ମାସେ ପର୍ଯ୍ୟନ୍ତ ସୁଡ଼ଙ୍ଗରୁ ବାହାରି ପାରିବେନି ଶ୍ରମିକ! ବିଦେଶୀ Expert କଲେ ବଡ଼ ଖୁଲାସା

ଉତ୍ତରକାଶୀ: ସାରା ଦେଶରେ ବର୍ତ୍ତମାନ ଉତ୍ତରକାଶୀ ଟନେଲକୁ ନେଇ ଚର୍ଚ୍ଚା ଲାଗି ରହିଛି । ସୁଡ଼ଙ୍ଗ ଭିତରେ ଫସି ରହିଥିବା ୪୧ ଜଣ ଶ୍ରମିକଙ୍କୁ ଉଦ୍ଧାର କରିବା ପାଇଁ ଉଦ୍ୟମ ଜାରି ରହିଥିବା ବେଳେ ସାରା ଭାରତ ସେମାନଙ୍କ ପାଇଁ ପ୍ରାର୍ଥନା କରୁଛି । କିନ୍ତୁ ବର୍ତ୍ତମାନ ଅଗର ମେସିନ୍ ଭାଙ୍ଗିଯିବାରୁ ପୁଣିଥରେ ଖନନ କାର୍ଯ୍ୟରେ ବାଧା ସୃଷ୍ଟି ହୋଇଛି । ଏହାଭିତରେ ଉଦ୍ଧାର କାର୍ଯ୍ୟରେ ନିୟୋଜିତ ହୋଇଥିବା ଜଣେ ଏକ୍ସପର୍ଟ ଦେଇଛନ୍ତି ଭୟଙ୍କର ବୟାନ । ସମସ୍ତ ଶ୍ରମିକଙ୍କ ଉଦ୍ଧାରକୁ ନେଇ ଏବେ ବି ଦ୍ୱନ୍ଦ୍ୱ ଲାଗି ରହିଛି । ତେବେ ସେମାନଙ୍କୁ ଉଦ୍ଧାର କରିବାକୁ ଆହୁରି ମାସେ କିମ୍ବା ତା’ଠାରୁ ଅଧିକ ସମୟ ଲାଗିପାରେ ବୋଲି କହିଛନ୍ତି ଏକ୍ସପର୍ଟ ।

ଘଣ୍ଟା-କଣ୍ଟା ସହ ତାଳ ଦେଇ ଚାଲି ପାରୁନି ଟନେଲରୁ ଶ୍ରମିକଙ୍କ ଉଦ୍ଧାର କାର୍ଯ୍ୟ । ଶ୍ରମିକଙ୍କ ପାଖରେ ପହଞ୍ଚିବା ପାଇଁ ରେସ୍କ୍ୟୁ ଟିମ୍ ପାଇଁ ପାଦେ ପାଦେରେ ବିପଦ ଏବଂ ବାଧା ଲାଗି ରହିଛି । ତେଣୁ ଧିରେ ଧିରେ ସେମାନଙ୍କ ଉଦ୍ଧାର ନେଇ ମଧ୍ୟ ଏବେ ଦ୍ୱନ୍ଦ୍ୱ ଦେଖାଦେଇଛି । ଏହାଭିତରେ ଆମେରିକାର ଜଣେ ଏକ୍ସପର୍ଟ ଆର୍ନୋଲ୍ଡ ଡିକ୍ସ କହିଛନ୍ତି ଯେ, “ସୁଡ଼ଙ୍ଗ ଭିତରେ ଫସି ରହିଥିବା ଶ୍ରମିକ ଆସନ୍ତା ମାସେ ପର୍ଯ୍ୟନ୍ତ ବାହାରକୁ ବାହାରି ପାରିବେ ନାହିଁ । ଆସନ୍ତା ଖ୍ରୀଷ୍ଟମାସ ବା ଡିସେମ୍ବର ୨୫ ତାରିଖ ପର୍ଯ୍ୟନ୍ତ ଶ୍ରମିକ ଟନେଲ ଭିତରୁ ବାହାରିବା ହୁଏତ ସମ୍ଭବ ହୋଇନପାରେ ।”

ଏହାସହିତ ସେ କହିଛନ୍ତି ଯେ, ଉଦ୍ଧାର କାର୍ଯ୍ୟରେ ଅଚାନକ କୌଣସି ପଦକ୍ଷେପ ନେବା ଉଚିତ ନୁହେଁ । କାରଣ ଏହା ଖୁବ ମହଙ୍ଗା ପଡ଼ିପାରେ । ତେଣୁ ସମସ୍ତଙ୍କୁ ସୁରକ୍ଷିତ ଫେରାଇ ଆଣିବା ପାଇଁ ହେଲେ ସୁସ୍ଥ ମସ୍ତିଷ୍କରେ ଚିନ୍ତା କରି ନିଷ୍ପତ୍ତି ନେବାକୁ ପଡ଼ିବ । କିନ୍ତୁ ଉଦ୍ଦାର କାର୍ଯ୍ୟରେ ଅନେକ ବାଧା, ଅନେକ ସମସ୍ୟା ଦେଖାଦେବା ସହ ଅଧିକ ସମୟ ଲାଗିବା ସ୍ୱାଭାବିକ । ତେବେ ଏକ୍ସପର୍ଟଙ୍କ ଏହି ବୟାନ ଶୁଣିବା ପରେ ଚିନ୍ତାରେ ପଡ଼ି ଯାଇଛନ୍ତି ଶ୍ରମିକଙ୍କ ପରିବାର । ଖନନ କାର୍ଯ୍ୟରେ ବାରମ୍ବାର ବାଧା ଉପୁଜିବା ସହ ପ୍ରତି ମୁହୂର୍ତ୍ତରେ ଉଦ୍ଧାରକାରୀ ଦଳର ବୟାନ ପରିବର୍ତ୍ତନ ପରେ ଏକ୍ସପର୍ଟଙ୍କ ଏହି ବୟାନ ସେମାନଙ୍କୁ ବ୍ୟଥିତ କରି ପକାଇଛି ।

ତେବେ ଟନେଲ ନିକଟରୁ ମିଳିଥିବା ସଦ୍ୟ ରିପୋର୍ଟ ଅନୁସାରେ, ସୁଡ଼ଙ୍ଗ ଭିତରୁ ଶ୍ରମିକଙ୍କୁ ଉଦ୍ଧାର କରିବା ପାଇଁ ଅଧିକ ସମୟ ଲାଗିପାରେ । କାରଣ ସମସ୍ୟା ଏବେ ବି ଲାଗି ରହିଛି । ‘ଅଗର’ ମେସିନ ଭାଙ୍ଗିଯିବା ପରେ ରେସ୍କ୍ୟୁ ଟିମ୍ ମଧ୍ୟ ନିରାଶା ହୋଇଯାଇଛି । ତେଣୁ ଖନନ ପ୍ରକ୍ରିୟାରେ ଏବେ କୌଣସି ମେସିନର ବ୍ୟବହାର ନ କରି ହାତରେ ଖୋଳିବା ପାଇଁ ନିଷ୍ପତ୍ତି ନେଇଛନ୍ତି ଅଧିକାରୀ ।