ଆଜିଠୁ ଭାରତ- ଇଂଲଣ୍ଡ ତୃତୀୟ ଟେଷ୍ଟ: ବିରାଟଙ୍କ ଉପରେ ସମସ୍ତଙ୍କ ନଜର, ବ୍ୟାଟିଂ ବିଫଳତା ଦୂର କରିବ ଘରୋଇ ଦଳ
ଲିଡ୍ସ (ହେଡିଙ୍ଗଲେ): ବୁଧବାରଠୁ ଘରୋଇ ଇଂଲଣ୍ଡ ଓ ଭାରତ ମଧ୍ୟରେ ଆରମ୍ଭ ହେବ ତୃତୀୟ ଟେଷ୍ଟ । ଐତିହାସିକ ଲର୍ଡ୍ସ ଗ୍ରାଉଣ୍ଡରେ ଅନୁଷ୍ଠିତ ଚଳିତ ଟେଷ୍ଟ କ୍ରିକେଟ ସିରିଜର ଦ୍ୱିତୀୟ ମ୍ୟାଚରେ ଇଂଲଣ୍ଡକୁ ୧୫୧ ରନରେ ପରାସ୍ତ କରି ୧-୦ରେ ଆଗୁଆ ଥିବା ଭାରତ ବୁଧବାର ଠାରୁ ଆରମ୍ଭ ହେବାକୁ ଯାଉଥିବା ଇଂଲଣ୍ଡ ବିପକ୍ଷ ତୃତୀୟ ଟେଷ୍ଟରେ ଅନୁରୂପ ସଫଳତା ଦୋହରାଇବା ଲକ୍ଷ୍ୟରେ ରହିଛି । ତେବେ ସମସ୍ତଙ୍କ ନଜର ଅଧିନାୟକ ବିରାଟ କୋହଲିଙ୍କ ଉପରେ ରହିଛି । କାରଣ ଗତ ଦୁଇ ବର୍ଷଧରି ସେ କୌଣସି ଫର୍ମାଟରେ ଶତକ ଅର୍ଜନ କରି ପାରି ନ ଥିବା ବେଳେ ଚଳିତ ଇଂଲଣ୍ଡ ବିପକ୍ଷ ସିରିଜରେ ମଧ୍ୟ ଅତି ନିମ୍ନମାନର ବ୍ୟାଟିଂ କରି ଆସୁଛନ୍ତି । ଦଳର ମିଡିଲ ଅର୍ଡର ବ୍ୟାଟିଂ ତାଙ୍କ ଉପରେ ନିର୍ଭର କରୁଥିବା ବେଳେ ସେ କୌଣସି ଇଂନିସରେ ୫୦ ରନ ଛୁଇଁବା ସମ୍ଭବ ହୋଇ ପାରିନାହାନ୍ତି । ତେଣୁ ତାଙ୍କର ବିଫଳତା ଦଳର ଅନ୍ୟ ବ୍ୟାଟ୍ସମ୍ୟାନଙ୍କ ଉପରେ ବଡ ପ୍ରଭାବ ପକାଉଛି । ତେଣୁ ତୃତୀୟ ଟେଷ୍ଟରେ ତାଙ୍କଠାରୁ ଏକ ବଡ ଇଂନିସ ଆଶା କରାଯାଏ ।
ସେହିପରି ଦୁଇ ଓପନର ରୋହିତ ଓ ରାହୁଲ ପୂର୍ବ ଦୁଇ ଟେଷ୍ଟ ପରି ତୃତୀୟ ଟେଷ୍ଟରେ ନିଜର ସଫଳତା ଦୋହରାଇବା ଏକାନ୍ତ ଜରୁରି । ନଚେତ ଭାରତର ରନ ସଂଗ୍ରହ ଉପରେ କପ୍ରଭାବ ପଡିବ । ଅନ୍ୟ ପକ୍ଷରେ ପୁରୁଖା ବ୍ୟାଟ୍ସମ୍ୟାନ ଚେତେଶ୍ୱର ପୂଜାରା ଓ ଉପ- ଅଧିନାୟକ ଅଜିଙ୍କ୍ୟ ରାହାଣେ ମଧ୍ୟ ଗତ ଦୁଇ ଟେଷ୍ଟରେ ଆଶାନୁରୂପ ପ୍ରଦର୍ଶନ କରି ପାରି ନାହାନ୍ତି । ପ୍ରଥମ ଟେଷ୍ଟ ଅପେକ୍ଷା ଦ୍ୱିତୀୟ ଟେଷ୍ଟରେ ପୂଜାରା ସାମନ୍ୟ ଭଲ ଖେଳିଥିଲେ ହେଁ ତାଙ୍କ ଠାରୁ ଆହୁରି ଅଧିକ ଭଲ ଆଶା କରାଯାଏ । ଭାରତୀୟ ପେସ୍ ବୋଲରଙ୍କ ସଫଳତା ବଳରେ ଭାରତ ପ୍ରଥମ ଓ ଦ୍ୱିତୀୟ ଟେଷ୍ଟରେ ଜୋରଦାର ଲଢ଼େଇ କରିବା ସହିତ ଦ୍ୱିତୀୟ ଟେଷ୍ଟରେ ବିଜୟୀ ହୋଇ ପାରିଥିଲା । ତେଣୁ ତୃତୀୟ ଟେଷ୍ଟରେ ମଧ୍ୟ ସେମାନଙ୍କ ଠାରୁ ଅନୁରୂପ ସଫଳତା ଆଶା କରା ଯାଉଥିବା ବେଳେ ରବିନ୍ଦ୍ର ଜାଡେଜାଙ୍କ ସ୍ଥାନରେ ରବିଚନ୍ଦ୍ରନ ଅଶ୍ୱିନୀ ଖେଳିବା ସମ୍ଭାବନା ରହିଛି । ତେବେ ଚୂଡାନ୍ତ ଭାରତୀୟ ଦଳ ଗଠନ ନେଇ କୌଣସି ସୂଚନା ମିଳିନି । ରବିନ୍ଦ୍ର ଜାଡେଜାଙ୍କ ପ୍ରଦର୍ଶନ ସନ୍ତୋଷ ଜନକ ଥିବା ଦୃଷ୍ଟିରୁ ତାଙ୍କୁ ପରିବର୍ତ୍ତନ କରାଯିବା ନେଇ କୌଣସି ନିଷ୍ପତ୍ତି ହୋଇନି ।
ଅନ୍ୟ ପକ୍ଷରେ ଭାରତୀୟ ଦଳର ଅନ୍ୟତମ ପେସ୍ ବୋଲର ଶାର୍ଦ୍ଦୁଳ ଠାକୁର ସମ୍ପୂର୍ଣ୍ଣ ସୁସ୍ଥ ହୋଇ ଥିଲେ ହେଁ ପ୍ରଥମ ଓ ଦ୍ୱିତୀୟ ଟେଷ୍ଟ ଖେଳିଥିବା ମହମଦ ସାମି ,ଯଶପ୍ରୀତ ବୁମରା ,ମହମଦ ସିରାଜ ଓ ଇଶାନ୍ତ ଶର୍ମାଙ୍କୁ ନେଇ ତୃତୀୟ ଖେଳିବାକୁ କୋହଲି ଓ ଦଳର ମ୍ୟାନେଜମେଣ୍ଟ ଚାହୁଁଛନ୍ତି । ତେଣୁ ଶାର୍ଦ୍ଦୁଳ ଠାକୁର ତୃତୀୟ ଟେଷ୍ଟ ଖେଳିବା ସମ୍ଭାବନା ନାହିଁ । ସେହିପରି ରବିଚନ୍ଦ୍ରନ ଅଶ୍ୱିନୀ ଖେଳିବା ସୁଯୋଗ ପାଇବେ ନାହିଁ ବୋଲି ଜଣା ପଡିଛି ।
ଇଂଲଣ୍ଡ ଦଳ ପାଇଁ ଅନେକ ସମସ୍ୟା ରହିଥିବା ବେଳେ ପ୍ରଥମ ଓ ଦ୍ୱିତୀୟ ଟେଷ୍ଟ ଖେଳିଥିବା ଦଳରେ ସାମନ୍ୟ ପରିବର୍ତ୍ତନ କରାଯିବା ସହିତ କେତେକ ନୂଆ ଖେଳାଳିଙ୍କୁ ତୃତୀୟ ଟେଷ୍ଟ ପାଇଁ ଦଳରେ ସାମିଲ କରା ଯାଇଛି ।ଏଥି ସହିତ ନିଜର ବ୍ୟାଟିଂ ବିଫଳତା ଦୂର କରିବ ଇଂଲଣ୍ଡ ଟିମ୍।