Nestleର ମିଶ୍ରଣ ମାମଲାରେ FSSAIକୁ ନୋଟିସ୍, ଏବେ ବେବି ପ୍ରଡକ୍ସଗୁଡ଼ିକର ହେବ ଯାଞ୍ଚ
ନେସଲେର ବେବି ଫୁଡସ୍ ପ୍ରଡକ୍ସରେ ଅତ୍ୟଧିକ ମିଶ୍ରଣ ହେବାର ଖବର ସାମ୍ନାକୁ ଆସିଛି । ବର୍ତ୍ତମାନ କେନ୍ଦ୍ର ସରକାର ଏହାର ତଦନ୍ତ ନିର୍ଦ୍ଦେଶ ଦେଇଛନ୍ତି । ସ୍ୱିଜରଲ୍ୟାଣ୍ଡର ପବ୍ଲିକ୍ ଆଇ ଏବଂ ଆନ୍ତର୍ଜାତୀୟ ବେବି ଫୁଡ୍ ଆକ୍ସନ୍ ନେଟୱାର୍କର ଏକ ରିପୋର୍ଟ ଅନୁଯାୟୀ, ଭାରତ ସମେତ ଏସିଆ ଏବଂ ଆଫ୍ରିକାରେ ବିକ୍ରି ହେଉଥିବା ନେସଲେର ବେବି ପ୍ରଡକ୍ସଗୁଡ଼ିକରେ ଚିନି ଏବଂ ମହୁ ବହୁ ମାତ୍ରାରେ ରହିଛି ।
ବର୍ତ୍ତମାନ ଏହି ମାମଲାରେ ଜାତୀୟ ଶିଶୁ ଅଧିକାର ସଂରକ୍ଷଣ ଆୟୋଗ ପଦକ୍ଷେପ ନେଇଛନ୍ତି । ଖାଦ୍ୟ ସୁରକ୍ଷା ଏବଂ ମାନକ ପ୍ରାଧିକରଣ ଅଫ୍ ଇଣ୍ଡିଆ (ଏଫଏସଏସଏଆଇ) କୁ ଆୟୋଗ ଏକ ବିଜ୍ଞପ୍ତି ଜାରି କରିଛି । ବର୍ତ୍ତମାନ ଏଫଏସଏସଏଆଇ ସ୍ୱିସ୍ ଅନୁସନ୍ଧାନକାରୀ ସଂସ୍ଥା ପବ୍ଲିକ୍ ଆଇ ଏବଂ ଇଣ୍ଟରନ୍ୟାସନାଲ ବେବି ଫୁଡ୍ ଆକ୍ସନ୍ ନେଟୱାର୍କ ଏହି ରିପୋର୍ଟରେ ଦିଆଯାଇଥିବା ଦାବିଗୁଡିକର ଯାଞ୍ଚ କରୁଛନ୍ତି ।
ଏବେ ଏଫଏସଏସଏଆଇ କରିବ ଯାଞ୍ଚ :-
ଏହା ଅନୁସନ୍ଧାନ କରିବ ବୋଲି ଏଫଏସଏସଏଆଇ କହିଛି । ଏହା ପରେ କାର୍ଯ୍ୟାନୁଷ୍ଠାନ ପାଇଁ ଇନ୍-ହାଉସ୍ ବୈଜ୍ଞାନିକ ପ୍ୟାନେଲରେ ଅନୁସନ୍ଧାନ ରିପୋର୍ଟ ଦାଖଲ କରାଯିବ । ଯଦି ଏହି ଅଭିଯୋଗଗୁଡିକ ସତ୍ୟ ବୋଲି ଜଣାପଡେ, ତେବେ ଏଫଏସଏସଏଆଇ ନେସଲେ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବ ।
ସୁଇଜରଲାଣ୍ଡ କମ୍ପାନୀଗୁଡିକ ଉପରେ ନଜର ରଖୁଥିବା ଏକ ୱେବସାଇଟ ‘ପବ୍ଲିକ ଆଇ’ ଦ୍ୱାରା କରାଯାଇଥିବା ଏକ ଅନୁସନ୍ଧାନରୁ ଜଣାପଡିଛି ଯେ, ଯେତେବେଳେ ନେସଲେ ବ୍ରିଟେନ ଏବଂ ଜର୍ମାନୀ ଭଳି ବିକଶିତ ଦେଶରେ ଏହି ବେବିଫୁଡ୍ ବ୍ରାଣ୍ଡ ବିକ୍ରୟ କରନ୍ତି, ସେତେବେଳେ ସେଗୁଡ଼ିକରେ ଚିନି ନ ଥାଏ।
ନେସଲେ ସ୍ବିଜରଲ୍ୟାଣ୍ଡର ଏକ ପ୍ରସିଦ୍ଧ କମ୍ପାନୀ, ଯାହାର ଉତ୍ପାଦ ସମଗ୍ର ବିଶ୍ୱରେ ବିକ୍ରି ହୁଏ।
‘ପବ୍ଲିକ ଆଇ’ ରିପୋର୍ଟ କରିଛି ଯେ ନେସଲେ ଅନେକ ଦେଶରେ ଶିଶୁ କ୍ଷୀର ଏବଂ ସେରେଲାକ ଉତ୍ପାଦରେ ଚିନି ଏବଂ ମହୁ ବ୍ୟବହାର କରନ୍ତି। ଏହା କରିବା ହେଉଛି ମେଦବହୁଳତା ଏବଂ କ୍ରନିକ ରୋଗକୁ ରୋକିବା ପାଇଁ ଅନ୍ତର୍ଜାତୀୟ ନିର୍ଦ୍ଦେଶାବଳୀଗୁଡିକର ଉଲ୍ଲଂଘନ। ନେସଲେର ନିୟମ ଉଲ୍ଲଂଘନ ମାମଲା ଏସିଆ, ଆଫ୍ରିକା ଏବଂ ଦକ୍ଷିଣ ଆମେରିକାର ଦେଶରେ ଦେଖିବାକୁ ମିଳିଛି। ତେବେ ଏହା ଭାରତର ସମସ୍ତ ନିୟମ ପାଳନ କରୁଛି ବୋଲି କମ୍ପାନୀ କହିଛି।
