ସତସତିକା ‘Jab We Met’ କାହାଣୀ, ପ୍ରେମିକକୁ ବାହା ହେବ ବୋଲି ଘରୁ ପଳାଇଲା ଝିଅ, ଆଉ ଜଣଙ୍କୁ..
ଇନ୍ଦୋରରେ ଜବ୍ ୱି ମେଟ୍ ଭଳି କାହାଣୀ, ଜାଣନ୍ତୁ ସମ୍ପୂର୍ଣ୍ଣ କାହାଣୀ
ନୂଆଦିଲ୍ଲୀ: ୨୦୦୭ ମସିହାରେ ମୁକ୍ତିଲାଭ କରିଥିବା “ଜବ୍ ୱି ମେଟ୍” ଚଳଚ୍ଚିତ୍ରଟି ଆପଣ ନିଶ୍ଚୟ ଦେଖିଥିବେ। ଏହି ଚଳଚ୍ଚିତ୍ରର ଅଭିନୟ, କାହାଣୀ ଏବଂ ନିର୍ଦ୍ଦେଶନା ଲୋକଙ୍କ ମନକୁ ଛୁଇଁଥିଲା। ଇନ୍ଦୋରରୁ ମଧ୍ୟ ଏମିତି ଏକ କାହାଣୀ ସାମ୍ନାକୁ ଆସିଛି।
ଇନ୍ଦୋରର ଶ୍ରଦ୍ଧା ତିୱାରୀ ନାମକ ଜଣେ ଝିଅ ନିଜ ପ୍ରେମିକଙ୍କୁ ବିବାହ କରିବା ପାଇଁ ଘରୁ ପଳାଇଥିଲେ। ଏହା ପରେ, ଏପରି କିଛି ଘଟିଲା ଯେ, ସେ ଅନ୍ୟ ଜଣେ ପୁଅକୁ ବିବାହ କରି ଘରକୁ ଫେରି ଆସିଲେ।
ସମ୍ପୂର୍ଣ୍ଣ ଘଟଣା: ୨୩ ଅଗଷ୍ଟରେ ଏମଆଇଜି ପୋଲିସ ଷ୍ଟେସନ ଅଞ୍ଚଳର ବାସିନ୍ଦା ଶ୍ରଦ୍ଧା ସାର୍ଥକଙ୍କୁ ବିବାହ କରିବା ପାଇଁ ନିଜ ଘରୁ ବାହାରିଥିଲେ। କିନ୍ତୁ, ଯେତେବେଳେ ସେ ଷ୍ଟେସନରେ ପହଞ୍ଚିଲେ, ତାଙ୍କ ପ୍ରେମିକ ସାର୍ଥକ ସେଠାକୁ ଆସି ନଥିଲେ। ଏହି ସମୟରେ ପ୍ରେମିକ ଶ୍ରଦ୍ଧାକୁ ଫୋନ୍ କରି କହିଥିଲେ ଯେ, ସେ ବିବାହ କରିବାକୁ ଚାହାଁନ୍ତି ନାହିଁ।
ଏହା ପରେ, ଶ୍ରଦ୍ଧାଙ୍କ ହୃଦୟ ଭାଙ୍ଗିଗଲା। ସେ କୌଣସି ଠିକଣା ବିନା ଟ୍ରେନରେ ଚଢ଼ିଗଲେ। କିଛି ଘଣ୍ଟା ପରେ, ସେ ରତଲାମ ଷ୍ଟେସନରେ ଓହ୍ଲାଇଲେ। ଜବ୍ ୱି ମେଟ୍ ଫିଲ୍ମର ଏକ ପାର୍ଟ ରତଲାମରେ ହିଁ ସୁଟିଂ କରାଯାଇଥିଲା।
କଲେଜରେ କାମ କରୁଥିବା ଇଲେକ୍ଟ୍ରିସିଆନ୍ଙ୍କୁ ଭେଟିଥିଲେ: ରିପୋର୍ଟ ଅନୁଯାୟୀ, ଶ୍ରଦ୍ଧା ଇନ୍ଦୋରରେ ନିଜ କଲେଜରେ କାମ କରୁଥିବା ଇଲେକ୍ଟ୍ରିସିଆନ୍ଙ୍କୁ ରତଲାମ୍ ଷ୍ଟେସନ୍ରେ ଭେଟିଥିଲେ।
ତାଙ୍କୁ ଏକା ବସିଥିବା ଦେଖି, କରଣଦୀପ ତାଙ୍କ ପାଖକୁ ଯାଇ ପଚାରିଲେ କ’ଣ ହୋଇଛି। ଶ୍ରଦ୍ଧାଙ୍କ ସମ୍ପୂର୍ଣ୍ଣ କାହାଣୀ ଶୁଣିବା ପରେ, ସେ ଶ୍ରଦ୍ଧାଙ୍କୁ ଘରକୁ ଯାଇ ତାଙ୍କ ବାପାମାଆଙ୍କୁ ସମସ୍ତ କଥା କହିବାକୁ କହିଲେ। ହେଲେ ଶ୍ରଦ୍ଧା କହିଥିଲେ ଯେ, ଯଦି ସେ ଘରକୁ ଯାଆନ୍ତି, ତେବେ ସେ ବଞ୍ଚିପାରିବେ ନାହିଁ।
‘ମୁଁ ବିବାହ କରିବା ପରେ ହିଁ ଘରକୁ ଫେରିବି’: ଶ୍ରଦ୍ଧା ଜିଦ୍ ଧରି କହିଥିଲେ ଯେ, ସେ ବିବାହ ପାଇଁ ଘରୁ ବାହାରିଛନ୍ତି। ତେଣୁ ସେ ବିବାହ ନକରି ଘରକୁ ଯାଇପାରିବେ ନାହିଁ। କରଣଦୀପଙ୍କ ବାରମ୍ବାର ବୁଝାଇବା ସତ୍ତ୍ୱେ, ଶ୍ରଦ୍ଧା ରାଜି ହେଲେ ନାହିଁ।
ଶେଷରେ କରଣଦୀପ ତାଙ୍କୁ ବିବାହ କରିବାକୁ ପ୍ରସ୍ତାବ ଦେଲେ ଏବଂ ଶ୍ରଦ୍ଧା ରାଜି ହେଲେ। ଶ୍ରଦ୍ଧା ଏବଂ କରଣଦୀପ ମହେଶ୍ୱର-ମଣ୍ଡଲେଶ୍ୱର ଯାଇ ବିବାହ କଲେ। ତା’ପରେ ସେମାନେ ମନ୍ଦସୌରକୁ ଗଲେ।
ନିଜ ଘରକୁ ଏମିତି ଫେରିଲେ ଶ୍ରଦ୍ଧା: ଶ୍ରଦ୍ଧା ଘରକୁ ଫେରାର ହେବ ପରେ ତାଙ୍କ ବାପା ଅନିଲ ତିୱାରୀ ଏକ ବ୍ୟାପକ ସନ୍ଧାନ ଅଭିଯାନ ଆରମ୍ଭ କଲେ ଏବଂ ତାଙ୍କ ଝିଅ ବିଷୟରେ ସୂଚନା ପ୍ରଦାନ କରିବା ବ୍ୟକ୍ତିଙ୍କୁ 51,000 ଟଙ୍କା ପୁରସ୍କାର ଘୋଷଣା କଲେ।
ଏହି ସବୁ ମଧ୍ୟରେ, ଗୁରୁବାର ଦିନ ଶ୍ରଦ୍ଧା ତାଙ୍କ ବାପାଙ୍କୁ ଫୋନ୍ କରି କହିଥିଲେ ଯେ, ସେ ମନ୍ଦସୌରରେ ଅଛନ୍ତି ଏବଂ ସୁରକ୍ଷିତ ଅଛନ୍ତି। ଆଶ୍ୱସ୍ତିର ନିଶ୍ୱାସ ନେଇ ତାଙ୍କ ବାପା ତାଙ୍କୁ ରାତିସାରା ଏକ ହୋଟେଲରେ ରହିବାକୁ ଏବଂ ପରଦିନ ସକାଳେ ଘରକୁ ଫେରିବାକୁ କହିଥିଲେ।
ଇନ୍ଦୋର ଫେରିବା ପରେ, ଶ୍ରଦ୍ଧା ଏବଂ କରଣଦୀପ MIG ପୋଲିସ ଷ୍ଟେସନକୁ ଯାଇଥିଲେ। ଏଠାରେ ଶ୍ରଦ୍ଧା ନିଜର ବୟାନ ରେକର୍ଡ କରିଥିଲେ। ଇନ୍ଦୋରର ଡିସିପି ରାଜେଶ ଦଣ୍ଡୋଟିଆ ନିଶ୍ଚିତ କରିଛନ୍ତି ଯେ, ଶ୍ରଦ୍ଧା ଏବଂ କରଣଦୀପ ଉଭୟଙ୍କୁ ପଚରାଉଚରା କରାଯାଉଛି।