୨୪ ଦିନରେ ୪୨୫୦ ଟଙ୍କା ମହଙ୍ଗା ହେଲା ସୁନା, ଡିସେମ୍ବରରେ ସୁନାର ମୂଲ୍ୟ ୯୦ ହଜାର ଟଙ୍କା ପହଞ୍ଚିବ କି? ଜାଣନ୍ତୁ ୩ଟି କାରଣ

ନୂଆଦିଲ୍ଲୀ: ଅନ୍ତର୍ଜାତୀୟ ବଜାର ସହିତ ଘରୋଇ ବଜାରରେ ମଧ୍ୟ ସୁନାର ମୂଲ୍ୟ ନିରନ୍ତର ବୃଦ୍ଧି ପାଇବାରେ ଲାଗିଛି । ପ୍ରାୟ ଅଢ଼େଇ ମାସ ପରେ ସୁନା ପୁଣି ଥରେ ସର୍ବୋଚ୍ଚ ସ୍ତରରେ ପହଞ୍ଚିଛି । ୨୦୨୪ ମସିହାରେ ଦୀପାବଳି ଦିନ ୨୪ କ୍ୟାରେଟ୍ ସୁନାର ମୂଲ୍ୟ ୮୧୩୪୦ ଟଙ୍କା ଥିଲା । ଯାହା ଆଜି ୮୨ ହଜାର ଅତିକ୍ରମ କରିଛି ।

ବିଶେଷଜ୍ଞଙ୍କ ମତରେ, ଆଗାମୀ ଦିନରେ ସୁନା ଆହୁରି ମହଙ୍ଗା ହେବ । ଆସନ୍ତୁ ଜାଣିବା ଏହି ବର୍ଷ ଡିସେମ୍ବର ସୁଦ୍ଧା ସୁନା କେତେ ମହଙ୍ଗା ହୋଇପାରେ ।

ସରାଫା ଆସୋସିଏସନର ସାଧାରଣ ସମ୍ପାଦକ ରବି ସରାଫ କହିଛନ୍ତି ଯେ, ଗତ କିଛି ବର୍ଷ ମଧ୍ୟରେ ନିବେଶକଙ୍କ ପାଇଁ ସୁନା ସବୁଠାରୁ ସୁରକ୍ଷିତ ନିବେଶ ବୋଲି ପ୍ରମାଣିତ ହୋଇଛି । ପ୍ରତିବର୍ଷ ଲୋକମାନେ ସୁନାରେ ନିବେଶ କରି ପ୍ରାୟ ୧୦ ରୁ ୧୨ ପ୍ରତିଶତ ରିଟର୍ଣ୍ଣ ପାଉଛନ୍ତି । ଏହି କାରଣରୁ ବଜାରରେ ସୁନାର ଚାହିଦା ବୃଦ୍ଧି ପାଉଛି ।

ସୁନାର ଚାହିଦା କାହିଁକି ବୃଦ୍ଧି ପାଉଛି?
ଏହା ବ୍ୟତୀତ ଚୀନ୍ ସମେତ ଅନ୍ୟାନ୍ୟ ଦେଶର କେନ୍ଦ୍ରୀୟ ବ୍ୟାଙ୍କଗୁଡ଼ିକ ମଧ୍ୟ ସୁନା କିଣୁଛନ୍ତି । ଯାହା ଯୋଗୁଁ ଅନ୍ତର୍ଜାତୀୟ ବଜାର ସହିତ ଘରୋଇ ବଜାରରେ ସୁନା ମୂଲ୍ୟ ବୃଦ୍ଧି ପାଉଛି । ତଥାପି ଭାରତରେ ସୁନାର ଉଚ୍ଚ ମୂଲ୍ୟ ପଛରେ ଏକ ପ୍ରମୁଖ କାରଣ ହେଉଛି ଡଲାର ତୁଳନାରେ ଟଙ୍କାର କ୍ରମାଗତ ଦୁର୍ବଳତା ।

୨୪ ଦିନରେ ସୁନା ୪୨୫୦ ଟଙ୍କା ମହଙ୍ଗା:
ତଥ୍ୟ ଅନୁଯାୟୀ, ୧ ଜାନୁଆରୀ ୨୦୨୫ରେ ୨୪ କ୍ୟାରେଟ୍ ସୁନାର ମୂଲ୍ୟ ପ୍ରତି ୧୦ ଗ୍ରାମ ୭୮୦୦୦ ଟଙ୍କା ଥିଲା । ଯାହା ଜାନୁଆରୀ ୨୪ ତାରିଖରେ ପ୍ରତି ୧୦ ଗ୍ରାମ ପିଛା ୮୨୨୫୦ ଟଙ୍କାକୁ ବୃଦ୍ଧି ପାଇଛି । ଯଦି ଏହି ଦୃଷ୍ଟିକୋଣରୁ ଦେଖାଯାଏ ତେବେ ପ୍ରାୟ ୨୪ ଦିନ ମଧ୍ୟରେ ସୁନା ୧୦ ଗ୍ରାମ ପିଛା ୪୨୫୦ ଟଙ୍କା ମହଙ୍ଗା ହୋଇଛି ।

ମୂଲ୍ୟ ୯୦ ହଜାର ଟଙ୍କା ପର୍ଯ୍ୟନ୍ତ ପହଞ୍ଚିପାରେ:
ରବି କହିଛନ୍ତି ଯେ, ଜୁନ୍ ୨୦୨୫ ସୁଦ୍ଧା ସୁନା ପ୍ରତି ୧୦ ଗ୍ରାମ ୮୫ ହଜାର ଟଙ୍କାରେ ପହଞ୍ଚିପାରେ । ଡିସେମ୍ବର ମାସରେ ଏହାର ମୂଲ୍ୟ ୯୦ ହଜାର ଟଙ୍କାରେ ପହଞ୍ଚିବ ବୋଲି ଆଶା କରାଯାଉଛି । ପୂର୍ବ ବର୍ଷଗୁଡ଼ିକର ତୁଳନାତ୍ମକ ଅଧ୍ୟୟନ ଆଧାରରେ ଏହି ଆକଳନ କରାଯାଇଛି ।