ଟିମ ଇଣ୍ଡିଆ ପାଇଁ ମ୍ୟାଜିକ ଶୋ’: ମେଫେୟାର ତରଫରୁ ସ୍ୱତନ୍ତ୍ର ବ୍ୟବସ୍ଥା

ଭୁବନେଶ୍ୱର: ଦକ୍ଷିଣ ଆଫ୍ରିକା ବିପକ୍ଷ ଦ୍ୱିତୀୟ ଟି-୨୦ ମ୍ୟାଚ କଟକର ବାରବାଟୀ ଷ୍ଟାଡିୟମରେ ଖେଳାଯିବ । ତେଣୁ ଉଭୟ ଦଳର ଖେଳାଳି ଭୁବନେଶ୍ୱରସ୍ଥିତ ମେଫେୟାର ହୋଟେଲରେ ରହିଛନ୍ତି । ହୋଟେଲ ତରଫରୁ ଖେଳାଳିମାନଙ୍କ ଖାଦ୍ୟପେୟଠୁ ଆରମ୍ଭ କରି ସେମାନଙ୍କ ମନୋରଞ୍ଜନର ସମସ୍ତ ବ୍ୟବସ୍ଥା କରାଯାଇଛି । ରାତ୍ରି ଭୋଜନ ସମୟରେ ଏକ ମ୍ୟାଜିକ ଶୋ’ର ଆୟୋଜନ କରାଯାଇଛି । ଯାହାର ଭିଡିଓ ଏବେ ଖୁବ ଭାଇରାଲ ହେବାରେ ଲାଗିଛି ।

ଦ୍ୱିତୀୟ ଟି-୨୦ ପାଇଁ ଭୁବନେଶ୍ୱର ମେଫେୟାର ହୋଟେଲରେ ରହିଛି ଟିମ ଇଣ୍ଡିଆ । ତେବେ ଦଳର ଖାଦ୍ୟପେୟ ବ୍ୟବସ୍ଥା ସହିତ ମନୋରଞ୍ଜନ ପାଇଁ ମଧ୍ୟ ହୋଟେଲ ପକ୍ଷରୁ ବ୍ୟବସ୍ଥା କରାଯାଇଥିଲା । ରାତ୍ରିଭୋଜନ ସମୟରେ ଜଣେ ମ୍ୟାଜିସିଆନଙ୍କ ଦ୍ୱାରା ମ୍ୟାଜିକ ଶୋ’ର ଆୟୋଜନ କରାଯାଇଥିଲା । ତାସରେ ମ୍ୟାଜିକ କରିବା ସହିତ ଟିମ ଇଣ୍ଡିଆକୁ ମନୋରଞ୍ଜନର ଖୋରାକ ଯୋଗାଇଥିଲେ ଏହି ମ୍ୟାଜିସିଆନ । ଏହି ଟ୍ରିକକୁ ଖୁବ ପସନ୍ଦ କରିଥିଲେ ଟିମ ଇଣ୍ଡିଆର ସମସ୍ତ ଖେଳାଳି । ମ୍ୟାଜିକ ଶୋ’ରେ ଭାରତୀୟ ଦଳର ଅଧିନାୟକ ଋଷଭ ପନ୍ତଙ୍କ ସମେତ ଦିନେଶ କାର୍ତ୍ତିକ, ଇଶାନ କିଶାନ ଏବଂ ହାର୍ଦ୍ଦିକ ପାଣ୍ଡ୍ୟା ମଧ୍ୟ ସାମିଲ ହୋଇଥିଲେ ।

ମ୍ୟାଜିକ ଶୋ’ ଟିମ ଇଣ୍ଡିଆର ଖେଳାଳିମାନଙ୍କୁ ଖୁବ ପସନ୍ଦ ଆସିଛି । ବିଶେଷ କରି ଦଳର ଷ୍ୟାର ଓପନର ଇଶାନ କିଶାନ ଏହି ମ୍ୟ।।ଜିକ ଟ୍ରିକର ମଜା ଉଠାଇଛନ୍ତି । ଏହି ଟ୍ରିକ ତାଙ୍କ ଏତେ ପସନ୍ଦ ଆସିଛି ଯେ, ଇଶାନ ମ୍ୟାଜିସିଆନଙ୍କ ହାତ ଧରି ପକାଇଥିବା ଏହି ଭିଡିଓରେ ଦେଖିବାକୁ ମିଳିଛି । ତେବେ ଆସନ୍ତାକାଲି କଟକର ବାରବାଟୀ ଷ୍ଟାଡିୟମରେ ଦକ୍ଷିଣ ଆଫ୍ରିକା ବିପକ୍ଷରେ ଦ୍ୱିତୀୟ ଟି-୨୦ ମ୍ୟାଚ ଖେଳିବ ଭାରତ ।