ଟଙ୍କା ରହିବ ସୁରକ୍ଷିତ, ପ୍ରତି ମାସରେ ହେବ ରୋଜଗାର, କମ ସୁଧରେ ମିଳିବ ଲୋନ, କରନ୍ତୁ ଏହି କାମ

ଓଡିଶା ଭାସ୍କର: ଫିକ୍ସ ଡିପୋଜିଟ ବା FD କରିବା ଆଜିକା ସମୟରେ ବୁଦ୍ଧିମାନର କାମ ହୋଇଥାଏ। ଯଦି ଆପଣ ଟଙ୍କାକୁ ନେଇ କୌଣସି ପ୍ରକାରର ରିସ୍କ ନେବାକୁ ଚାଁହୁ ନାହାଁନ୍ତି ତେବେ ଏହାକୁ ନିଶ୍ଚୟ କରନ୍ତୁ। ଏଥିରେ ଟଙ୍କା ନିବେଶ କରିବା ଦ୍ୱାରା ଏହା ସୁରକ୍ଷିତ ରହିବା ସହିତ ପ୍ରତି ମାସରେ ସୁଧ ମଧ୍ୟ ଦେଇଥାଏ।

କେବଳ ଏତିକି ନୁହେଁ, ଯଦି କେବେ ଆବଶ୍ୟକ ହୁଏ, ତେବେ ଆପଣ କମ ସୁଧ ହାରରେ FD ଉପରେ ଋଣ ମଧ୍ୟ ନେଇପାରିବେ।

FD ବା ଫିକ୍ସ ଡିପୋଜିଟ କଣ? FD ହେଉଛି ଏକ ପ୍ରକାରର ନିବେଶ, ଯେଉଁଥିରେ ଆପଣ ବ୍ୟାଙ୍କ କିମ୍ବା ଯେକୌଣସି ଆର୍ଥିକ ପ୍ରତିଷ୍ଠାନରେ ଏକ ନିର୍ଦ୍ଦିଷ୍ଟ ଅବଧି ପାଇଁ ଟଙ୍କା ଜମା କରିପାରିବେ। ଏହି ଜମା ରାଶି ଉପରେ ଆପଣଙ୍କୁ ଏକ ସ୍ଥିର ସୁଧ ହାର ମଧ୍ୟ ମିଳିବ। FD ଖୋଲିବାର କୌଣସି ସୀମା ନାହିଁ। ଆପଣ ଯେତେ ଇଚ୍ଛା ସେତେ FD ଆକାଉଣ୍ଟ ଖୋଲିପାରିବେ।

FD କରିବାର ଫାଇଦା: ଟଙ୍କା ନିବେଶର କେତେଗୁଡିଏ ଅପ୍ସନ: ଫିକ୍ସ ଡିପୋଜିଟ ପାଇଁ ଅନେକ ଗୁଡିଏ ବିକଳ୍ପ ରହିଛି। ଆପଣ ଆପଣଙ୍କର ଟଙ୍କାର ପରିମାଣ ଏବଂ ସମୟ ଅନୁସାରେ FD କରିପାରିବେ। ଏଥିରେ ଟଙ୍କା ନିବେଶ କରିବାର ସୁବିଧା 7ଦିନରୁ 10 ବର୍ଷ ଯାଏଁ ରହିଛି।

ଟଙ୍କା ରହିବ ସୁରକ୍ଷିତ: ଏହା କରିବା ଦ୍ୱାରା ଟଙ୍କା ସୁରକ୍ଷିତ ରହିଥାଏ କାରଣ ଫିକ୍ସ ଡିପୋଜିଟକୁ ଦେଶର ସବୁଠାରୁ ବିପଦମୁକ୍ତ ନିବେଶର ବିକଳ୍ପ ଭାବରେ ବିବେଚନା କରାଯାଏ। ଭାରତୀୟ ରିଜର୍ଭ ବ୍ୟାଙ୍କ ଦେଶର ସମସ୍ତ ବ୍ୟାଙ୍କ ଉପରେ ନଜର ରଖେ ସେଥିପାଇଁ ଟଙ୍କା ହରାଇବାର କୌଣସି ଭୟ ନଥାଏ।

FD ରେ ଜମା ହୋଇଥିବା ଟଙ୍କା ଉପରେ 5 ଲକ୍ଷ ଟଙ୍କା ପର୍ଯ୍ୟନ୍ତ ବୀମା ସୁବିଧା ମିଳିଥାଏ। ଯାହାର ଅର୍ଥ ଯଦି ବ୍ୟାଙ୍କ ଡିଫଲ୍ଟ ହୁଏ କିମ୍ବା ବନ୍ଦ ହୋଇଯାଏ, ତେବେ ସରକାର ଆପଣଙ୍କୁ 5 ଲକ୍ଷ ଟଙ୍କା ଦେବାର ଗ୍ୟାରେଣ୍ଟି ଦେବେ।।

ଏକ ସ୍ଥିର ରିଟର୍ଣ୍ଣ ମିଳିଥାଏ: FD କରିବାର ଗୋଟିଏ ସୁବିଧା ହେଉଛି ଯେ ଆପଣ ଏକ ସ୍ଥିର ରିଟର୍ଣ୍ଣ ପାଇପାରିବେ। ଟଙ୍କା ନିବେଶ କରିବା ସମୟରେ, ବ୍ୟାଙ୍କ କିମ୍ବା ଆର୍ଥିକ ସଂସ୍ଥା ଆପଣଙ୍କୁ ମ୍ୟାଚୁରିଟିରେ କେତେ ଲାଭ ମିଳିବ ତାହା ଜଣାଇ ଦେଇଥାନ୍ତି।

ସୁଧ ହାରରେ ପରିବର୍ତ୍ତନ FD ଉପରେ କୌଣସି ପ୍ରଭାବ ପକାଇବ ନାହିଁ। ଅର୍ଥାତ୍, ଥରେ ଆପଣ FDରେ ଟଙ୍କା ନିବେଶ କଲେ, ଆପଣ ସର୍ବଦା ଯେଉଁ ସୁଧ ହାରରେ ନିବେଶ କରିବେ ତାହା ପାଇବେ।

FD ରେ ଋଣ ନେଇପାରିବେ: ଏହାର ଆଉ ଏକ ସୁବିଧା ହେଉଛି, ଆପଣ ଏଥିରେ କମ ସୁଧରେ ଋଣ ନେଇପାରିବେ। ଯଦି ଆପଣଙ୍କୁ ହଠାତ୍ ଟଙ୍କାର ଆବଶ୍ୟକତା ପଡ଼େ, ତେବେ ଆପଣ FD ନ ଭାଙ୍ଗି 90 ପ୍ରତିଶତ ପର୍ଯ୍ୟନ୍ତ ଋଣ ନେଇପାରିବେ ଏବଂ ଆପଣଙ୍କ ସୁବିଧା ଅନୁସାରେ ଏହାକୁ ପରିଶୋଧ କରିପାରିବେ।

ମ୍ୟାଚୁରିଟି ପୂର୍ବରୁ ଟଙ୍କା ଉଠାଇ ପାରିବେ: FD କରିବା ପରେ, ଆପଣ ମ୍ୟାଚୁରିଟି ପୂର୍ବରୁ ମଧ୍ୟ ଟଙ୍କା ଉଠାଇପାରିବେ। କେବଳ ପ୍ରି-ମ୍ୟାଚୁରିଟି ପାଇଁ କିଛି ଚାର୍ଜ ଦେବାକୁ ପଡିବ। ଏହା ବିଭିନ୍ନ ବ୍ୟାଙ୍କରେ ଅଲଗା ଲାଗ ହୋଇଥାଏ।

ପ୍ରତି ମାସରେ ରୋଜଗାର କରିପାରିବେ: ଆପଣ ପ୍ରତି ମାସରେ FD ରୁ ରୋଜଗାର କରିପାରିବେ। ଭାରତୀୟ ଷ୍ଟେଟ୍ ବ୍ୟାଙ୍କ ସମେତ ଅନେକ ପ୍ରମୁଖ ବ୍ୟାଙ୍କ ସେମାନଙ୍କର ସ୍ଥାୟୀ ଜମା ଯୋଜନା ସହିତ ମାସିକ ଆୟ ଯୋଜନା ସୁବିଧା ମଧ୍ୟ ପ୍ରଦାନ କରୁଛନ୍ତି।

ଧରାଯାଉ ଆପଣ ଗୋଟିଏ ବର୍ଷ ପାଇଁ ବାର୍ଷିକ 7 ପ୍ରତିଶତ ସୁଧ ହାରରେ 5 ଲକ୍ଷ ଟଙ୍କାର FD କରୁଛନ୍ତି, ତେବେ ଆପଣ ଏଥିରେ ମୋଟ ୩୫ ହଜାର ଟଙ୍କା ସୁଧ ପାଇବେ। ଯଦି ଆମେ ଏହାକୁ ବର୍ଷର 12 ମାସରେ ବିଭକ୍ତ କରିବା, ତେବେ ଏହି ପରିମାଣ 2916 ଟଙ୍କା ହେବ।

ଏହିପରି ଭାବରେ, ଆପଣ ପ୍ରତି ମାସରେ 2916 ଟଙ୍କା ସୁଧ ପାଇବେ। ତା ବାଦ ଆପଣ ଗୋଟିଏ ବର୍ଷ ପରେ ରଖିଥିବା ଆପଣଙ୍କର 5 ଲକ୍ଷ ଟଙ୍କା ବି ପାଇବେ।

କମ୍ CIBIL ସ୍କୋର ଥିଲେ ମଧ୍ୟ କ୍ରେଡିଟ୍ କାର୍ଡ ପାଇପାରିବେ: ଯଦି ଆପଣଙ୍କୁ ଏକ କ୍ରେଡିଟ୍ କାର୍ଡ ଆବଶ୍ୟକ ଏବଂ ଆପଣଙ୍କର ଖରାପ CIBIL ସ୍କୋର କିମ୍ବା ଅନ୍ୟ କୌଣସି କାରଣରୁ ଏହା ପାଇପାରୁନାହାଁନ୍ତି ତେବେ ଆପଣ FD ବିନିମୟରେ ଏକ କ୍ରେଡିଟ୍ କାର୍ଡ ପାଇପାରିବେ।

ଟ୍ୟାକ୍ସରୁ ଛାଡ଼ ମିଳିଥାଏ: FDରେ ଟ୍ୟାକ୍ସ ଛାଡ଼ ଉପଲବ୍ଧ। ଏଥିରେ ଟଙ୍କା ନିବେଶ କରି, ଆପଣ ଆୟକର ଆଇନର ଧାରା 80C ଅନୁଯାୟୀ ଆପଣଙ୍କ ମୋଟ ଆୟରୁ 1.5 ଲକ୍ଷ ଟଙ୍କା ରିହାତି ଦାବି କରିପାରିବେ।

ବରିଷ୍ଠ ନାଗରିକମାନଙ୍କୁ ଅଧିକ ସୁବିଧା: ବ୍ୟାଙ୍କଗୁଡ଼ିକ ସ୍ଥାୟୀ ଜମା ଉପରେ ବରିଷ୍ଠ ନାଗରିକମାନଙ୍କୁ ଅଧିକ ସୁଧ ଦିଅନ୍ତି। ଏହା ସାଧାରଣ FD ର 0.50 ପ୍ରତିଶତରୁ ଅଧିକ। ଏପରି ପରିସ୍ଥିତିରେ, ଯଦି ଆପଣ ଆପଣଙ୍କ ପରିବାରର ଜଣେ ବରିଷ୍ଠ ନାଗରିକଙ୍କ ପାଇଁ FD କରନ୍ତି, ତେବେ ଆପଣଙ୍କୁ ଅଧିକ ସୁଧ ମିଳିବ।