ବିଦେଶୀ ଖେଳାଳିଙ୍କ ଉପରେ ଭାରୀ ପଡିଲେ ଭାରତୀୟ: IPL ୨୦୨୨ ଅକ୍ସନରେ ହେଲା ଟଙ୍କାର ବର୍ଷା

ବେଙ୍ଗଲୁରୁ: ଇଣ୍ଡିଆନ ପ୍ରିମିୟର ଲିଗ୍ ର ୧୫ତମ ସିଜନ ପାଇଁ ହେଉଥିବା ମେଗା ଅକ୍ସନରେ ରହିଛି ଭାରତୀୟ ଖେଳାଳିଙ୍କ ଦବଦବା । ଦାମୀ ଖେଳାଳିଙ୍କ ତାଲିକାର ଟପ ଫାଇଭରେ ସବୁ ସ୍ଥାନରେ ଭାରତୀୟ ଖେଳାଳଙ୍କ କବଜା । ଇଶାନ କିଶାନ, ଦୀପକ ଚହର, ଶ୍ରେୟସ ଅୟରଙ୍କ ଭଳି ଯୁବ ଖେଳାଳିଙ୍କ ପାଇଁ ୨୦୨୨ ଅକ୍ସନ ପାଲଟିଛି ଖୁବ ଚମତ୍କାର । ଯୁବ ଖେଳାଳିମାନଙ୍କୁ କିଣିବା ପାଇଁ ପ୍ରତ୍ୟେକ ଦଳ ଲଗାଇଥିଲେ ନିଜ ନିଜର ଟଙ୍କା । ନିଲାମରେ ଏମାନଙ୍କ ପାଇଁ ଉଡିଛି ପ୍ରବଳ ଟଙ୍କା । କିନ୍ତୁ ଯୁବ ଅକ୍ସନର ପ୍ରଥମ ଦିନରେ ସବୁଠୁ ଦାମୀ ଖେଳାଳିଭାବେ ଉଭା ହୋଇଥିଲେ ଷ୍ଟାର ୱିକେଟ କିପର ବ୍ୟାଟ୍ସମ୍ୟାନ ଇଶାନ କିଶାନ । ପୁରୁଣା ଦଳ ମୁମ୍ବାଇ ଇଣ୍ଡିଆନ୍ସ ତାଙ୍କୁ ନିଜ ଦଳକୁ ଫେରାଇ ଆଣିବା ପାଇଁ ନିଜର ସବୁ ସାମର୍ଥ୍ୟ ଲଗାଇଛି ।

ଅକ୍ସନର ଟପ ୫ ହିରୋ:
୧. ଇଶାନ କିଶାନ

ଭାରତର ଯୁବ ୱିକେଟ କିପର ବ୍ୟାଟ୍ସମ୍ୟାନ ଇଶାନ କିଶାନଙ୍କ ଉପରେ ପ୍ରାୟ ସମସ୍ତ ଦଳ ରଖଇଥିଲେ ନଜର । ବିଭିନ୍ନ ସ୍ଥାନରେ ପରିସ୍ଥିତି ମୁତାବକ ଖେଳିବାର ସାମର୍ଥ୍ୟ ରଖୁଥିବା ଏହି ଖେଳାଳି ପାଇଁ ଅକ୍ସନରେ ଲାଗିଥିଲା ଲମ୍ବା ଭିଡ । ଓପନ କରିବାଠାରୁ ଆରମ୍ଭ କରି ୩ ନମ୍ବର ଏବଂ ୪ ନମ୍ବରରେ ଖେଳି ନିଜ ପାରଦର୍ଶିତା ଦେଖାଇ ସାରିଛନ୍ତି ଇଶାନ । ଏଥି ସହିତ ତାଙ୍କ ନିକଟରେ ଗୋଟିଏ ଇନିଂସକୁ ଫିନିଶ କରିବାର ଦକ୍ଷତା ମଧ୍ୟ ଭରି ହୋି ରହିଛି । ଯେଉଁଥି ପାଇଁ ସବୁ ଦଳ ତାଙ୍କୁ କିଣିବା ପାଇଁ ଆଗ୍ରହ ପ୍ରକାଶ କରିଥିଲେ । ଶେଷରେ ତାଙ୍କର ପୁରୁଣା ଟିମ ମୁମ୍ବାଇ ଇଣ୍ଡିଆନ୍ସ ତାଙ୍କୁ ଭାରୀ ରକମ ଦେଇ ନିଜ ଦଳରେ ସାମିଲ କରିଥିଲା । ଇଶାନ କିଶାନଙ୍କୁ ନିଜର କରିବା ପାଇଁ ମୁମ୍ବାଇ ମୋଟ ୧୫.୨୫ କୋଟି ଟଙ୍କା ଖର୍ଚ୍ଚ କରିଛି ।
୨. ଦୀପକ ଚହର

ଚେନ୍ନାଇ ସୁପର କିଙ୍ଗସ ଦଳର ବିଜୟ ଯାତ୍ରାରେ ଅନେକ ହିରୋ ରହିଥିଲେ । ଯେଉଁଥିରେ ଗୋଟିଏ ନାଁ ଥିଲା ଦୀପକ ଚହର । ଅନେକ ମ୍ୟାଚରେ ପାୱାରପ୍ଲେ ସମୟରେ ଦଳ ପାଇଁ ବ୍ରହ୍ମାସ୍ତ୍ର ଭଳି କାମ କରିଥିଲେ ଦୀପକ । କେବଳ ବୋଲିଂରେ ନୁହେଁ ତାଙ୍କ ବ୍ୟାଟରୁ ମଧ୍ୟ କିଛି ରନ ଦଳକୁ ମ୍ୟାଚରେ ବିଜୟ ହାସଲ କରାଇଛି । ତେଣୁ ତାଙ୍କୁ କିଣିବା ପାଇଁ ମଧ୍ୟ ଅକ୍ସନରେ ଖୁବ ଭିଡ ଜମିଥିଲା । ଏକାଧିକ ଫ୍ରାଞ୍ଚାଇଜି ତାଙ୍କୁ କିଣିବା ପାଇଁ ଆଗେଇ ଆସିଥିଲେ । କିନ୍ତୁ ଏ ସମସ୍ତ ଦଳ ଭିତରେ ବାଜି ମାରି ନେଇଥିଲା ସୁପର କିଙ୍ଗସ । ଏହି ଷ୍ଟାର ଅଲାରାଉଣ୍ଡରଙ୍କୁ କିଣିବା ପାଇଁ ୧୪ କୋଟି ଟଙ୍କା ବ୍ୟୟ କରି ଦୀପକଙ୍କୁ ଦଳକୁ ଫେରାଇ ଆଣିଛି ଧୋନୀବାହିନୀ ।
୩. ଶ୍ରେୟସ ଅୟର

ଦିଲ୍ଲୀ କ୍ୟାପିଟାଲ୍ସର ପୂର୍ବତନ ଅଧିନାୟକ ତଥା ଯୁବ ତାରକା ଶ୍ରେୟସ ଅୟରଙ୍କ ଉପରେ ଚଳିତବର୍ଷ ଅନେକ ଦଳର ନଜର ରହିଥିଲା । କୋଲାକାତା, ପଞ୍ଜାବ ସହିତ ବାଙ୍ଗାଲୋର ଭଳି ଟିମ ତାଙ୍କୁ ଦଳରେ ସାମିଲ କରିବା ପାଇଁ ଆପ୍ରାଣ ଚେଷ୍ଟା କରିଥିଲେ । ତାଙ୍କର ଅଧିନାୟକ ହେବାର ଦକ୍ଷତା ଏବଂ ମଧ୍ୟକ୍ରମରେ ବ୍ୟାଟିଂ ତାଙ୍କୁ ଏହି ଫର୍ମାଟରେ ଆହୁରି ଦାମ ବଢାଇ ଦେଇଛି । ଏକାଧିକ ଦଳ ତାଙ୍କୁ କିଣିବା ପାଇଁ ଫିଙ୍ଗି ଚାଲିଲେ କୋଟି କୋଟି ଟଙ୍କା । ବିଡ ବଢି ଚାଲିଲା । କିନ୍ତୁ ଶେଷରେ ବାଜି ମାରିନେଲେ ‘ବାଜିଗର’ । ଶ୍ରେୟସ ଅୟରଙ୍କୁ ୧୨.୨୫ କୋଟି ଟଙ୍କାରେ ନିଜ ଦଳରେ ସାମିଲ କରିଛି ଶାହରୁଖଙ୍କ ଦଳ କୋଲକାତା ନାଇଟ ରାଇଡର୍ସ । ତେବେ ଚଳିତ ସିଜନରୁ ସେ କୋଲକାତା ପକ୍ଷରୁ ଖେଳିବା ସହିତ ନେତୃତ୍ୱ ମଧ୍ୟ ନେଇ ପାରନ୍ତି ।
୪. ଶାର୍ଦ୍ଦୁଳ ଠାକୁର

ଚେନ୍ନାଇ ପକ୍ଷରୁ ଆଉ ଏକ ବଡ ନାଁ ଥିଲା ଶାର୍ଦ୍ଦୁଳ ଠାକୁର । ପେସ ବୋଲର ଭାବେ ଦଳରେ ସାମିଲ ହୋଇଥିଲେ ହେଁ ସମୟକ୍ରମେ ସେ ପାଲଟି ଯାଇଛନ୍ତି ଜଣେ ଅଲରାଉଣ୍ଡର । ବଲ ସହିତ ବ୍ୟାଟରେ ମଧ୍ୟ ସେ କମାଲ ଦେଖାଇ ଚାଲିଛନ୍ତି । ଏପରିକି ତାଙ୍କୁ ଏବେ ଲର୍ଡ ଶାର୍ଦ୍ଦୁଳ ବୋଲି ପରିଚୟ ମିଳି ସାରିଲାଣି । ତେଣୁ ତାଙ୍କର ଅକ୍ସନରେ ଅଧିକ ଦାମ ହେବା ସ୍ୱାଭାବିକ । ତେବେ ଏହି ସିଜନ ପାଇଁ ତାଙ୍କର ପୂର୍ବତନ ଦଳ ଚେନ୍ନାଇ ତାଙ୍କୁ ହାତଛଡା କରିଛି । ୧୦.୭୫ କୋଟି ଟଙ୍କା ଖର୍ଚ୍ଚ କରି ତାଙ୍କୁ ଦଳରେ ସାମିଲ କରିଛି ଦିଲ୍ଲୀ କ୍ୟାପିଟାଲ୍ସ । ୨୦୨୨ ସିଜନରେ ଶାର୍ଦ୍ଦୁଳ ହଳଦିଆ ବଦଳରେ ନୀଳ ରଙ୍ଗର ଜର୍ସି ପିନ୍ଧିଥିବାର ନଜର ଆସିବେ ।
୫. ୱାନିନ୍ଦୁ ହସରଙ୍ଗା

ମେଗା ଅକ୍ସରେ ଟପ ୫ ଦାମୀ ଖେଳାଳିଙ୍କ ମଧ୍ୟରେ କେବଳ ଜଣେ ବିଦେଶୀ ଖେଳାଳିଙ୍କ ନାଁ ରହିଛି । ସେ ହେଉଛନ୍ତି ଶ୍ରୀଲଙ୍କାର ସ୍ପିନ ଅଲରାଉଣ୍ଡର ୱାନିନ୍ଦୁ ହସରଙ୍ଗା । ୧୦.୭୫ କୋଯି ଟଙ୍କାରେ ତାଙ୍କୁ ବାଙ୍ଗୋଲୋର ଦଳରେ ଜାଗା ମିଳିଛି । ଆସିବିରେ ନିଜ ସ୍ଥାନ ପୁଣି ଫେରି ପାଇଛନ୍ତି ହସରାଙ୍ଗା । ଜଣେ ଦମଦାର ବୋଲିଂ ପାଇଁ ସେ ପରିଚିତ ହେଲେ ବି ତାଙ୍କ ବ୍ୟାଟ ମଧ୍ୟ ଅନେକ ସମୟରେ ହଲ୍ଲାବୋଲ କରିଥାଏ । ତେବେ ବାଙ୍ଗାଲୋର ପାଇଁ ସେ କେତେ ସଫଳ ହେଉଛନ୍ତି ତାହା ଦେଖିବାକୁ ବାକି ରହିଲା ।