୧୧ ମୃତକ ପରିବାରକୁ ୨୫ ଲକ୍ଷ ଲେଖାଏଁ ଦେଲା RCB, ଭବିଷ୍ୟତରେ ସାହାଯ୍ୟ ଜାରି ରଖିବାର ପ୍ରତିଶ୍ରୁତି ଦେଇଛି ଦଳ

ନୂଆଦିଲ୍ଲୀ: ଚଳିତ ବର୍ଷ ଆଇପିଏଲ୍ ଟ୍ରଫି ଆରସିବି ଜିତିଛି । ୧୮ ବର୍ଷ ପରେ ଆଇପିଏଲ୍ ଟ୍ରଫି ଜିତିବା ନେଇ ଦଳ ଖୁସି ମନେଇବା ଲାଗି ବେଙ୍ଗାଲୁରୁରେ ଟ୍ରଫି ଶୋଭାଯାତ୍ରାର ଆୟୋଜନ କରିଥିଲା । ଯେଉଁଥିରେ ଆରସିବି ଖେଳାଳି ଓ ଦଳର ଅନ୍ୟ ସଦସ୍ୟ ସାମିଲ ହୋଇଥିଲେ ।

ଖୁସିର ମୁହୂର୍ତ୍ତ ଦୁଃଖରେ ପରିଣତ ହେବ ବୋଲି କେହି କଳ୍ପନା କରି ନ ଥିଲେ । ଶୋଭାଯାତ୍ରାରେ ଗହଳି ଏତେ ହୋଇଗଲାରେ ଲୋକମାନେ ଦଳାଚକଟା ହେଲେ । ଯାହାଫଳରେ ୧୧ ଜଣଙ୍କ ମୃତ୍ୟୁ ଘଟିଲା ।

ଏଘଟଣା ପରେ ଆରସିବି ୩ ମାସ ପର୍ଯ୍ୟନ୍ତ ସୋସିଆଲ ମିଡିଆଠାରୁ ଦୂରରେ ରହିଲା । ଏବେ ପ୍ରଥମ ଥର ଘଟଣାକୁ ନେଇ ଏକ୍ସରେ ଏକ ପୋଷ୍ଟ ଶେୟାର କରିଛି, ଯେଉଁଥିରେ ସେ କହିଥିଲା, ବେଙ୍ଗାଲୁରୁରେ ଘଟିଯାଇଥିବା ଅଘଟଣ ପାଇଁ ସୋସିଆଲ ମିଡିଆଠାରୁ ଦଳ ଦୂରରେ ଥିଲା ।

ବର୍ତ୍ତମାନ ମୃତକଙ୍କ ପରିବାରକୁ ସାହାଯ୍ୟର ହାତ ବଢ଼ାଇଛି ଆରସିବି । ଦଳାଚକଟାରେ ପ୍ରାଣ ହରାଇଥିବା ଲୋକଙ୍କ ପରିବାରକୁ ୨୫ ଲକ୍ଷ ଲେଖାଏଁ ସହାୟତା ରାଶି ପ୍ରଦାନ କରାଯାଇଥିବା କହିଛି ଆରସିବି ।

ଆଗାମୀ ଭବିଷ୍ୟତରେ ଯଦି ମୃତକଙ୍କ ପରିବାର ଲୋକ ଯେ କୌଣସି ସାହାଯ୍ୟ କାମନା କରନ୍ତି ତାକୁ ଦଳ ପୂରା କରିବ ବୋଲି ପ୍ରତିଶ୍ରୁତି ଦେଇଛି । ଏ ନେଇ ଆରସିବି ପକ୍ଷରୁ ଏକ୍ସରେ ପୋଷ୍ଟ ଶେୟାର କରାଯାଇଛି ।