(Video) ନିଆଁ ଗ୍ରାସରେ ୧୪ ଭୋଗ ଦୋକାନ, ଲକ୍ଷାଧିକ ଟଙ୍କାର ସାମଗ୍ରୀ ନଷ୍ଟ
ଘଟଗାଁ- କେନ୍ଦୁଝରର ପ୍ରଖ୍ୟାତ ଠାକୁରାଣୀ ମା ତାରିଣୀଙ୍କ ମନ୍ଦିର ନିକଟରେ ଭୟଙ୍କର ଅଗ୍ନିକାଣ୍ଡ ଘଟି ପ୍ରାୟ ୧୪ଟି ଭୋଗ ସାମଗ୍ରୀ ଦୋକାନ ସମ୍ପୂର୍ଣ୍ଣ ପୋଡି ଛାରଖାର ହୋଇଯାଇଛି । ଏହି ଅଗ୍ନିକାଣ୍ଡରେ ଲକ୍ଷ ଲକ୍ଷ ଟଙ୍କାର ଭୋଗ, ଫଟୋ, ଅନ୍ୟାନ୍ୟ ପୂଜା ସମଗ୍ରୀ ସମ୍ପୂର୍ଣ୍ଣ ଜଳିପୋଡି ପାଉଁଶ ହୋଇଯାଇଛି । ଖବର ପାଇଁ ଅଗ୍ନିଶମବାହିନୀ ଓ ସ୍ଥାନୀୟ ଲୋକ ନିଆଁକୁ ଆୟତ୍ତ କରିଥିବା ଦେଖିବାକୁ ମିଳିଛି ।
ସୂଚନା ମୁତାବକ, ଗତକାଲି ବିଳମ୍ବିତ ରାତିରେ ଲୋକେ ନିଜ ନିଜ ଘରକୁ ଦୋକାନ ବାଡି ବନ୍ଦ କରି ଯିବା ପରେ ହଠାତ୍ ନିଆଁ ଲାଗିଯାଇଥିଲା । କୌଣସି କାରଣରୁ ଗୋଟିଏ ଦୋକାନରେ ନିଆଁ ଲାଗିବା ପରେ ନିଆଁ ବ୍ୟାପିଯାଇଥିଲା । ନିଆଁ ଅତି ପ୍ରଖର ଥିଲା । ସମଗ୍ର ଅଞ୍ଚଳରେ ନିଆଁରେ ହୁତୁହୁତୁ ହୋଇ ଜଳିବାରେ ଲାଗିଥିଲା । ଲୋକେ ଏହା ଦେଖି ନିଆଁକୁ ଆୟତ୍ତ କରିବାକୁ ଚେଷ୍ଟା କରିବା ସହ ଅଗ୍ନିଶମ ବାହିନୀକୁ ଖବର ଦେଇଥିଲେ । କିଛି ସମୟରେ ଅଗ୍ନିଶମ ବାହିନୀ ଆସି ନିଆଁକୁ ଆୟତ୍ତ କରିଥିଲା ।
ହେଲେ ନିଆଁ ଆୟତ୍ତ ହେଲା ବେଳକୁ ନିଆଁରେ ରାସ୍ତାର ଗୋଟିଏ ପଟରେ ଥିବା ପ୍ରାୟ ୧୪ ଦୋକାନ ସମ୍ପୂର୍ଣ୍ଣ ପାଉଁଶ ହୋଇଯାଇଥିଲା । ବିଳମ୍ବିତ ରାତିରେ ଅଗ୍ନିକାଣ୍ଡ ଘଟିବାରୁ ଦୋକାନୀମାନେ କିଛି ସାମଗ୍ରୀ ଦୋକାନରୁ ଉଦ୍ଧାର କରିପାରି ନ ଥିଲେ । ଏବେ ଏହି ବିପନ୍ନ ପରିବାର କେମିତି ସେମାନଙ୍କ ପରିବାର ପ୍ରତି ପୋଷଣ କରିବେ ତାକୁନେଇ ଚିନ୍ତାରେ । ପୋଲିସ ଘଟଣାରେ ତଦନ୍ତ ଆରମ୍ଭ କରିଛି । କେମିତି ଓ କେଉଁ ପରିସ୍ଥିତିରେ ନିଆଁ ଲାଗିଲା ତାର ତଦନ୍ତ କରୁଛି । ନିଆଁ ସର୍ଟ ସର୍କିଟ ନା ଆପଣା ଛାଏଁ ଲାଗିଛି ନା କେହି ଜାଣିଶୁଣି ଲଗାଇଛି ତାର ତଦନ୍ତ ଆରମ୍ଭ କରିଛି ।
