୩ ବର୍ଷ ପରେ ୟୁପିଆଇରେ ହେବ ୯୦% ଡିଜିଟାଲ ପେମେଣ୍ଟ, ପ୍ରତିଦିନ କରାଯିବ କୋଟି କୋଟି କାରବାର
ନୂଆଦିଲ୍ଲୀ: ଆଜିର ସମୟରେ ୟୁପିଆଇ ମାଧ୍ୟମରେ କାରବାର ଅତି ଦ୍ରୁତ ଗତିରେ ବୃଦ୍ଧି ପାଉଛି । ଏଥିରେ ଡିଜିଟାଲ୍ ଟ୍ରାଞ୍ଜାକ୍ସନ ପ୍ରସଙ୍ଗରେ ଏହା ଭାରତକୁ ବିଶ୍ୱସ୍ତରୀୟ ଅଗ୍ରଣୀ କରିପାରିଛି । ବର୍ତ୍ତମାନ ଏହା ମାଧ୍ୟମରେ ପ୍ରତିଦିନ କୋଟି କୋଟି କାରବାର କରାଯାଉଛି । ଆଗାମୀ ସମୟରେ ୟୁପିଆଇର ବ୍ୟବହାର ଆହୁରି ବୃଦ୍ଧି ପାଇବ । ପିଡବ୍ଲୁସି ଇଣ୍ଡିଆ ଏହା ବିଶ୍ୱାସ କରିଛି ।
ଏହି ରିପୋର୍ଟରେ ଆକଳନ :-
ପିଡବ୍ଲୁସି ଇଣ୍ଡିଆର ଏକ ରିପୋର୍ଟକୁ ଦର୍ଶାଇ ନ୍ୟୁଜ୍ ଏଜେନ୍ସି ପିଟିଆଇ କହିଛି ଯେ, ୨୦୨୬-୨୭ ଆର୍ଥିକ ବର୍ଷ ସୁଦ୍ଧା ଦିନକୁ ଏକ ବିଲିୟନ ୟୁପିଆଇ କାରବାର ହେବ ଏବଂ ମୋଟ ଡିଜିଟାଲ୍ ପେମେଣ୍ଟରେ ଏହାର ଅଂଶ ୯୦ ପ୍ରତିଶତକୁ ବୃଦ୍ଧି ପାଇବ । ପିଡବ୍ଲୁସି ଇଣ୍ଡିଆ ଏହାର ସର୍ବଶେଷ ରିପୋର୍ଟ ‘ଦି ଇଣ୍ଡିଆନ୍ ପେମେଣ୍ଟସ୍ ହ୍ୟାଣ୍ଡବୁକ୍ – ୨୦୨୨-୨୭’ ରେ ଏହି ଆକଳନ କରିଛି ।
ପିଡବ୍ଲୁସି ଇଣ୍ଡିଆ ରିପୋର୍ଟ ଅନୁଯାୟୀ, ଡିଜିଟାଲ ପେମେଣ୍ଟରେ କ୍ରାନ୍ତି ଆଣିଥିବା ୟୁନିଫାଏଡ୍ ପେମେଣ୍ଟ ଇଣ୍ଟରଫେସ୍ ଅର୍ଥାତ୍ ୟୁପିଆଇର ଆର୍ଥିକ ବର୍ଷ ୨୦୨୨-୨୩ ରେ ଖୁଚୁରା କାରବାରର ୭୫ ପ୍ରତିଶତ ଥିଲା । ରିପୋର୍ଟରେ କୁହାଯାଇଛି ଯେ, ଆସନ୍ତା ୩ ବର୍ଷ ମଧ୍ୟରେ ଖୁଚୁରା ଡିଜିଟାଲ ପେମେଣ୍ଟରେ ୟୁପିଆଇର ଅଂଶ ୯୦ ପ୍ରତିଶତକୁ ବୃଦ୍ଧି ପାଇବ ।
ଗତ ବର୍ଷ କରାଯାଇଥିଲା ଏତିକି କାରବାର :-
ଏହି ରିପୋର୍ଟରେ ଦର୍ଶାଯାଇଛି ଯେ, ଭାରତୀୟ ଡିଜିଟାଲ ପେମେଣ୍ଟ ବଜାର ପରିମାଣ ୫୦ ପ୍ରତିଶତ ହାରରେ ବୃଦ୍ଧି ପାଉଛି । ୨୦୨୨-୨୩ ଆର୍ଥିକ ବର୍ଷରେ ୟୁପିଆଇ ମାଧ୍ୟମରେ ୧୦୩ ବିଲିୟନ କାରବାର କରାଯାଇଥିଲା, ଯାହା ୨୦୨୬-୨୭ ଆର୍ଥିକ ବର୍ଷ ସୁଦ୍ଧା ୪୧୧ ବିଲିୟନକୁ ବୃଦ୍ଧି ପାଇବ । ଏହି ଉପାୟରେ ଦେଖିଲେ ଏହାର ଅର୍ଥ ହେଉଛି ୩ ବର୍ଷ ପରେ ୟୁପିଆଇ ମାଧ୍ୟମରେ ପ୍ରତିଦିନ ଏକ ବିଲିୟନରୁ ଅଧିକ କାରବାର ହେବ ।
