ପାହାଡ଼ ଚଢ଼ିବାର ସଉକ ଛଡ଼ାଇ ନେବ ବାପା ହେବାର ଶକ୍ତି! ଷ୍ଟଡୀରୁ ଖୁଲାସା

ଏକ ନୂତନ ଅଧ୍ୟୟନ ଅନୁଯାୟୀ, ଅତି ଉଚ୍ଚତାରେ ଚଢ଼ିବା, ନିଦ୍ରାହୀନତା ଏବଂ ପୁରୁଷଙ୍କ ଅଣ୍ଡକୋଷରେ ଅମ୍ଳଜାନର ଅଭାବ ସୃଷ୍ଟି କରୁଥିବା ଅନ୍ୟାନ୍ୟ ଅବସ୍ଥା ଗତ ୫୦ ବର୍ଷ ମଧ୍ୟରେ ପୁରୁଷଙ୍କ ପ୍ରଜନନ କ୍ଷମତା ହ୍ରାସ ପାଇଁ କାରଣ ହୋଇପାରେ ।

ନେଚର ରିଭ୍ୟୁଜ୍ ୟୁରୋଲୋଜି ପତ୍ରିକାରେ ପ୍ରକାଶିତ ଏକ ରିପୋର୍ଟ ଅନୁଯାୟୀ, କମ ଅମ୍ଳଜାନ ପୁରୁଷଙ୍କ ଶୁକ୍ରାଣୁ ଗୁଣବତ୍ତା ଏବଂ ସାମଗ୍ରିକ ପ୍ରଜନନ ସ୍ୱାସ୍ଥ୍ୟକୁ ପ୍ରଭାବିତ କରିପାରେ, ଯାହା ସୂଚିତ କରେ ଯେ ପୁରୁଷ ପ୍ରଜନନ କ୍ଷମତା ହ୍ରାସ ପାଇଁ ଟେଷ୍ଟିକୁଲାର ହାଇପୋକ୍ସିଆ ଗୁରୁତ୍ୱପୂର୍ଣ୍ଣ ହୋଇପାରେ ।

ପୁରୁଷମାନଙ୍କ ମଧ୍ୟରେ ବନ୍ଧ୍ୟାତ୍ୱର ଅର୍ଥ ହେଉଛି ଏକ ବର୍ଷରୁ ଅଧିକ ସମୟ ଧରି ନିୟମିତ ଅସୁରକ୍ଷିତ ଯୌନ ସମ୍ପର୍କ ରଖିବା ସତ୍ତେ୍ୱ ଗର୍ଭଧାରଣ ନ କରିବା, ଯେତେବେଳେ ଉପ-ବନ୍ଧ୍ୟାତ୍ୱ ଏକ କମ୍ ଗମ୍ଭୀର ଅବସ୍ଥା ଯେଉଁଥିରେ ଗର୍ଭଧାରଣର ସମ୍ଭାବନା ହ୍ରାସ ପାଇଥାଏ ।

ଆର୍ଟିକଲର ଲେଖକ ସୂଚନା ଦେଲେ:
ଏହି ଆର୍ଟିକିଲର ଲେଖକଏବଂ ଅଷ୍ଟ୍ରେଲିଆର ନ୍ୟୁକାସଲ ବିଶ୍ୱବିଦ୍ୟାଳୟର ବରିଷ୍ଠ ଅଧ୍ୟାପକ ଏବଂ ପ୍ରଜନନ ଜୀବବିଜ୍ଞାନୀ ଟେସା ଲର୍ଡ କହିଛନ୍ତି ଯେ, ଟେଷ୍ଟିକୁଲାର ହାଇପୋକ୍ସିଆ କିମ୍ବା ଅଣ୍ଡକୋଷରେ ଅମ୍ଳଜାନର ଅଭାବ ପ୍ରଜନନ ସ୍ୱାସ୍ଥ୍ୟ ପାଇଁ ଏକ ସ୍ଥାୟୀ ବିପଦ ସୃଷ୍ଟି କରିପାରେ, ଯାହା ସ୍ଲିପ୍ ଏପ୍ନିଆ ବା ଭାରିକୋସେଲ ଭଳି କ୍ରୋନିକ ମେଡିକାଲ କଣ୍ଡିସନର କାରଣ ହୋଇଥାଏ ।

ସେ ଆହୁରି ମଧ୍ୟ କହିଛନ୍ତି, ‘ଭାରିକୋସେଲ କିମ୍ବା ଅଣ୍ଡକୋଷରେ ଶିରା ବୃଦ୍ଧି ଏକ ସାଧାରଣ ଅସ୍ୱାଭାବିକତା ଯାହା ପୁରୁଷମାନଙ୍କ ମଧ୍ୟରେ ବନ୍ଧ୍ୟାତ୍ୱ ସୃଷ୍ଟି କରେ ଏବଂ ଗର୍ଭଧାରଣରେ ସମସ୍ୟା ଥିବା ୪୫ ପ୍ରତିଶତ ପୁରୁଷଙ୍କଠାରେ ଏହା ଦେଖାଯାଏ ।’

ସେହିପରି ସ୍ଲିପ୍ ଆପ୍ନିଆ ଏକ ସାଧାରଣ ରୋଗ, ଯେଉଁଥିରେ ଶୋଇବା ସମୟରେ ପବନ ଯାଉଥିବା ରାସ୍ତାର ମାଂସପେଶୀ ସଙ୍କୁଚିତ ହୋଇଯାଏ । ଏହା ବ୍ୟକ୍ତିଙ୍କ ଶ୍ୱାସକ୍ରିୟା ଏବଂ ରକ୍ତ ଅମ୍ଳଜାନ ସ୍ତରକୁ ପ୍ରଭାବିତ କରେ । ଏପରି ମାମଲାରେ ବୃଦ୍ଧି ପାଇଛି, ଯେଉଁଥିରେ ମୋଟାପଣ ମଧ୍ୟ ଏକ ପ୍ରମୁଖ ବିପଦର କାରଣ ।