ଟିମ୍ ଇଣ୍ଡିଆକୁ SCGରେ ମିଳୁନି ଭଲ ଖାଦ୍ୟ: ମଧ୍ୟାହ୍ନ ଭୋଜନକୁ ବଏକଟ୍ କଲେ ଖେଳାଳୀ

ନୂଆଦିଲ୍ଲୀ: ଭାରତୀୟ ଖେଳାଳୀମାନେ ମଙ୍ଗଳବାର ଅପରାହ୍ନରେ ସିଡନୀ କ୍ରିକେଟ ଗ୍ରାଉଣ୍ଡରେ ନିଜର ଅପ୍ସନାଲ ଟ୍ରେନିଂ ସେସନ ପରେ ମଧ୍ୟାହ୍ନ ଭୋଜନକୁ ବଏକଟ୍ ବା ପରିତ୍ୟାଗ କରିଛନ୍ତି । ଖାଇବା ଥଣ୍ଡା ଥିବା ସହ ପର୍ଯ୍ୟାପ୍ତ ନଥିବାରୁ ଖେଳାଳୀମାନେ ଏପରି କରିଥିବା ଜଣାପଡିଛି । ଡ୍ରେସିଂ ରୁମରେ ମେନ୍ୟୁରେ ଫଳ ଓ ‘ମେକ ୟୋର ସାଣ୍ଡୱିଚ୍’ ମିଳିଥିଲା, ଯାହାକି ଅନେକ ଖେଳାଳିଙ୍କୁ ପସନ୍ଦ ଆସିନଥିଲା । ଏନେଇ ସିଡନୀ କ୍ରିକେଟ୍ ଗ୍ରାଉଣ୍ଡରେ ସମ୍ପୃକ୍ତ ଅଧିକାରୀଙ୍କ ନିକଟରେ ଅଭିଯୋଗ କରାଯାଇଥିଲା ।

ଟିମ୍ ଇଣ୍ଡିଆର ଅଧିନାୟକ ରୋହିତ ଶର୍ମା, ବିରାଟ କୋହଲି, ଦୀନେଶ କାର୍ତ୍ତିକ, ଋଷଭ ପନ୍ତ, କେ.ଏଲ୍ ରାହୁଲ, ମହମ୍ମଦ ସିରାଜ, ରବିଚନ୍ଦ୍ରନ୍ ଅଶ୍ୱିନ୍, ଶାର୍ଦ୍ଦୁଲ ଠାକୁର ଏବଂ ଦୀପକ ହୁଡା ଏକ ଅପ୍ସନାଲ ଟ୍ରେନିଂ ସେସନରେ ଭାଗନେଇଥିଲେ । ରବିବାର ମେଲବୋର୍ଣ୍ଣରେ ପାକିସ୍ତାନ ମ୍ୟାଚ୍ ପରେ ଅକ୍ଷର ପଟେଲ, ଭୁବନେଶ୍ୱର କୁମାର, ମହମ୍ମଦ ଶାମି, ହାର୍ଦ୍ଦିକ ପାଣ୍ଡ୍ୟା ଏବଂ ଅର୍ଶଦୀପ ସିଂଙ୍କୁ ଦଳ ପରିଚାଳନା ଦ୍ୱାରା ବିଶ୍ରାମ ଦିଆଯାଇଥିଲା ।

ଜଣେ ଭାରତୀୟ ଦଳର ସଦସ୍ୟ ଇଣ୍ଡିଆନ ଏକ୍ସପ୍ରେସକୁ କହିଛନ୍ତି, “ଖାଦ୍ୟ ମାନକ ଅନୁସାରେ ନଥିଲା । ଟ୍ରେନିଂ ସେସନ ପରେ ଆମେ ସାଣ୍ଡୱିଚ୍ ଖାଇ ପାରିବୁ ନାହିଁ ।’ କିଛି ଖେଳାଳି ପଡ଼ିଆରେ ଫଳ ଖାଇଥିବାବେଳେ ବାକିମାନେ ହୋଟେଲରେ ଖାଇବାକୁ ପସନ୍ଦ କରିଥିଲେ । ଭାରତୀୟ ଦଳ ନେଦରଲ୍ୟାଣ୍ଡ ବିପକ୍ଷ ମ୍ୟାଚ୍ ପୂର୍ବରୁ ବିଶ୍ରାମ ନେବ କାରଣ ଆଇସିସି ଏସସିଜି ଠାରୁ ୪୨ କିଲୋମିଟର ଦୂରରେ ଥିବା ବ୍ଲାକଟାଉନ୍ ଟ୍ରେନିଂ ସେସନ ପାଇଁ ବାଛିଛି ।

ଗୁରୁବାର ୨୭ ଅକ୍ଟୋବରରେ ସିଡନୀ କ୍ରିକେଟ୍ ଗ୍ରାଉଣ୍ଡ (ଏସସିଜି) ଡବଲ୍ ହେଡର୍ ଆୟୋଜନ କରିବ । ଦକ୍ଷିଣ ଆଫ୍ରିକା ଦିନରେ ବାଂଲାଦେଶ ସହ ଖେଳିବ, ତା’ପରେ ସନ୍ଧ୍ୟାରେ ନେଦରଲ୍ୟାଣ୍ଡ ବିପକ୍ଷରେ ଭାରତ ମ୍ୟାଚ୍ ଖେଳିବ । ଆଇସିସି କାର୍ଯ୍ୟସୂଚୀ ଅନୁଯାୟୀ ଦକ୍ଷିଣ ଆଫ୍ରିକା, ବାଂଲାଦେଶ ଏବଂ ନେଦରଲ୍ୟାଣ୍ଡ ବୁଧବାର ଦିନ ଏସସିଜିରେ ଅଭ୍ୟାସ ଅଧିବେଶନ କରିବେ । ଭାରତୀୟ ଦଳ ବ୍ଲାକଟାଉନ୍ ଯିବ ନାହିଁ । ୨୦୨୧ ଅଷ୍ଟ୍ରେଲିଆ ଗସ୍ତ ସମୟରେ ଭାରତୀୟ ଦଳ ଅଲିମ୍ପିକ ପାର୍କରେ ରହିବା ସମୟରେ ବ୍ଲାକଟାଉନରେ କ୍ୟାମ୍ପ କରିଥିଲେ । ତେବେ ମ୍ୟାଚ ପୂର୍ବରୁ ଦଳ ଏତେ ଦୂରତା ଅତିକ୍ରମ କରିବାକୁ ଚାହୁଁନଥିଲା ।