କ’ଣ ଆପଣ ବି ଲଗାଉଛନ୍ତି ନିଜ ଶିଶୁ ଆଖିରେ କଜଳ? ଜାଣନ୍ତୁ କ’ଣ ରହିଛି ସାଇଡ଼ ଇଫେକ୍ଟ
ଭାରତରେ ପିଲାମାନଙ୍କ ଆଖିକୁ ସୁନ୍ଦର କରିବା ପାଇଁ ମା’ମାନେ ସେମାନଙ୍କ ଆଖିରେ କାଜଲ ବା କଜଳ ଲଗାଇବା ପରମ୍ପରା ଏବେ ମଧ୍ୟ ଚାଲି ଆସୁଛି । ତେବେ ବିଶ୍ୱାସ କରାଯାଇଥାଏ ଯେ ଏହା ଦ୍ୱାରା ପିଲାମାନଙ୍କୁ ଖରାପ ଦୃଷ୍ଟି ପଡ଼ିନଥାଏ ଏବଂ ଏହା ଦ୍ୱାରା ଆଖି ମଧ୍ୟ ଭଲ ରହିଥାଏ । ତେବେ ଆପଣ ଯଦି ଏହି ପୁରୁଣା କଥା ଏବଂ ଅନ୍ଧ ବିଶ୍ୱାସରେ ଏବେ ମଧ୍ୟ ବିଶ୍ୱାସ କରୁଛନ୍ତି ତେବେ ଏହା ତୁରନ୍ତ ବନ୍ଦ କରନ୍ତୁ । କାରଣ ସ୍ୱାସ୍ଥ୍ୟ ବିଶେଷଜ୍ଞଙ୍କ ଅନୁଯାୟୀ ଏହା ଦ୍ୱାରା ପିଲାର ଆଖି ଉପରେ ବେଶ ଖରାପ ପ୍ରଭାବ ପଡ଼ିପାରେ । ଏପରିକି ଜଣେ ଶିଶୁ ସ୍ୱାସ୍ଥ୍ୟ ବିଶେଷଜ୍ଞ ଏନେଇ ଇନଷ୍ଟାଗ୍ରାମରେ ଏକ ପୋଷ୍ଟ ମଧ୍ୟ କରିଛନ୍ତି । ତେବେ ଆସନ୍ତୁ ଜାଣିବା କ’ଣ ରହିଛି ଏହାର ସାଇଡ଼ ଇଫେକ୍ଟ ।
କୁଣ୍ଡାଇ ହେବା- କଜଳ ବନାଇବା ସମୟରେ ସେଥିରେ ପ୍ରାୟ ୫୦ ପ୍ରତିଶତ ଲେଡ଼ ବ୍ୟବହାର କରାଯାଇଥାଏ । ତେବେ ଏହି ଲେଡ଼ କେବଳ ଆଖି ପାଇଁ ନୁହେଁ ବରଂ କିଡନୀ, ମସ୍ତିଷ୍କ, ବୋନ ମ୍ୟାରୋ ଆଦି ଶରୀରର ଅନ୍ୟ ଅଙ୍ଗ ପାଇଁ ମଧ୍ୟ ବେଶ କ୍ଷତିକାରକ ହୋଇଥାଏ । ଅନେକ ସମୟରେ ଶିଶୁକୁ କଜଳ ଲଗାଇବା ଦ୍ୱାରା ଆଖିରେ ରାଶନେସ ଆସିଥାଏ ଏବଂ ଶିଶୁ ଆଖିରେ କୁଣ୍ଡାଇ ହେବା ସହିତ ଆଖି ପୋଡ଼ାଜଳା ମଧ୍ୟ କରିଥାଏ ।
ଇନଫେକ୍ସନ- ପିଲାମାନଙ୍କ ଆଖିରେ ଆଙ୍ଗୁଠି ଦ୍ୱାରା କଜଳ ଲଗାଯାଇଥାଏ । ତେବେ ଏହି କାରଣରୁ ସେମାନଙ୍କ ଆଖିରେ ଅନେକ ସମୟରେ ଇନଫେକ୍ସନ ହୋଇଥାଏ । ଅନେକ ସମୟରେ ପିଲମାନଙ୍କ ଆଖିରେ କଜଳ ଲଗାଇବା ସମୟରେ ଖଣ୍ଡିଆ ମଧ୍ୟ ହୋଇଯାଇଥାଏ ।
ଟିୟର ଡକ୍ଟ ବ୍ଲକେଜ- ଆଖିରେ କଜଳ ଲଗାଇବା ଦ୍ୱାରା ଅନେକ ସମୟରେ ପିଲାମାନଙ୍କୁ ଆଲର୍ଜି ମଧ୍ୟ ହୋଇଥାଏ । ସେହି କାରଣରୁ ସେମାନଙ୍କ ଆଖି କୁଣ୍ଡାଇ ହୋଇ ଆଖିରୁ ପାଣି ବାହାରିବା ଆରମ୍ଭ ହୋଇଥାଏ । ଅନେକ ସମୟରେ କଜଳ ପିଲାମାନଙ୍କ ଆଖି କୋଣରେ ମଧ୍ୟ ଜମା ହୋଇ ରହିଯାଇଥାଏ । ଏହା ଦ୍ୱାରା ପିଲାମାନଙ୍କର ଟିୟର ଡକ୍ଟ ବ୍ଲକେଜ ହୋଇ ଇନଫେକ୍ସନର ସମ୍ଭାବନା ବଢ଼ିଥାଏ ।
