ମଞ୍ଚ ଉପରେ କାନ ଧରି ଉଠବସ ହେଲେ IAS ଅଫିସର; ଓକିଲଙ୍କୁ ମାଗିଲେ କ୍ଷମା, କାହିଁକି ଏପରି କଲେ ସାହେବ, ଦେଖନ୍ତୁ…

ଲକ୍ଷ୍ନୌ: ଉତ୍ତର ପ୍ରଦେଶର ଶାହଜାହାନପୁର ଜିଲ୍ଲାରେ ଏକ ଅନୋଖା ଘଟଣା ସାମ୍ନାକୁ ଆସିଛି । ଯେଉଁଠାରେ ଜଣେ SDM ସାହାବ, ହଙ୍ଗାମାକୁ ଶାନ୍ତ କରିବା ପାଇଁ ତାଙ୍କ କାନ ଧରି ମଞ୍ଚ ଉପରେ ଉଠବସ ହୋଇଥିଲେ। SDMଙ୍କ ଏହି ‘ବିନମ୍ର ପଦକ୍ଷେପ’ ଉପରେ ସମସ୍ତେ ନିଜ ନିଜ ପ୍ରତିକ୍ରିୟା ଦେଉଛନ୍ତି। ଏହି ଘଟଣାର ଭିଡିଓ ଏବେ ସୋସିଆଲ ମିଡିଆରେ ବେସ ଭାଇରାଲ ହେଉଛି।

ପ୍ରକାଶ ଥାଉକି, ଗତ ତିନି ଦିନ ଧରି ପୁୱାୟାଂ ତହସିଲରେ EWS ପ୍ରମାଣପତ୍ରକୁ ନେଇ ଓକିଲମାନେ ଆନ୍ଦୋଳନ କରୁଥିଲେ। ଏହି ସମୟରେ, ନୂତନ ଭାବରେ ନିଯୁକ୍ତି ପାଇଥିବା SDM ଜଣେ ଓକିଲଙ୍କୁ ଭର୍ତ୍ସନା କରିବା ପରେ ମାମଲା ଆହୁରି ବିଗିଡ଼ି ଗଲା । ଯାହା ପରେ ସେ ଶାନ୍ତି ପ୍ରତିଷ୍ଠା ପାଇଁ ଏହି ପଦକ୍ଷେପ ନେଇଥିଲେ।

ନୂତନ ଭାବରେ ନିଯୁକ୍ତ ହୋଇଥିବା SDM ତଥା ତାଲିମପ୍ରାପ୍ତ IAS ରିଙ୍କୁ ସିଂହ, ପ୍ରତିବାଦ ସ୍ଥଳକୁ ଯାଉଥିବା ସମୟରେ ସେ ଜଣେ ଓକିଲଙ୍କୁ କାନ୍ଥରେ ପରିସ୍ରା କରୁଥିବାର ଦେଖିଲେ। ଏହି ସମୟରେ, ସେ ଅଟକି ଯାଇ ଓକିଲଙ୍କୁ ଏପରି ନକରିବାକୁ ଅନୁରୋଧ କରିଥିଲେ ଏବଂ ବିରୋଧ କରିଥିଲେ। ଏଥିରେ ମାମଲା ଆହୁରି ବିଗିଡ଼ି ଯାଇଥିଲା। ଓକିଲ ତହସିଲ ପରିସରରେ ଥିବା ଶୌଚାଳୟ ଅପରିଷ୍କାର ଥିବା ଏବଂ ସେଠାରେ ସେ ପରିସ୍ରା କରିପାରିବେ ନାହିଁ ବୋଲି କହିଥିଲେ ।

SDM ପ୍ରତିବାଦ ସ୍ଥଳରେ ପହଞ୍ଚିଥିଲେ

ନୂତନ ଭାବରେ ଆସିଥିବା SDM ତଥା ତାଲିମପ୍ରାପ୍ତ IAS ରିଙ୍କୁ ସିଂହ ଓକିଲମାନଙ୍କ ମଧ୍ୟରେ ପହଞ୍ଚି ମାମଲାକୁ ଶାନ୍ତ କରିବାକୁ ସମସ୍ତଙ୍କୁ ନିବେଦନ କରିଥିଲେ। ଯେତେବେଳେ ଓକିଲମାନଙ୍କ କ୍ରୋଧ ବଢ଼ିବାକୁ ଲାଗିଲା, ସେ ମଞ୍ଚ ଉପରେ ଠିଆ ହୋଇ କ୍ଷମା ମାଗିବା ସହ କାନ ଧରି 5 ଥର ଉଠବସ ହୋଇଥିଲେ। ଏହି ବିନମ୍ର ଅପିଲ ପରେ, ଓକିଲମାନଙ୍କ କ୍ରୋଧ ଶାନ୍ତ ପଡ଼ିଥିଲା। ତଥାପି, SDMଙ୍କ ଏହି ପଦକ୍ଷେପ ଉପରେ ମିଶ୍ରିତ ପ୍ରତିକ୍ରିୟା ଦେଖିବାକୁ ମିଳିଛି। ସେହି ସମୟରେ, ରିଙ୍କୁ ସିଂହଙ୍କ ଏହି ଭିଡିଓ ଏବେ ସୋସିଆଲ ମିଡିଆରେ ପ୍ରବଳ ଭାଇରାଲ ହେଉଛି।