ପାକିସ୍ତାନକୁ ରାଜନାଥଙ୍କ ଚେତାବନୀ, କହିଲେ ଆଚରଣରେ ଉନ୍ନତି ନଆସିଲେ କଠୋର ଦଣ୍ଡ ମିଳିବ

ନୂଆଦିଲ୍ଲୀ: ଭାରତ-ପାକିସ୍ତାନ ଯୁଦ୍ଧବିରତି ପରେ, ପ୍ରଧାନମନ୍ତ୍ରୀ ମୋଦିଙ୍କଠାରୁ ଆରମ୍ଭ କରି ସମସ୍ତ ନେତା ସେନାର ମନୋବଳ ବୃଦ୍ଧି କରିବାରେ ବ୍ୟସ୍ତ ରହିଛନ୍ତି । ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଶୁକ୍ରବାର ଗୁଜରାଟର ଭୁଜ ଏୟାରବେସରେ ପହଞ୍ଚି ସୈନିକମାନଙ୍କୁ ସମ୍ବୋଧିତ କରିଥିଲେ ।

ଏହା ପୂର୍ବରୁ, ପ୍ରଧାନମନ୍ତ୍ରୀ ମୋଦି ପଞ୍ଜାବର ଆଦମପୁର ଏୟାରବେସ ଯାଇଥିଲେ। ଏହା ପରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ମଧ୍ୟ ଶ୍ରୀନଗର ଏୟାରବେସରେ ପହଞ୍ଚି ସେନାଙ୍କ ସହିତ ଆଲୋଚନା କରିଥିଲେ ।

ଆଜି ଭୁଜରେ ପ୍ରତିରକ୍ଷା ମନ୍ତ୍ରୀ ପାକିସ୍ତାନକୁ ଚେତାବନୀ ଦେଇ କହିଛନ୍ତି ଯେ ଏପର୍ଯ୍ୟନ୍ତ କେବଳ ଟ୍ରେଲର ଦେଖାଯାଇଛି, ଯଦି ଅସ୍ତ୍ରବିରତି ଭଙ୍ଗ ହୁଏ ତେବେ ଦେଖନ୍ତୁ କ’ଣ ହୋଇପାରେ ।

କଣ କହିଲେ ପ୍ରତିରକ୍ଷା ମନ୍ତ୍ରୀ- ରାଜନାଥ ସିଂହ ଯୋଦ୍ଧା ମାନଙ୍କୁ କହିଛନ୍ତି, ମୁଁ ଆଜି ତୁମମାନଙ୍କୁ ଅଭିନନ୍ଦନ ଜଣାଇବା ପାଇଁ ତୁମମାନଙ୍କ ମଧ୍ୟରେ ଆସିଛି । ଆପଣମାନେ ସିନ୍ଦୂର ଅପରେସନରେ ପ୍ରକୃତରେ ଏକ ଚମତ୍କାର କାମ କରିଛନ୍ତି ଏବଂ ଆପଣମାନେ ସାରା ବିଶ୍ୱରେ ଭାରତକୁ ଗର୍ବିତ କରିଛନ୍ତି ।

ସିନ୍ଦୂର ଅପରେସନ ସମୟରେ ସହିଦ ହୋଇଥିବା ଆମର ସମସ୍ତ ସୈନିକ ଏବଂ ସାଧାରଣ ନାଗରିକଙ୍କୁ ମୁଁ ପ୍ରଣାମ କରୁଛି ଏବଂ ଆହତ ହୋଇଥିବା ଆମର ସାହସୀ ସୈନିକଙ୍କ ଶୀଘ୍ର ଆରୋଗ୍ୟ ପାଇଁ ମୁଁ ଭଗବାନଙ୍କ ନିକଟରେ ପ୍ରାର୍ଥନା କରୁଛି ।

ଭାରତର ବଳ ପ୍ରମାଣିତ ହୋଇଛି- ଏହା କୌଣସି ଛୋଟ କଥା ନୁହେଁ ଯେ ଆମର ବାୟୁସେନାର ପାକିସ୍ତାନର ପ୍ରତ୍ୟେକ କୋଣରେ ପ୍ରବେଶ ଅଛି ଏବଂ ଏହା ସମ୍ପୂର୍ଣ୍ଣ ପ୍ରମାଣିତ ହୋଇଛି… ଆଜି ପରିସ୍ଥିତି ଏପରି ହୋଇଛି ଯେ ଭାରତର ଯୁଦ୍ଧ ବିମାନଗୁଡ଼ିକ ସୀମା ପାର ନକରି ଏଠାରୁ ସେମାନଙ୍କ ଦେଶର ପ୍ରତ୍ୟେକ କୋଣରେ ସିଧାସଳଖ ଆକ୍ରମଣ କରିବାକୁ ସମ୍ପୂର୍ଣ୍ଣ ସକ୍ଷମ।

ସାରା ବିଶ୍ୱ ଦେଖିଛି ଯେ ତୁମେ ପାକିସ୍ତାନ ମାଟିରେ 9ଟି ଘାଟିକୁ କିପରି ଧ୍ୱଂସ କରିଛ। ପରବର୍ତ୍ତୀ କାର୍ଯ୍ୟାନୁଷ୍ଠାନରେ, ସେମାନଙ୍କର ଅନେକ ବାୟୁସେନା ଘାଟି ମଧ୍ୟ ଧ୍ୱଂସ କରାଯାଇଥିଲା ।

ବ୍ରହ୍ମୋସ ଆଗରେ ହାରିଲା ପାକିସ୍ତାନ- ପାକିସ୍ତାନ ବ୍ରହ୍ମୋସ କ୍ଷେପଣାସ୍ତ୍ରର ଶକ୍ତିକୁ ସ୍ବୀକାର କରିଛି  । ଆମ ଦେଶରେ ଏକ ପୁରାତନ କଥା ଅଛି ଦିନରେ ତାରା ଦେଖାଇବା । ସ୍ବଦେଶୀ ଜ୍ଞାନ କୌଶଳରେ ନିର୍ମିତ ବ୍ରହ୍ମୋସ ଏହା କରି ଦେଖାଇଛି  । ପାକିସ୍ତାନକୁ ରାତିର ଅନ୍ଧକାର ଭିତରେ ଦିନର ଉଜାଲା ଦେଖାଇଲା ବୋଲି ପ୍ରତିରକ୍ଷା ମନ୍ତ୍ରୀ କହିଛନ୍ତି ।

ଆମେ ପାକିସ୍ତାନକୁ ପରୀକ୍ଷାରେ ରଖିଛୁ । ଯଦି ଏହାର ଆଚରଣରେ ଉନ୍ନତି ଆସେ, ତେବେ ଠିକ୍ । ନଚେତ୍, ପାକିସ୍ତାନକୁ କଠୋରତମ ଦଣ୍ଡ ଦିଆଯିବ ବୋଲି ସେ କହିଛନ୍ତି ।