ମୃତ୍ତିକା ପ୍ରଦୂଷଣ ପାଇଁ ବଢ଼ୁଛି ହୃଦରୋଗ, ବର୍ଷକୁ ମରୁଛନ୍ତି ୯୦ ଲକ୍ଷ ଲୋକ: ଗବେଷଣା ତଥ୍ୟ
ଭୁବନେଶ୍ୱର(ଓଡ଼ିଶା ଭାସ୍କର): ଜଳ, ବାୟୁ ଓ ମୃତ୍ତିକାର ପ୍ରଦୂଷଣ ଯୋଗୁଁ ପ୍ରତିବର୍ଷ ବିଶ୍ୱରେ ୯୦ ଲକ୍ଷରୁ ଅଧିକ ଲୋକ ମୃତ୍ୟୁବରଣ କରୁଛନ୍ତି । ମାଟିରେ କୀଟନାଶକ ସାରର ପ୍ରୟୋଗ ଓ ଭାରି ଧାତୁର ଉପସ୍ଥିତି ଫଳରେ ମଣିଷର ହୃଦୟ ତଥା ରକ୍ତବାହିକାଗୁଡ଼ିକ ଉପରେ ପ୍ରତିକୂଳ ପ୍ରଭାବ ପଡ଼ୁଛି । ପ୍ରଦୂଷଣ ଜନିତ ରୋଗ ଓ ମୃତ୍ୟୁ ମଧ୍ୟରୁ ଅତିକମରେ ୬୦ ପ୍ରତିଶତ କେବଳ ହୃଦୟ ଓ ରକ୍ତବାହିକା ସମ୍ପର୍କିତ ସମସ୍ୟାରୁ ଉପୁଜିଥାଏ ବୋଲି ଏକ ଗବେଷଣାରୁ ଜଣାପଡ଼ିଛି ।
ନିକଟରେ କରାଯାଇଥିବା ଏକ ରିସର୍ଚ୍ଚ ଅନୁଯାୟୀ, ମୃତ୍ତିକା ପ୍ରଦୂଷଣ ଜନିତ ବିପଦ ବାୟୁ ପ୍ରଦୂଷଣର ପ୍ରଭାବ ଅପେକ୍ଷା କମ୍ ଦୃଶ୍ୟମାନ ହୋଇଥାଏ । ମୃତ୍ତିକାରେ ଥିବା ପ୍ରଦୂଷକଗୁଡ଼ିକ ହୃଦୟ ଓ ରକ୍ତବାହିକା ସ୍ୱାସ୍ଥ୍ୟକୁ ଅଧିକ ପ୍ରଭାବିତ କରିପାରେ । ମୃତ୍ତିକା ପ୍ରଦୂଷଣ ଯୋଗୁଁ ରକ୍ତବାହିକାଗୁଡ଼ିକରେ କାରଣଜନିତ ଚାପ ବଢ଼ିବା ଦ୍ୱାରା ହୃଦୟ ରକ୍ତବାହିକା ସମ୍ପର୍କିତ ରୋଗ ଅଧିକ ବୃଦ୍ଧି ପାଇପାରେ ।
ମରୁଭୂମିର ଧୂଳି, ରାସାୟନିକ ସାରର ସୂକ୍ଷ୍ମ ଅଂଶ ମଣିଷ ଶରୀରରେ ଧୂଳି ଆକାରରେ ପ୍ରବେଶ କରିଥାଏ । କ୍ୟାଡମିୟମ୍ ଓ ସୀସା ପରି ଭାରି ଧାତୁ, ବିଭିନ୍ନ ପ୍ରକାରର ପ୍ଲାଷ୍ଟିକ ଓ ଜୈବିକ ବିଷାକ୍ତ ଦ୍ରବ୍ୟ ଶରୀରରେ ପ୍ରବେଶ କରିପାରନ୍ତି । ମୃତ୍ତିକାରେ ଥିବା ପ୍ରଦୂଷକଗୁଡ଼ିକ ପ୍ରବାହିତ ହୋଇ ନଦୀ ଜଳରେ ମିଶି ତାହାକୁ ଦୂଷିତ କରିଦିଅନ୍ତି ।
କ୍ୟାଡମିୟମ ପରି ଏକ ଭାରି ଧାତୁ ମଣିଷର ସ୍ୱାସ୍ଥ୍ୟ ପାଇଁ ଘାତକ ବିବେଚିତ ହୋଇଥାଏ । ଆର୍ସେନିକ ସଂସ୍ପର୍ଶରେ ଆସିଲେ ତାହା ହୃଦୟ ଓ ରକ୍ତବାହିକା ସମ୍ପର୍କିତ ହୃଦରୋଗ ଯୋଗୁ ମୃତ୍ୟୁର ଆଶଙ୍କା ବୃଦ୍ଧି କରିଥାଏ । ଶିଳ୍ପ ପ୍ରକ୍ରିୟା ତଥା ପ୍ରଦୂଷିତ ଜଳରେ ଜଳସେଚନ କରାଗଲେ ଆର୍ସେନିକ ପ୍ରଦୂଷଣର ମାତ୍ରା ବୃଦ୍ଧି ପାଇଥାଏ । ନାନୋ ଓ ମାଇକ୍ରୋ ପ୍ଲାଷ୍ଟିକ କଣିକା ମଣିଷର ରକ୍ତସ୍ରୋତରେ ମିଶି ସେଗୁଡ଼ିକ ବିଭିନ୍ନ ଅଙ୍ଗରେ ପହଞ୍ଚି ସେଠାରେ ପ୍ରବାହ ସୃଷ୍ଟି କରିଥାଏ । ଏହାଫଳରେ ଶରୀରର ପାଚନ ପ୍ରକ୍ରିୟା ତଥା ହୃଦୟ ସଂକ୍ରାନ୍ତୀୟ ସମସ୍ୟା ସୃଷ୍ଟି ହୋଇଥାଏ ବୋଲି ଏସସିବିର ହୃଦରୋଗ ବିଶେଷଜ୍ଞ କହିଛନ୍ତି ।
