ବ୍ରହ୍ମାସ୍ତ୍ର ସବୁଠାରୁ ଶକ୍ତିଶାଳୀ ଅସ୍ତ୍ର ନୁହେଁ, ଏହାଠାରୁ ଭୟଙ୍କର ବିନାଶକାରୀ ଅସ୍ତ୍ର ପ୍ରାଚୀନ କାଳରେ ଥିଲା
ପ୍ରାଚୀନ କାଳରେ ହିନ୍ଦୁ ଶାସ୍ତ୍ରରେ ବ୍ରହ୍ମାସ୍ତ୍ରକୁ ସବୁଠାରୁ ବିନାଶକାରୀ ଅସ୍ତ୍ର ଭାବେ ବିବେଚନା କରାଯାଇଛି । ଏହି ଅସ୍ତ୍ରର ପ୍ରୟୋଗ ଦ୍ୱାରା ବିଶ୍ୱରେ ପ୍ରକମ୍ପ ସୃଷ୍ଟି ହେଉଥିଲା । ରାମାୟଣ ଓ ମହାଭାରତରେ ଦେବତା ଓ ରାକ୍ଷସମାନେ ଏହାକୁ ପ୍ରୟୋଗ କରୁଥିଲେ । ତେବେ ଅନେକ ଏକଥା ଜାଣିନଥିବେ, ବ୍ରହ୍ମାସ୍ତ୍ରଠାରୁ ବହୁ ଘାତକ ଅସ୍ତ୍ର ପ୍ରାଚୀନ କାଳରେ ରହିଥିଲା ।
ବ୍ରହ୍ମଶୀର୍ଷ ଅସ୍ତ୍ର ସ୍ୱୟଂ ବ୍ରହ୍ମାଙ୍କର ଶିର ଓ ମୁଖ ପ୍ରଦର୍ଶିତ କରିଥାଏ । ଏହା ବ୍ରହ୍ମାସ୍ତ୍ରଠାରୁ ୪ ଗୁଣ ଅଧିକ ଶକ୍ତିଶାଳୀ ଥିଲା । କୁହାଯାଏ ବ୍ରହ୍ମାସ୍ତ୍ର ପରମାଣୁ ବୋମା ହେଲେ ବ୍ରହ୍ମଶୀର୍ଷ ଅସ୍ତ୍ର ହାଇଡ୍ରୋଜେନ ବମ୍ ଅଟେ । ସବୁଆଡ଼ୁ ବିଫଳ ହେବା ପରେ ମହାଭାରତରେ ଅଶ୍ୱତ୍ଥମା ଉତ୍ତରାଙ୍କ ଗର୍ଭ ନଷ୍ଟ କରିବା ଉଦ୍ଦେଶ୍ୟରେ ଏହାକୁ ପ୍ରୟୋଗ କରିଥିଲେ । ମାତ୍ର ସେ ଏହାକୁ ଫେରାଇ ନେବାର ଜ୍ଞାନ ପ୍ରାପ୍ତ କରିନଥିଲେ ।
ବ୍ରହ୍ମଦଣ୍ଡ ଅସ୍ତ୍ର ଅର୍ଜୁନ କର୍ଣ୍ଣଙ୍କ ଉପରେ ପ୍ରୟୋଗ କରିଥିଲେ । ଏହି ଅସ୍ତ୍ର ୧୪ଟି ଆକାଶଗଙ୍ଗାକୁ ନଷ୍ଟ କରିବାର କ୍ଷମତା ରଖିଥିଲା । ଭଗବାନ ବିଷ୍ଣୁଙ୍କ ଅସ୍ତ୍ର ନାରାୟଣ ଅସ୍ତ୍ର ଏକ ବିନାଶକାରୀ ଅସ୍ତ୍ର । ଥରେ ଏହି ଅସ୍ତ୍ର ପ୍ରୟୋଗ ହେଲା ପରେ ଏହାକୁ କୌଣସି ଶକ୍ତି ରୋକିବାରେ ସମର୍ଥ ହେବ ନାହିଁ । ଏହା ଶତ୍ରୁକୁ ବଧ କରି ହିଁ ଫେରିଥାଏ ।
ବ୍ରହ୍ମାସ୍ତ୍ରଠାରୁ ଶକ୍ତିଶାଳୀ ବୈଷ୍ଣବାସ୍ତ୍ର, ବୈଷ୍ଣବାସ୍ତ୍ରଠାରୁ ଶକ୍ତିଶାଳୀ ପାଶୁପତାସ୍ତ୍ର । ବିଷ୍ଣୁଚକ୍ର, ବଜ୍ରାସ୍ତ୍ର, ନାରାୟଣାସ୍ତ୍ର, ପାଶୁପତାସ୍ତ୍ରକୁ ଅଧିକ ଶକ୍ତିଶାଳୀ ଅସ୍ତ୍ର ଭାବେ ଗଣାଯାଏ । ସେହିପରି ଆଗ୍ନେୟାସ୍ତ୍ର, ବରୁଣାସ୍ତ୍ର, ନାଗାସ୍ତ୍ର, ନାଗପାଶାସ୍ତ୍ର ଶତ୍ରୁପକ୍ଷରୁ ବହୁତ କ୍ଷତି ଘଟାଇବାରେ ସକ୍ଷମ ଥା’ନ୍ତି ।
ଭାର୍ଗବାସ୍ତ୍ର ପର୍ଶୁରାମ କର୍ଣ୍ଣଙ୍କୁ ଦେଇଥିଲେ । ଏହି ଭୟଙ୍କର ଅସ୍ତ୍ର ଗୋଟିଏ ଝଟକାରେ ପାଣ୍ଡବ ପକ୍ଷର ଅନେକ ସେନାକୁ ନିପାତ କରିଦେଇଥିଲା । ଯଦି ଏହାକୁ ରୋକା ନଯାଏ ତେବେ ଏହା ଗୋଟିଏ ଗ୍ରହକୁ ମଧ୍ୟ ନଷ୍ଟ କରିଦେଇପାରେ । ଗୋଟିଏ ବ୍ରହ୍ମାସ୍ତ୍ର ପ୍ରୟୋଗ କଲେ ଏହା ୧୦ ହଜାର ସୂର୍ଯ୍ୟର ଗରମ ସହ ସମାନ ହୋଇଥାଏ । ଏଥିସହିତ ସୂର୍ଯ୍ୟ, ବର୍ଷା ବନ୍ଦ ହେବା ସହ ପୁରୁଷ, ମହିଳାଙ୍କୁ ଏହା ନପୁଂସକ କରିଦେଇଥାଏ । ବ୍ରହ୍ମାଡାସ୍ତ୍ର ଅସ୍ତ୍ର ପ୍ରୟୋଗ ହେଲେ ସମ୍ପୂର୍ଣ୍ଣ ବ୍ରହ୍ମାଣ୍ଡକୁ ନଷ୍ଟ ହୋଇଯିବ ।
