ଭାରତ-ୱେଷ୍ଟଇଣ୍ଡିଜ ସିରିଜ ପୂର୍ବରୁ ଝଟକା: ଏକା ସାଙ୍ଗରେ କ୍ରିକେଟରୁ ବିଦାୟ ନେଲେ ଦୁଇ ସୁପରଷ୍ଟାର ଖେଳାଳି, ଜଣେ ଥିଲେ ଅଧିନାୟକ
ନୂଆଦିଲ୍ଲୀ: ଆସନ୍ତା ଜୁଲାଇ ୨୨ ତାରିଖରୁ ଆରମ୍ଭ ହେବାକୁ ଯାଉଛି ଭାରତର ୱେଷ୍ଟଇଣ୍ଡିଜ ଦିନିକିଆ ସିରିଜ । ଏହି ସିରିଜ ପାଇଁ ଶିଖର ଧୱନଙ୍କୁ ଦଳର ଅଧିନାୟକ କରିଛି ଟିମ ଇଣ୍ଡିଆ । ତେବେ ଏହି ମହାହଯୁଦ୍ଧ ପୂର୍ବରୁ କ୍ରିକେଟ ଜଗତରୁ ବିଦାୟ ଘୋଷଣା କରିଛନ୍ତି ଦୁଇ ଜଣ ଷ୍ଟାର କ୍ରିକେଟର । ୱେଷ୍ଟ ଇଣ୍ଡିଜ କ୍ରିକେଟର ଦୁଇ ଧୂଆଁଧାର ଖେଳାଳି ଦିନେଶ ରାମଦିନ ଏବଂ ଲେଣ୍ଡଲ ସିମନ୍ସ କ୍ରିକେଟକୁ ଅଲବିଦା କହିଛନ୍ତି ।
ସୂଚନା ଅନୁଯାୟୀ, ୱେଷ୍ଟଇଣ୍ଡିଜର ପୂର୍ବତନ ଅଧିନାୟକ ଦିନେଶ ରାମଦିନ ଏବଂ ଲେଣ୍ଲ ସିମନ୍ସ କ୍ରିକେଟରୁ ନିଜ ସନ୍ନ୍ୟାସ ଘୋଷଣା କରିଛନ୍ତି । ଏକ ଇନଷ୍ଟାଗ୍ରାମ ପୋଷ୍ଟ କରି ନିଜ ଅବସର ଘୋଷଣା କରିଛନ୍ତି ରାମଦୀନ । ଶେଷ ଥର ପାଇଁ ୨୦୧୯ ଡିସେମ୍ବରରେ ଅନ୍ତରାଷ୍ଟ୍ରୀୟ ମ୍ୟାଚ ଖେଳିଥିଲେ ୱେଷ୍ଟଇଣ୍ଡିଜର ଏହି ପୂର୍ବତନ ଅଧିନାୟକ । ଶେଷ ଥର ପାଇଁ ରାମଦୀନ ହାଇଦ୍ରାବାଦରେ ଭାରତ ବିପକ୍ଷରେ ଟି-୨୦ ମ୍ୟାଚ ଖେଳିଥିଲେ । ୨୦୧୫ ମସିହାରେ ଜାସନ ହୋଲ୍ଡରଙ୍କ ସ୍ଥାନରେ ଦଳର ନେତୃତ୍ୱ ନେଇଥିଲେ ଦିନେଶ ରାମଦିନ ।
ଇନଷ୍ଟାଗ୍ରାମରେ ସେ ଲେଖିଛନ୍ତି ଯେ, “ମୋର ସୌଭାଗ୍ୟ ଯେ ମୁଁ ଅନ୍ତରାଷ୍ଟ୍ରୀୟ କ୍ରିକେଟରୁ ଅବସର ଘୋଷଣା କରୁଛି । ଗତ ୧୪ ବର୍ଷ ଏକ ସ୍ୱପ୍ନ ସାକାର ହେବା ପରି ରହିଥିଲା । ୱେଷ୍ଟଇଣ୍ଡିଜ ସମେତ ଅନ୍ୟାନ୍ୟ ଦଳରୁ କ୍ରିକେଟ ଖେଳି ନିଜ ପିଲାବେଳର ସ୍ୱପ୍ନ ସତରେ ପରିଣତ କରିଛି । ମୋ କ୍ୟାରିୟର ମୋତେ ସାରା ଦୁନିଆ ଦେଖିବା ପାଇଁ ବାଧ୍ୟ କରିଥିଲା ।” ତେବେ ସେ ଆଗକୁ ଫ୍ରାଞ୍ଚାଇଜି କ୍ରିକେଟ ଖେଳିବେ ବୋଲି ପ୍ରକାଶ କରିଛନ୍ତି ।
ଅନ୍ୟ ପକ୍ଷରେ ୨୦୦୬ରେ ଡେବ୍ୟୁ କରିଥିବା ଲେଣ୍ଡଲ ସିମନ୍ସ ମଧ୍ୟ କ୍ରିକେଟକୁ ଅଲବିଦା କହିଛନ୍ତି । ୱେଷ୍ଟଇଣ୍ଡିଜ ପାଇଁ ୬୮ ଦିନିକିଆ ଖେଳିଥିବା ସିମନ୍ସ ୧୯୫୮ ରନ ସଂଗ୍ରହ କରିଛନ୍ତି । ଏଥିରେ ୨ଟି ଶତକ ଏବଂ ୧୬ ଅର୍ଦ୍ଧଶତକ ସାମିଲ ରହିଛି । ତେବେ ଟେଷ୍ଟ କ୍ୟାରିୟରରେ ଏତେ ବେଶୀ ଚମକି ପାରି ନଥିଲେ ଏହି ଷ୍ଟାର ଖେଳାଳି । ୮ଟି ମ୍ୟାଚରୁ ୨୭୮ ରନ କରିବାରେ ସଫଳ ରହିଛନ୍ତି । ୬୮ ଟି-୨୦ ମ୍ୟାଚରେ ମଧ୍ୟ ୱେଷ୍ଟଇଣ୍ଡିଜର ନେତେୃତ୍ୱ ନେଇଛନ୍ତି ସିମନ୍ସ । ତେବେ ଟି-୨୦ରେ ସେ ୯ଟି ଅର୍ଦ୍ଧଶତକ ସହିତ ୧୫୨୭ ରନ କରିଛନ୍ତି ।
କିନ୍ତୁ ୱେଷ୍ଟ ଇଣ୍ଡିଜର ଏହି ଷ୍ଟାର ଖେଳାଳି ଇଣ୍ଡିଆନ ପ୍ରିମିୟର ଲିଗରେ ମୁମ୍ବାଇ ଇଣ୍ଡିଆନ୍ସ ତରଫରୁ ଖେଳି ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି । ୨୯ଟି ମ୍ୟାଚ ଖେଳି ୧୦୭୯ ରନ ସଂଗ୍ରହ କରିଛନ୍ତି ଲେଣ୍ଡଲ ସିମନ୍ସ । ତେବେ ଉଭୟ ଷ୍ଟାର ଖେଳାଳି ଟିମରୁ ସନ୍ନ୍ୟାସ ନେବା ୱେଷ୍ଟଇଣ୍ଡିଜ ପାଇଁ ଏକ ଦୁଃଖର ବିଷୟ ।
