Captain ରହିବେନି କିଙ୍ଗ କୋହଲି! IPL-2025ରେ ନୂଆ ଅଧିନାୟକ ଖୋଜୁଛି RCB

ଓଡ଼ିଶା ଭାସ୍କର: ଆଇପିଏଲ-୨୦୫ ପାଇଁ ମେଗା ଅକ୍ସନ ସରିବା ପରେ ଏବେ ଅଧିନାୟକ ପଦ ପାଇଁ ଚର୍ଚ୍ଚାରେ ରୋୟଲ ଚାଲେଞ୍ଜର୍ସ ବେଙ୍ଗଲୁରୁ । ଦଳ ଖୋଜୁଛି ଜଣେ ନୂଆ ଅଧିନାୟକ ।

ଆସନ୍ତା ସିଜନରେ ବିରାଟ କୋହଲି ଦଳର ଅଧିନାୟକ ଦାୟିତ୍ୱ ନେବେ ବୋଲି ଚର୍ଚ୍ଚା ହେଉଥିବା ବେଳେ ଏବେ ବଦଳିଛି ମାମଲା । ନୂଆ ସିଜନରେ ବିରାଟ କୋହଲିଙ୍କୁ ଅଧିନାୟକ ଦାୟିତ୍ୱ ମିଳିବନି ବୋଲି ସୂଚନା ମିଳିଛି ।

କିଏ ହେବେ ନୂଆ ଅଧିନାୟକ?

ଆଇପିଏଲ-୨୦୨୫ରେ ନୂଆ ଅଧିନାୟକଙ୍କ ସହ ମଇଦାନକୁ ଓହ୍ଲାଇବ ରୋୟଲ ଚାଲେଞ୍ଜର୍ସ ବେଙ୍ଗଲୁରୁ । ଏହି ପଦ ପାଇଁ ବିରାଟ କୋହଲିଙ୍କ ନାଁ ଚର୍ଚ୍ଚାରେ ଥିବା ବେଳେ ଏବେ ଏଥିରେ ବଡ଼ ଅପଡେଟ ଆସିଛି ।

ଆସନ୍ତା ସିଜନରେ ଷ୍ଟାର କ୍ରିକେଟର ରଜତ ପାଟିଦାର ଦଳର ନୂଆ ଅଧିନାୟକ ଭାବରେ ଦାୟିତ୍ୱ ଗ୍ରହଣ କରିପାରନ୍ତି । ତେବେ ଏ ନେଇ ଫ୍ରାଞ୍ଚାଇଜି ତରଫରୁ କୌଣସି ସୂଚନା ଦିଆଯାଇ ନାହିଁ ।

SMATରେ ଦମଦାର ପ୍ରଦର୍ଶନ: ସୟଦ ମୁସ୍ତାକ ଅଲି ଟି-୨୦ ଟୁର୍ଣ୍ଣାମେଣ୍ଟରେ ରଜତ ପାଟିଦାର ମଧ୍ୟପ୍ରଦେଶର ଅଧିନାୟକ ଥିଲେ। ସେ ଚମତ୍କାର ପ୍ରଦର୍ଶନ କରି ଦଳକୁ ଫାଇନାଲରେ ପହଞ୍ଚାଇଥିଲେ।

ଏହି ଟୁର୍ଣ୍ଣାମେଣ୍ଟରେ ରଜତ ପାଟିଦାର ତିନୋଟି ଦ୍ରୁତ ଅର୍ଦ୍ଧଶତକ ସହ ଦମଦାର ବ୍ୟାଟିଂ ପ୍ରଦର୍ଶନ ମଧ୍ୟ କରିଥିଲେ । ତେଣୁ ଆଇପିଏଲ ୨୦୨୫ ରେ ଆରସିବି ଅଧିନାୟକ ଭାବରେ ଦାୟିତ୍ୱ ନେଇପାରନ୍ତି ।

ବିରାଟ ହେବେନି ଅଧିନାୟକ: ନିଲାମ ପୂର୍ବରୁ ବିରାଟ କୋହଲି ପୁଣି ଥରେ ଆରସିବି ଅଧିନାୟକ ହୋଇପାରନ୍ତି ବୋଲି ଚର୍ଚ୍ଚା ହେଉଥିଲା। କିନ୍ତୁ ବତ୍ତମାନ ରଜତ ପାଟିଦାର ଏହି ତାଲିକାରେ ସାମିଲ ହୋଇଛନ୍ତି । ତେବେ ଆସନ୍ତା ସିଜନରେ କିଏ ଦଳର ଅଧିନାୟକ ହେବେ, ତାହା ଦେଖିବାକୁ ବାକି ରହିଲା ।

ରିଲିଜ ହୋଇଥିଲେ ପୂର୍ବତନ ଅଧିନାୟକ: ଆଇପିଏଲ୍ ୨୦୨୫ ନିଲାମ ପୂର୍ବରୁ ଆରସିବି ଦଳର ପୂର୍ବତନ ଅଧିନାୟକ ଫାଫ୍ ଡୁ ପ୍ଲେସିସଙ୍କୁ ରିଲିଜ କରିଥିଲା। ଏଭଳି ପରିସ୍ଥିତିରେ ବର୍ତ୍ତମାନ ଆରସିବି ଜଣେ ନୂଆ ଅଧିନାୟକଙ୍କ ସହ ମଇଦାନକୁ ଓହ୍ଲାଇବ ।