ଗଭର୍ଣ୍ଣର ଶକ୍ତିକାନ୍ତ ଦାସ- ଅର୍ଥମନ୍ତ୍ରୀ ସୀତାରମଣ ଶୀଘ୍ର ଦିଅନ୍ତୁ ଇସ୍ତଫା : RBIକୁ ମିଳିଲା ୧୧ ଟି ସ୍ଥାନରେ ବୋମା ରଖିବାର ଧମକ
ମୁମ୍ବାଇ: ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ କାର୍ଯ୍ୟାଳୟରେ ଉତ୍ତେଜନା ଦେଖାଦେଇଛି। ଅନେକ ବ୍ୟାଙ୍କରେ ବୋମା ରଖିବାର ଧମକ ଇମେଲ ମାଧ୍ୟମରେ ଆସିଛି। ଇମେଲର ପ୍ରେରକ ‘ଖିଲାଫତ ଇଣ୍ଡିଆ’ର ବୋଲି ଦାବି କରିଛନ୍ତି। ଏହି ଧମକ ଦାତା ମୁମ୍ବାଇର ମୋଟ ୧୧ ଟି ସ୍ଥାନରେ ବୋମା ରଖିବାର ଧମକ ଦେଇଛନ୍ତି।
RBI କାର୍ଯ୍ୟାଳୟକୁ ଏକ ଧମକପୂର୍ଣ୍ଣ ଇମେଲ ମିଳିଛି ଯେଉଁଥିରେ ଅନେକ ସ୍ଥାନରେ ବୋମା ରଖାଯାଇଛି ବୋଲି ଦାବି କରାଯାଇଛି। ସୂତ୍ରରୁ ପ୍ରକାଶ ଯେ, ଏକ ଇମେଲରେ ଲେଖାଯାଇଛି ଯେ, ଆରବିଆଇ କାର୍ଯ୍ୟାଳୟ, HDFC ବ୍ୟାଙ୍କ ଏବଂ ଆଇସିଆଇସିଆଇ ବ୍ୟାଙ୍କରେ ବୋମା ରଖାଯାଇଛି।
ଇ-ମେଲ ମାଧ୍ୟମରେ ଆରବିଆଇ ଗଭର୍ଣ୍ଣର ଶକ୍ତିକାନ୍ତ ଦାସ ଏବଂ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ଇସ୍ତଫା ଦାବି କରାଯାଇଛି। ମୁମ୍ବାଇର ମୋଟ ୧୧ଟି ସ୍ଥାନରେ ବୋମା ରଖିବାର ଧମକ ଦିଆଯାଇଛି। ଏହି ଇମେଲ ଅନୁଯାୟୀ ଆଜି ରାତି ପ୍ରାୟ ୧.୩୦ ସମୟରେ ଏହି ଖବର ଆସିଥିଲା। ହେଲେ ଏପରି କିଛି ଘଟିନଥିଲା।
ପୋଲିସ ସବୁଆଡେ ଯାଇ ଅନୁସନ୍ଧାନ କରିଥିଲା କିନ୍ତୁ ସେପରି କୌଣସି ସନ୍ଦିଗ୍ଧ ଜିନିଷ ମିଳିନଥିଲା। ଏହି ପରିପ୍ରେକ୍ଷୀରେ, ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।
