ବାତିଲ ହେବକି ଆଇପିଏଲ !

ନୂଆ ଦିଲ୍ଲୀ, ୨୬/୦୪: ଭାରତରେ ବଢୁଥିବା କରୋନା ସଂଙ୍କଟ ମଧ୍ୟରେ ଆଇପିଏଲର ବାୟୋ ବବଲ ବି ଖେଳାଳୀମାନଙ୍କ ପାଇଁ ଚିନ୍ତାର ବିଷୟ ପାଲଟିଛି । ଭାରତର ଅନୁଭବୀ ଅଫସ୍ପିନର ରବିଚନ୍ଦ୍ରନ ଅଶ୍ୱିନଙ୍କ ଛଡା କିଛି ଅଷ୍ଟ୍ରେଲିଆ ଖେଳାଳୀ ମ୍ୟାଚ ଛାଡିଛନ୍ତି । ସେପଟେ କିନ୍ତୁ ବିସିସିଆଇ କହିଛି ଖେଳ ଜାରି ରହିବ ।
ଦିଲ୍ଲୀ କ୍ୟାପିଟାଲ୍ସର ଆର ଅଶ୍ୱିନ ସନରାଇଜର୍ସ ହାଇଦ୍ରାବାଦର ବିପକ୍ଷରେ ମ୍ୟାଚ ଜିତିବା ପରେ ଏକ ଟ୍ୱିଟ କରି କହିଥିଲେ, “ ମୁଁ ଆଇପିଏଲରୁ ବ୍ରେକ ନେଉଛି । ମୋ ପରିବାର ଏବେ କରୋନା ମହାମାରୀଠାରୁ ଲଢୁଛି ଏବଂ ଏହି କଠିନ ସମୟରେ ମୋ ପରିବାରକୁ ମୋର ଦରକାର ଅଛି, ଯଦି ସବୁକିଛି ଠିକ ହୋଇଯାଏ ତେବେ ମୁଁ ମ୍ୟାଚକୁ ଫେରିବି, ଧନ୍ୟବାଦ ଦିଲ୍ଲୀ କ୍ୟାପିଟାଲ୍ସ” । କୁହାଯାଉଛି ତାଙ୍କର କେହି ପରିବାର ସଦସ୍ୟ କରୋନା ପଜିଟିଭ ହୋଇଛନ୍ତି ।
ଅଷ୍ଟ୍ରେଲିଆ ଏବଂ ରାଜସ୍ଥାନ ରୟାଲ୍ସର ଦ୍ରୁତ ବୋଲର ଆଣ୍ଡ୍ରିୟୁ ଟାଇ ଭାରତରେ ବଢୁଥିବା କରୋନା ମାମଲା କାରଣରୁ ନିଜ ଦେଶରେ ନିଷେଧ ହେବା ଆଶଙ୍କା ଯୋଗୁଁ ମଝିରୁ ହିଁ ଆଇପିଏଲ ଛାଡିଛନ୍ତି । ସେହିଭଳି ରୟାଲ ଚାଲେଞ୍ଜର୍ସ ବାଙ୍ଗାଲୋରର କେନ୍ ରିଚାର୍ଡସନ ଏବଂ ଏଡମ ଜାମ୍ପା ବ୍ୟକ୍ତିଗତ କାରଣରୁ ମ୍ୟାଚ ଛାଡିଛନ୍ତି ।
ଆଣ୍ଡ୍ରିୟୁ ଟାଇ କହିଛନ୍ତି ଯେ ତାଙ୍କ ହୋମଟାଉନ ପର୍ଥରେ ଭାରତରୁ ଯାଉଥିବା ଲୋକଙ୍କୁ ଆଇସୋଲେସନ କରାଯାଉଥିବା ମାମଲା ବଢୁଥିବା କାରଣରୁ ସେ ଏହି ନିଷ୍ପତ୍ତି ନେଇଛନ୍ତି। ଟାଇ ଏପର୍ୟ୍ୟନ୍ତ ରୟାଲ୍ସ ପାଇଁ ଗୋଟିଏ ବି ମ୍ୟାଚ୍ ଖେଳି ନାହାଁନ୍ତି ଏବଂ ତାଙ୍କୁ ଏକ କୋଟି ଟଙ୍କାରେ କିଣାଯାଇଛି ।
ଟାଇ ସୋମବାର ଦିନ ଦୋହାରୁ ‘ସେନ ରେଡିଓ’କୁ କହିଛନ୍ତି, “ଏହାର ଅନେକ କାରଣ ଅଛି, କିନ୍ତୁ ଏହାର ମୁଖ୍ୟ କାରଣ ହେଉଛି ପର୍ଥରେ ଭାରତରୁ ଫେରୁଥିବା ଲୋକଙ୍କ ହୋଟେଲରେ ଆଇସୋଲେସନ ସଂଖ୍ୟା ବୃଦ୍ଧି ପାଇଛି। ପଶ୍ଚିମ ଅଷ୍ଟ୍ରେଲିଆରେ ପ୍ରବେଶ କରୁଥିବା ଲୋକଙ୍କ ସଂଖ୍ୟାକୁ ହ୍ରାସ କରିବାକୁ ପର୍ଥ ସରକାର ଚେଷ୍ଟା କରୁଛନ୍ତି। ”
ସେ କହିଛନ୍ତି ଯେ ବବଲରେ ରହିବାର ଥକ୍କା ମଧ୍ୟ ଏକ କାରଣ । ସେ କହିଛନ୍ତି, “ମୁଁ ଭାବିଲି ଯେ ଦେଶରେ ପ୍ରବେଶ କରିବା ଅନୁମତି ନମିଳୁ ଏହା ପୂର୍ବରୁ ଯିବା ଉଚିତ୍। ବବଲରେ ଦୀର୍ଘ ସମୟ ବିତାଇବା ଅତ୍ୟନ୍ତ କ୍ଲାନ୍ତକାରୀ । ଅଗଷ୍ଟ ଠାରୁ, ମୁଁ ମାତ୍ର ୧୧ ଦିନ ପାଇଁ ବବଲରୁ ବାହାରେ ରହିଛି ଏବଂ ବର୍ତ୍ତମାନ ମୁଁ ଘରକୁ ଯିବାକୁ ଚାହୁଁଛି ।”
ଜଣେ ଅଧିକାରୀଙ୍କ ସୂଚନା ଅନୁସାରେ ଲିଗ୍ ଜାରି ରହିବ ବୋଲି ବିସିସିଆଇ କହିଛି । ଯଦି କେହି ବିଦାୟ ନେବାକୁ ଚାହାଁନ୍ତି, ତା’ହେଲେ ଏଥିରେ କେଯଣସି ଅସୁବିଧା ନାହିଁ। “ଅନ୍ୟପକ୍ଷରେ ଆରସିବି ଏକ ବିବୃତ୍ତିରେ କହିଛି ଯେ ଏଡମ ଜାମ୍ପା ଏବଂ କେନ୍ ରିଚାର୍ଡସନ ବ୍ୟକ୍ତିଗତ କାରଣରୁ ଘରକୁ ଫେରୁଛନ୍ତି ଏବଂ ବାକି ମ୍ୟାଚ୍ ଖେଳିବେ ନାହିଁ। ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ତାଙ୍କ ସହିତ ସଂପୂର୍ଣ୍ଣ ଭାବେ ଅଛନ୍ତି ଏବଂ ଯଥାସମ୍ଭବ ସମସ୍ତ ପ୍ରକାରରେ ସାହାଯ୍ୟ କରୁଛନ୍ତି। ବାଙ୍ଗାଲୋର ଲେଗ ସ୍ପିନର ଜାମ୍ପାଙ୍କୁ ଦେଢ କୋଟି ଏବଂ ରିଚାର୍ଡସନଙ୍କୁ ୪ କୋଟିରେ କିଣିଥିଲା ।
ବ୍ରିଟେନ ଏବଂ ନ୍ୟୁଜିଲ୍ୟାଣ୍ଡ ସମେତ ଅନେକ ଦେଶ ଭାରତରୁ ଯାତ୍ରା ଉପରେ ପ୍ରତିବନ୍ଧକ ଲଗାଇଛନ୍ତି। ଅଷ୍ଟ୍ରେଲିଆ ମଧ୍ୟ ବିମାନକୁ ୩୦ ପ୍ରତିଶତ ହ୍ରାସ କରିଛି ଏବଂ ଗତ କିଛି ଦିନରୁ ଭାରତରେ ଦୈନିକ ତିନି ଲକ୍ଷ ମାମଲା ଆସୁଥିବାରୁ ଅଧିକ ନିଷେଧାଦେଶ ହେବାର ସମ୍ଭାବନା ରହିଛି। ଭାରତ ବର୍ତ୍ତମାନ ଅକ୍ସିଜେନର ଅଭାବ ଏବଂ କିଛି ଅତ୍ୟାବଶ୍ୟକ େଓøଷଧ ସହିତ ସଂଘର୍ଷ କରୁଛି। ଏହାପୂର୍ବରୁ ରୟାଲ୍ସର ଲିଆମ୍ ଲିଭିଙ୍ଗଷ୍ଟୋନ୍ ମଧ୍ୟ ଯାତ୍ରା ନିଷେଧାଦେଶ ଲାଗୁ ହେବା ପୂର୍ବରୁ ବ୍ରିଟେନକୁ ଫେରିଥିଲେ।
କ୍ରିକେଟ୍ ଅଷ୍ଟ୍ରେଲିଆ ଏବଂ ଅଷ୍ଟ୍ରେଲୀୟ କ୍ରିକେଟ୍ ଆସୋସିଏସନ୍ ମିଳିତ ବିବୃତ୍ତିରେ କହିଛନ୍ତି ଯେ ସେମାନେ ଆଇପିଏଲରେ ଜଡିତ କ୍ରିକେଟ୍, କୋଚ୍ ଏବଂ ସମୀକ୍ଷକଙ୍କ ସହ ଯୋଗାଯୋଗରେ ଅଛନ୍ତି ଏବଂ ପରିସ୍ଥିତି ଉପରେ ନଜର ରଖିଛନ୍ତି। ଇଂଲଣ୍ଡ ଏବଂ ୱେଲ୍ସ କ୍ରିକେଟ୍ ବୋର୍ଡର ମୁଖପାତ୍ର କହିଛନ୍ତି ଯେ “ଆମେ ଆମର ଖେଳାଳିଙ୍କ ସହ ନିରନ୍ତର ଯୋଗାଯୋଗରେ ଅଛୁ। ଏହି କଷ୍ଟ ସମୟରେ ଭାରତର ଲୋକଙ୍କ ସହ ଆମର ସମବେଦନା ରହିଛି ।”

ଏହାରି ମଧ୍ୟରେ କୋଲକାତା ନାଇଟ୍ ରାଇଡର୍ସର ପରାମର୍ଶଦାତା ଡେଭିଡ ହୁସେ କହିଛନ୍ତି ଯେ ଆଇପିଏଲର କିଛି ଅଷ୍ଟ୍ରେଲୀୟ ଖେଳାଳି ଭାରତରେ କରୋନା ମାମଲା ବଢୁଥିବାରୁ ସେମାନେ କିପରି ଘରକୁ ଫେରିବେ ସେନେଇ ଚିନ୍ତିତ ଅଛନ୍ତି। ଅଷ୍ଟ୍ରେଲିଆର ପୂର୍ବତନ କ୍ରିକେଟର ହୁସେ ‘ସିଡନୀ ମର୍ନିଂ ହେରାଲ୍ଡ’କୁ କହିଛନ୍ତି ଯେ ଅଷ୍ଟ୍ରେଲିଆ କିପରି ଫେରିବ ସେ ନେଇ ସମସ୍ତେ ଟିକେ ଚିନ୍ତିତ ଅଛନ୍ତି। ହୁସେ କହିଛନ୍ତି ଯେ ଆଇପିଏଲ ପାଇଁ ଏକ ଶକ୍ତିଶାଳୀ ବାୟୋ ବବଲ ତିଆରି କରାଯାଇଛି, କିନ୍ତୁ ଭାରତର ସାମ୍ପ୍ରତିକ ପରିସ୍ଥିତିକୁ ନେଇ ଖେଳାଳିମାନେ ଚିନ୍ତିତ ହେବା ସ୍ୱାଭାବିକ।
ଜୁନ୍ ୨ ରୁ ଇଂଲଣ୍ଡ ବିପକ୍ଷ ଟେଷ୍ଟ ସିରିଜ୍ ଖେଳିବା ପାଇଁ କେନ୍ ୱିଲିୟମ୍ସନ୍ ଏବଂ ଟ୍ରେଣ୍ଟ ବୋଲ୍ଟଙ୍କ ସମେତ ନ୍ୟୁଜିଲାଣ୍ଡର ଖେଳାଳିଙ୍କୁ ମଧ୍ୟଭାଗରେ ରହିବାକୁ ପଡ଼ିବ। ୩୦ ମଇରେ ଅହମ୍ମଦାବାଦରେ ଆଇପିଏଲ୍ ଫାଇନାଲ୍ ଅନୁଷ୍ଠିତ ହେବ । ଟୁର୍ଣ୍ଣାମେଣ୍ଟ ସମାପ୍ତ ହେବା ପରେ ଅଷ୍ଟ୍ରେଲିଆ ତାର ଖେଳାଳିଙ୍କ ପାଇଁ ଏକ ଚାର୍ଟାର୍ଡ ବିମାନର ବ୍ୟବସ୍ଥା କରିବ । ଅଷ୍ଟ୍ରେଲିଆର ୧୪ ଖେଳାଳି ବର୍ତ୍ତମାନ ଲିଗରେ ଅଛନ୍ତି । ସେମାନଙ୍କ ବ୍ୟତୀତ କୋଚ୍ ରିକି ପଣ୍ଟିଂ ଏବଂ ସାଇମନ୍ କ୍ୟାଟିଚ୍, ସମୀକ୍ଷକ ମାଥ୍ୟୁ ହେଡେନ୍, ବ୍ରେଟ୍ ଲି, ମାଇକେଲ୍ ସ୍ଲେଟର ଏବଂ ଲିସା ଷ୍ଟାଲକର ମଧ୍ୟ ଏଠାରେ ଅଛନ୍ତି।