ଚେନ୍ନାଇ ପାଇଁ ଚିନ୍ତା ବଢାଉଛି ଆହତ ସମସ୍ୟା: ଦୀପକ ଚହରଙ୍କ ପରେ ଦଳରୁ ବାଦ ପଡିପାରନ୍ତି ଏହି ବୋଲର

ମୁମ୍ବାଇ: ଚଳିତ ସିଜନରେ ସଂଘର୍ଷ କରିବାରେ ଲାଗିଛି ଲିଗର ସଫଳ ଟିମ ଚେନ୍ନାଇ ସୁପର କିଙ୍ଗସ । ୬ଟି ମ୍ୟାଚରୁ ୫ଟି ମ୍ୟାଚରେ ପରାଜୟର ସାମନା କରିଛି ଦଳ । ଫଳରେ ମାତ୍ର ୨ ପଏଣ୍ଟ ସହ ପଏଣ୍ଟ ଟେବୁଲର ନବମ ସ୍ଥାନକୁ ଖସି ଆସିଛି ସିଏସକେ । ସେପଟେ ଦଳର ଏହି ଶୋଚନୀୟ ପରିସ୍ଥିତିକୁ ଗ୍ରହଣ କରି ପାରିନାହାନ୍ତି ପ୍ରଶଂସକ । ପରାଜୟର କାରଣ ଖୋଜିବାରେ ଲାଗିଛନ୍ତି । ତେବେ ଦଳର ଏମିତି ଏକ ସ୍ଥିତି ପାଇଁ ମୁଖ୍ୟ କାରଣ ପାଲଟିଛି ଆହତ ସମସ୍ୟା । ମେଗା ଅକ୍ସନରୁ ହିଁ ଦଳରେ ଆହତ ସମସ୍ୟା ଲାଗି ରହିଛି ।

ପ୍ରଥମେ ଦଳର ଷ୍ଟାର ବୋଲର ଦୀପକ ଚହର ଆହତ ହୋଇ ସିଜନର କିଛି ମ୍ୟାଚରୁ ବାଦ ପଡିଥିଲେ । ଏହାପରେ ପ୍ରଥମ ମ୍ୟାଚରେ ତାଙ୍କ ସ୍ଥାନ ପୂରଣ କରିଥିବା ଆଡାମ ମିଲନେ ମଧ୍ୟ ଆହତ ହୋଇଥିଲେ । ଦଳ ଉଭୟଙ୍କ ଫେରିବା ବାଟକୁ ଚାହିଁ ରହିଥିବା ବେଳେ ଦୀପକ ଚହରଙ୍କ ଆଉ ଏକ ଆଘାତ ଦଳକର ମନୋବଳକୁ ଦୋହଲାଇ ଦେଇଛି । ଶେଷରେ ଦଳରୁ ବାଦ ପଡିଛନ୍ତି ଦୀପକ ଚହର । ଏତିକିରେ ସରିନି ଏବେ ଆଡାମ ମିଲନେଙ୍କ ପରବର୍ତ୍ତୀ ମ୍ୟାଚ ଖେଳିବା ନେଇ ପ୍ରଶ୍ନ ଉଠିଲାଣି । ପ୍ରଥମ ମ୍ୟାଚରେ ଲାଗିଥିବା ଆଘାତ ସମସ୍ୟାରୁ ଏଯାବତ ବାହାରି ପାରିନାହାନ୍ତି ମିଲନେ । ତେଣୁ ସେ ମଧ୍ୟ ଦଳରୁ ବାଦ ପଡିପାରନ୍ତି ବୋଲି କୁହାଯାଉଛି । ସୁସ୍ଥ ହେବା ପାଇଁ ତାଙ୍କୁ ଆହୁରି ୨ ସପ୍ତାହ କିମ୍ବା ଏହାଠାରୁ ଅଧିକ ସମୟ ଲାଗିପାରେ ବୋଲି ସୂଚନା ମିଳିଛି ।

ତେବେ ଚେନ୍ନାଇ ଏବେ ଦୀପକ ଚହରଙ୍କ ରିପ୍ଲେସମେଣ୍ଟ ଖୋଜୁଥିବା ବେଳେ ଆଗକୁ ଆଡାମ ମିଲନେଙ୍କ ସ୍ଥାନରେ ଆଉ ଜଣେ ବୋଲରଙ୍କୁ ଦଳରେ ସାମିଲ କରାଇପାରେ । ଚଳତ ସିଜନରେ ୬ଟି ମ୍ୟାଚ ଖେଳି ୫ଟିରେ ପରାଜୟର ସାମନା କରିଛି ଚେନ୍ନାଇ । ତେବେ ଗୋଟିଏ ବିଜୟ ହାସଲ କରିଥିଲେ ବି ୨ ପଏଣ୍ଟ ସହ ପଏଣ୍ଟ ଟେବୁଲର ନବମ ସ୍ଥାନରେ ରହିଛି ।