ଛଟେଇ ସୁଅରେ ଏବେ ମାଇକ୍ରୋସଫ୍ଟ ମଧ୍ୟ ସାମିଲ, ଏହି ବିଭାଗର ୧୯୦୦ କର୍ମଚାରୀ ହରାଇବେ ଚାକିରି: ରିପୋର୍ଟ
୨୦୨୪ରେ ଛଟେଇ କରୁଥିବା କମ୍ପାନୀ ମଧ୍ୟରେ ଏବେ ବଡ଼ ଟେକ କମ୍ପାନୀ ମାଇକ୍ରୋସଫ୍ଟ ମଧ୍ୟ ସାମିଲ ହୋଇଛି । କମ୍ପାନୀ ନିଜ ଭିଡିଓ-ଗେମ୍ ବିଭାଗରେ ୧,୯୦୦ କର୍ମଚାରୀଙ୍କୁ ଛଟେଇ କରିବାକୁ ଯାଉଛି । ଖବର ଅନୁଯାୟୀ, ଏହା ଅଧୀନରେ ଆକ୍ଟିଭିଜନ୍ ବ୍ଲିଜାର୍ଡ ଏବଂ ଏକ୍ସବକ୍ସ ର କର୍ମଚାରୀମାନେ ଚାକିରି ହରାଇବାକୁ ଯାଉଛନ୍ତି । ଟେକ୍ କମ୍ପାନୀ ମୁଖ୍ୟତଃ ଆକ୍ଟିଭିଜନ୍ ବ୍ଲିଜାର୍ଡ ବନ୍ଦ କରୁଛି, କିନ୍ତୁ ଏହା ଏକ୍ସ ବକ୍ସ ଏବଂ ଜେନିମାକ୍ସର କିଛି କର୍ମଚାରୀଙ୍କୁ ମଧ୍ୟ ପ୍ରଭାବିତ କରିବ ।
ବ୍ଲୁମବର୍ଗ ରିପୋର୍ଟ ଅନୁଯାୟୀ, ଏହି ଛଟେଇ ମାଇକ୍ରୋସଫ୍ଟର ୨୨,୦୦୦ ଗେମିଂ କର୍ମଚାରୀଙ୍କ ପ୍ରାୟ ୮ ପ୍ରତିଶତ କର୍ମଚାରୀଙ୍କ ଉପରେ ପ୍ରଭାବ ପକାଇବ । ଦି ଭର୍ଜ ପ୍ରଥମେ ଏହି ଖବର ଜଣାଇଲା । ଏହା ବ୍ୟତୀତ ରିଓଟ୍ ଗେମ୍ ସମେତ ଅନ୍ୟ ଭିଡିଓ-ଗେମ୍ କମ୍ପାନୀଗୁଡିକ ମଧ୍ୟ ବହୁ ସଂଖ୍ୟାରେ ଛଟେଇ କରିଛନ୍ତି ।
ମାଇକ୍ରୋସଫ୍ଟ ଗେମିଂ ମୁଖ୍ୟ ଇମେଲରେ ସୂଚନା ଦେଇଛନ୍ତି :-
କର୍ମଚାରୀମାନଙ୍କୁ ପଠାଯାଇଥିବା ଏକ ଇମେଲରେ, ମାଇକ୍ରୋସଫ୍ଟ ଗେମିଂ ଚିଫ୍ ଫିଲ୍ ସ୍ପେନ୍ସର ଛଟେଇ ବିଷୟରେ ସୂଚନା ଦେଇଛନ୍ତି । ସ୍ପେନ୍ସର ଲେଖିଛନ୍ତି ଯେ, ଆମେ ମିଳିତ ଭାବରେ ପ୍ରାଥମିକତା ସ୍ଥିର କରିଛୁ, ଓଭରଲପ୍ ର କ୍ଷେତ୍ର ଚିହ୍ନଟ କରିଛୁ ଏବଂ ଅଭିବୃଦ୍ଧି ପାଇଁ ସର୍ବୋତ୍ତମ ସୁଯୋଗ ଉପରେ ଆମେ ସମସ୍ତେ ଏକଜୁଟ୍ ବୋଲି ସୁନିଶ୍ଚିତ କରିଛୁ । ମାଇକ୍ରୋସଫ୍ଟ ଆକ୍ଟିଭିଜନ୍ ବ୍ଲିଜାର୍ଡ ହାସଲ କରିବାର ତିନି ମାସ ପରେ ଏହି ଛଟେଇ ଆସିଛି । କର୍ମଚାରୀମାନଙ୍କୁ ଏକ ଇମେଲରେ, ଆକ୍ଟିଭିଜନ୍ ପବ୍ଲିଶିଂ ମୁଖ୍ୟ ରବି କୋଷ୍ଟିଚ୍ ଲେଖିଛନ୍ତି ଯେ, ‘ଭବିଷ୍ୟତ ପାଇଁ ଆମର ଉତ୍ସଗୁଡ଼ିକୁ ରିସେଟ୍ ଏବଂ ଆଲାଇନ୍ କରିବା ପାଇଁ ଏହି ଛଟେଇ କରାଯାଇଛି ।’
ସ୍ୱିଗି ଏବଂ ଫ୍ଲିପକାର୍ଟରେ ମଧ୍ୟ ଛଟେଇ ହେବ :-
ତେବେ ଜାନୁଆରୀ ୨୫ ରେ ଖାଦ୍ୟ ବିତରଣ କମ୍ପାନୀ ସ୍ ସ୍ୱିଗି ଏବଂ ଇ-କମର୍ସ କମ୍ପାନୀ ଫ୍ଲିପକାର୍ଟ ମଧ୍ୟ ଛଟେଇ ଘୋଷଣା କରିଛନ୍ତି । ସ୍ୱିଗି ଗୋଟିଏ ବର୍ଷରେ ଦ୍ୱିତୀୟ ଥର ପାଇଁ ଛଟେଇ କରିବାକୁ ଯାଉଛି । ଏହା ଅଧୀନରେ ୪୦୦ କର୍ମଚାରୀଙ୍କ ଚାକିରି ହରାଇବେ । ଜାନୁଆରୀ ୨୦୨୩ ରେ ମଧ୍ୟ କମ୍ପାନୀ ୩୮୦ କର୍ମଚାରୀଙ୍କୁ ବରଖାସ୍ତ କରିଥିଲା । ଅନ୍ୟପକ୍ଷରେ ଫ୍ଲିପକାର୍ଟ ମଧ୍ୟ ଛଟେଇ ଘୋଷଣା କରିଛି । ଏହା ଅଧୀନରେ କମ୍ପାନୀ ୧୦୦୦ କର୍ମଚାରୀଙ୍କୁ ଛଟେଇ କରିବାକୁ ଯାଉଛି ।
