ଓମିକ୍ରନଠାରୁ କେତେ ପ୍ରତିଶତ ରକ୍ଷା କରିବ କୋଭିଶିଲ୍ଡର ବୁଷ୍ଟର ଡୋଜ୍? ଜାଣନ୍ତୁ କ’ଣ କହୁଛି ରିସର୍ଚ୍ଚ
ନୂଆଦିଲ୍ଲୀ: କରୋନାର ନୂଆ ଭାରିଆଣ୍ଟ ଓମିକ୍ରନ ଟିକା ନେଇଥିବା ଲୋକଙ୍କୁ ସଂକ୍ରମିତ କରୁଛି । ଲୋକମାନଙ୍କର ଇମ୍ୟୁନିଟି ବଢ଼ାଇବାକୁ ତୃତୀୟ ବୁଷ୍ଟର ଡୋଜ୍ ନେବାକୁ ଯୁକ୍ତି ଚାଲିଛି । ଏହାରି ମଧ୍ୟରେ ୟୁକେ ହେଲଥ୍ ସିକ୍ୟୁରିଟି ଏଜେନ୍ସି ବା UKHSA ଶୁକ୍ରବାର ଦିନ କହିଛନ୍ତି ଯେ, କୋଭିଡ ଭ୍ୟାକ୍ସିନର ତୃତୀୟ ବୁଷ୍ଟ ଡୋଜ୍ ଓମିକ୍ରନ ଭାରିଆଣ୍ଟର ବିରୋଧରେ ୭୦ରୁ ୭୫ ପ୍ରତିଶତ ସୁରକ୍ଷା ପ୍ରଦାନ କରିପାରିବ ।
ହେଲ୍ଥ ଏଜେନ୍ସି କହିଛି ଯେ, ଭାରତରେ କୋଭିଶିଲ୍ଡ ନାଁରେ ବ୍ୟବହାର କରାଯାଉଥିବା ଅକ୍ସୋଫୋର୍ଡ/ ଆଷ୍ଟ୍ରା ଜେନେକା ଓ ଫାଇଜର/ବାୟୋଏଣ୍ଡଟେକ ଟିକାର ୨ଟି ଡୋଜ୍ କୋଭିଡର ଡେଲ୍ଟା ଭାରିଆଣ୍ଟ ତୁଳନାରେ ଓମିକ୍ରନ ବିରୋଷର କମ୍ ସୁରକ୍ଷା ପ୍ରଦାନ କରୁଛି । କିନ୍ତୁ ଟିକାର ତୃତୀୟ ବୁଷ୍ଟର ଡୋଜ୍ ନୂଆ ଭାରିଆଣ୍ଟ ବିରୋଧରେ ଇମ୍ୟୁନିଟି ବଢ଼ାଇପାରିବ । ଏହି ଦାବିଗୁଡ଼ିକ ୫୮୧ ଓମିକ୍ରନ ସଂକ୍ରମିତ ମାମଲାର ତଥ୍ୟ ବିଶ୍ଲେଷିତ ଉପରେ ଆଧାରିତ ହୋଇଛି ।
UKHSA ଅନୁସାରେ, ‘ଯଦି ବର୍ତ୍ତମାନର ପରିସ୍ଥିତିରେ କୌଣସି ପରିବର୍ତ୍ତନ ନଆସେ, ତେବେ ବ୍ରିଟେନରେ ସଂକ୍ରମଣ ମାମଲା ଏହି ମାସରେ ୧୦ ଲକ୍ଷ ଟପିବାର ଅନୁମାନ କରାଯାଉଛି । କରୋନାର ନୂଆ ଭାରିଆଣ୍ଟ ବିରୋଧରେ ବୁଷ୍ଟର ଡୋଜ୍ ପ୍ରାରମ୍ଭିକ ପର୍ଯ୍ୟାୟରେ ଅଧିକ ପ୍ରଭାବଶାଳୀ ଓ ଏହା ପ୍ରାୟ ୭୦ରୁ ୭୫ ପ୍ରତିଶତ ପର୍ଯ୍ୟନ୍ତ ସୁରକ୍ଷା ପ୍ରଦାନ କରିପାରେ । ଏହି ସଂଖ୍ୟାଗୁଡିକ ସମ୍ପୂର୍ଣ୍ଣ ନୂଆ ହୋଇଥିବାରୁ ଆକଳନରେ ପରିବର୍ତ୍ତନ ହେବାର ସମ୍ଭାବନା ରହିଛି ।’
