ନିୟନ୍ତ୍ରଣ ରେଖା ନିକଟରେ ମୁତୟନ ହେବେ ପ୍ରାଦେଶିକ ସେନା ମହିଳା ଅଧିକାରୀ: ପ୍ରସ୍ତାବକୁ ମଞ୍ଜୁର କଲେ ପ୍ରତିରକ୍ଷା ମନ୍ତ୍ରୀ
ନୂଆଦିଲ୍ଲୀ: ପ୍ରତିରକ୍ଷା ମନ୍ତ୍ରୀ ଶ୍ରୀ ରାଜନାଥ ସିଂ ସଂଗଠନାତ୍ମକ ଆବଶ୍ୟକତା ଅନୁରୂପ ପ୍ରାଦେଶିକ ସେନା ବା ଟେରିଟୋରିଆଲ ଆର୍ମୀ (ଟିଏ)ର ମହିଳା ଅଧିକାରୀମାନଙ୍କୁ ନିୟନ୍ତ୍ରଣ ରେଖା ନିକଟରେ ମୁତୟନ କରିବା ପ୍ରସ୍ତାବକୁ ମଞ୍ଜୁର କରିଛନ୍ତି। ପ୍ରତିରକ୍ଷା ମନ୍ତ୍ରଣାଳୟ ଅଧୀନ ସାମରିକ ବ୍ୟାପାର ବିଭାଗ ପକ୍ଷରୁ ଏକ ଐତିହାସିକ ନିଷ୍ପତ୍ତି କ୍ରମେ ପ୍ରାଦେଶିକ ସେନାର ମହିଳା ଅଧିକାରୀଙ୍କ ପାଇଁ ରହିଥିବା ବର୍ତ୍ତମାନର କ୍ୟାଡର ପରିଚାଳନା ବ୍ୟବସ୍ଥାରେ ସଂଶୋଧନ ପ୍ରସ୍ତାବକୁ ଅନୁମୋଦନ କରାଯାଇଛି।
୨୦୧୯ ପରଠାରୁ ପ୍ରାଦେଶିକ ସେନାରେ ମହିଳା ଅଧିକାରୀମାନଙ୍କୁ ନିଯୁକ୍ତି ଦେବାକୁ ନିଷ୍ପତ୍ତି ନିଆଯାଇଥିଲା। ବର୍ତ୍ତମାନ ସୁଦ୍ଧା ଏହି ମହିଳା ଅଧିକାରୀମାନେ ଇକୋଲୋଜିକାଲ ଟାସ୍କ ଫୋର୍ସ ୟୁନିଟ, ଟିଏ ତୈଳ କ୍ଷେତ୍ର ୟୁନିଟ ଏବଂ ଟିଏ ରେଳ ଇଞ୍ଜିନିୟର ରେଜିମେଣ୍ଟରେ କାର୍ଯ୍ୟ କରିବାକୁ ସକ୍ଷମ ହୋଇଛନ୍ତି । ଏହି ଅବଧି ମଧ୍ୟରେ ସେମାନେ ହାସଲ କରିଥିବା ଅଭିଜ୍ଞତାକୁ ଆଧାର କରି, ମହିଳା ଅଧିକାରୀମାନଙ୍କର ନିଯୁକ୍ତି ପରିସରକୁ ବଢ଼ାଇବା ଲାଗି ଏକ ବିଚାର ପ୍ରସ୍ତାବ ପ୍ରସ୍ତୁତ କରାଯାଇଥିଲା। ଚଳିତ ଏପ୍ରିଲ ମାସରେ ମାନନୀୟ ପ୍ରତିରକ୍ଷା ମନ୍ତ୍ରୀ ଏହି ପ୍ରସ୍ତାବକୁ ମଞ୍ଜୁର କରିଛନ୍ତି।
ଏଣିକି ପ୍ରାଦେଶିକ ସେନାର ମହିଳା ଅଧିକାରୀମାନଙ୍କୁ ନିୟନ୍ତ୍ରଣ ରେଖା ନିକଟରେ ଥିବା ପ୍ରାଦେଶିକ ସେନାର ଇଞ୍ଜିନିୟରିଂ ରେଜିମେଣ୍ଟରେ ନିଯୁକ୍ତି ଦିଆଯିବ । ସେହିପରି ଏମାନଙ୍କୁ ନୂଆଦିଲ୍ଲୀସ୍ଥିତ ଟିଏ ଗ୍ରୁପ ମୁଖ୍ୟାଳୟ/ପ୍ରାଦେଶିକ ସେନାର ମହାନିର୍ଦ୍ଦେଶାଳୟରେ କାର୍ମିକ ଅଧିକାରୀ ଭାବେ ସଂଗଠନାତ୍ମକ ଆବଶ୍ୟକତା ଅନୁଯାୟୀ ନିଯୁକ୍ତି ଦିଆଯିବ ।
ମହିଳା ଅଧିକାରୀମାନଙ୍କର ନିଯୁକ୍ତି ସୁଯୋଗ ଓ ପରିସର ବଢ଼ାଇବା ପାଇଁ ଏହି ପ୍ରଗତିଶୀଳ ନୀତିଗତ ପଦକ୍ଷେପ ଗ୍ରହଣ କରାଯାଇଛି । ଏହା ସେମାନଙ୍କର ବୃତ୍ତିଗତ ଆକାଂକ୍ଷାକୁ ପୂରଣ କରିବ । କାରଣ ସେମାନଙ୍କୁ ଏବେ ସୁଦ୍ଧା ନିଜର ପୁରୁଷ ସହକର୍ମୀଙ୍କ ଭଳି ସମାନ ପରିସ୍ଥିତିରେ ପ୍ରଶିକ୍ଷଣ ନେଇଛନ୍ତି ଏବଂ ସେମାନଙ୍କ ଭଳି ଦେଶ ସେବା କରିବା ପାଇଁ ପ୍ରସ୍ତୁତ ଅଛନ୍ତି । ମହିଳା ଅଧିକାରୀମାନେ ପୁରୁଷ ଅଧିକାରୀମାନଙ୍କ ଭଳି ବିଭିନ୍ନ ୟୁନିଟ୍, ପଦପଦବୀରେ ତଥା ଆହ୍ୱାନପୂର୍ଣ୍ଣ ପରିସ୍ଥିତିରେ ଏବଂ ଗୁରୁତ୍ୱପୂର୍ଣ୍ଣ କାର୍ମିକ ପଦବୀରେ କାର୍ଯ୍ୟ କରିବା ଲାଗି ସକ୍ଷମ ଅଟନ୍ତି।
ପ୍ରାଦେଶିକ ସେନା ‘ନାଗରିକ ସୈନିକ’ ସେନା ଅବଧାରଣା ଉପରେ ଆଧାରିତ ଏବଂ ଏହାର ଅଧିକାରୀ ନାଗରିକ ଜୀବନରେ ଲାଭକରୀ ରୂପରେ କାର୍ଯ୍ୟରତ ରହି ମୌଳିକ ସୈନ୍ୟ ପ୍ରଶିକ୍ଷଣ ସମ୍ବନ୍ଧୀୟ ବାର୍ଷିକ ପ୍ରଶିକ୍ଷଣ ପ୍ରାପ୍ତ କରିପାରିବେ ।
