଉଣ୍ଟ ଧାରୀ ନିଜ ଫଟୋ ବଦଳରେ ଟିଭି ଆଙ୍କରଙ୍କ ଫଟୋକୁ ମ୍ୟାଟ୍ରିମୋନି ୱେବସାଇଟରେ ପ୍ରୋଫାଇଲ ପିକ୍ଚର ଭାବେ ବ୍ୟବହାର କରୁଛନ୍ତି।
ଏହାପରେ ମହିଳା ଜଣକ ସେହି ଫଟୋ ଜରିଆରେ ଆଙ୍କରକୁ ଖୋଜାଖୋଜି କରିଥିଲେ ଏବଂ ଶେଷରେ ତାଙ୍କୁ ସେହି ଆଙ୍କରର ଏକ ଫୋନ୍ ନମ୍ବର ମିଳିଥିଲା। ମହିଳା ଜଣକ ଏକ ମେସେଜ୍ ଜରିଆରେ ଆଙ୍କରଙ୍କ ସହ ଯୋଗାଯୋଗ କରିଥିଲେ। ଆଙ୍କର ମହିଳାଙ୍କୁ କହିଛନ୍ତି ଯେ କୌଣସି ଅଜଣା ବ୍ୟକ୍ତି ତାଙ୍କ ଫଟୋ ବ୍ୟବହାର କରି ମ୍ୟାଟ୍ରିମୋନି ସାଇଟରେ ଏକ ନକଲି ଆକାଉଣ୍ଟ ସୃଷ୍ଟି କରିଛନ୍ତି ଏବଂ ସେ ଏ ନେଇ ସାଇବର କ୍ରାଇମ ଥାନାରେ ଅଭିଯୋଗ କରିଛନ୍ତି।
ତେବେ ମହିଳା ଜଣକ ଆଙ୍କରଙ୍କୁ ମେସେଜ୍ ପଠାଉଥିଲେ ବୋଲି ପୋଲିସ କହିଛି। ମହିଳାଙ୍କ ଉପରେ ଅସନ୍ତୁଷ୍ଟ ହୋଇ ଆଙ୍କର୍ ତାଙ୍କ ନମ୍ବରକୁ ବ୍ଲକ୍ କରିଦେଇଥିଲେ। ଏହାପରେ ମହିଳା ଜଣକ ଆଙ୍କରଙ୍କୁ ବିବାହ କରିବାକୁ ଜିଦ୍ ଧରି ପରେ ମାମଲାର ସମାଧାନ କରିପାରିବେ ବୋଲି ଭାବି ତାଙ୍କୁ ଅପହରଣ କରିବାକୁ ଯୋଜନା କରିଥିଲେ। ଏହାପରେ ସେ ଆଙ୍କରଙ୍କୁ ଅପହରଣ କରିବା ପାଇଁ ୪ ଜଣଙ୍କୁ ଆଣିଥିଲେ ଏବଂ ଆଙ୍କରଙ୍କ ଗତିବିଧି ଉପରେ ନଜର ରଖିବା ପାଇଁ ତାଙ୍କ କାରରେ ଏକ ଟ୍ରାକିଂ ଡିଭାଇସ୍ ମଧ୍ୟ ଲଗାଇଥିଲେ।
ଗତ ଫେବ୍ରୁଆରି ୧୧ ତାରିଖରେ ୪ ଜଣ ଭଡ଼ାରେ ଆସିଥିବା ବ୍ୟକ୍ତି ଟିଭି ଆଙ୍କରଙ୍କୁ ଅପହରଣ କରି ମହିଳାଙ୍କ କାର୍ଯ୍ୟାଳୟକୁ ନେଇ ମାଡ଼ ମାରିଥିଲେ। ନିଜ ଜୀବନକୁ ଭୟ କରି ଟିଭି ଆଙ୍କର ମହିଳାଙ୍କ କଲ୍ ର ଉତ୍ତର ଦେବାକୁ ରାଜି ହୋଇଥିଲେ ଏବଂ ତା’ପରେ ହିଁ ତାଙ୍କୁ ଯିବାକୁ ଅନୁମତି ଦିଆଯାଇଥିଲା ବୋଲି ପୋଲିସ କହିଛି। ପରେ ସେ ଉପାଲ ଥାନାରେ ଅଭିଯୋଗ କରିବା ପରେ ଦଫା ୩୬୩, ୩୪୧, ୩୪୨ ଆଇପିସି ଧାରା ଅନୁଯାୟୀ ମାମଲା ରୁଜୁ କରାଯାଇଥିଲା। ତଦନ୍ତ ବେଳେ ପୋଲିସ ଅଭିଯୁକ୍ତ ମହିଳାଙ୍କ ସହ ଅପହରଣ ପାଇଁ ସାଥ୍ ଦେଇଥିବା ୪ ଜଣଙ୍କୁ ଗିରଫ କରିଛି। ଏବେ ତଦନ୍ତ ଜାରି ରହିଛି।
