ମରକ୍କୋ ଭୂମିକମ୍ପ: ୨୦୦୦ ଟପିଲା ମୃତ୍ୟୁସଂଖ୍ୟା, ୨୦୫୦ରୁ ଅଧିକ ଆହତ
ନୂଆଦିଲ୍ଲୀ: ଶୁକ୍ରବାର ବିଳମ୍ବିତ ରାତିରେ ମରକ୍କୋରେ ଏକ ଶକ୍ତିଶାଳୀ ଭୂମିକମ୍ପ ହୋଇଥିଲା । ଏହି ଭୂମିକମ୍ପର ତୀବ୍ରତା ୬.୮ ରିକ୍ଟର ସ୍କେଲରେ ମପାଯାଇଛି । ମରକ୍କୋର ଗୃହମନ୍ତ୍ରୀ କହିଛନ୍ତି ଯେ, ଭୂମିକମ୍ପରେ ମୃତ୍ୟୁସଂଖ୍ୟା ୨୦୧୨କୁ ପାର କରିଛି । ଏଠାରେ ୨୦୫୯ ରୁ ଅଧିକ ଲୋକ ଆହତ ହୋଇଥିବା କୁହାଯାଉଛି । ଏହି ଘଟଣାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ଟ୍ୱିଟ କରି ଦୁଃଖ ପ୍ରକାଶ କରିଛନ୍ତି ଏବଂ ମରକ୍କୋ ପାଇଁ ସମ୍ଭାବ୍ୟ ସାହାଯ୍ୟ ନିଶ୍ଚିତ କରିଛନ୍ତି ।
ମରକ୍କୋ ଭୂମିକମ୍ପ ଆରମ୍ଭରେ ମୃତ୍ୟୁସଂଖ୍ୟା ୬୩୨ ବୋଲି କୁହାଯାଉଥିଲା । ହେଲେ ପରେ ଏହି ସଂଖ୍ୟା ବଢିବାରେ ଲାଗିଛି । ଅଲ-ହାଉସ ଏବଂ ତାରୁଣ୍ଡାଟ ଅଞ୍ଚଳରେ ମୃତକ ସଂଖ୍ୟା ଅଧିକ ବୋଲି ଜଣାପଡିଛି । ଏହା ବ୍ୟତୀତ ମରକ୍କୋର ଉଆରଜଜାତେ, ଚିଚାଉଆ, ଅଜିଲାଲ ଏବଂ ୟୁସୁଫିୟା, ଏରକ୍କେଶ, ଅଗାଦୀର ଏବଂ କୈସାବ୍ଲାଂକା ଅଞ୍ଚଳରେ ମଧ୍ୟ ମୃତକଙ୍କୁ ଉଦ୍ଧାର କରାଯାଇଛି । ଏହି ସ୍ଥାନରେ ଆହତ ସଂଖ୍ୟା ୩୨୯ ପାର କରିଛି, ଏଥିସହ ୫୧ ଜଣଙ୍କ ଅବସ୍ଥା ଗୁରୁତର ରହିଛି ।
ସ୍ଥାନୀୟ ମିଡିଆ ରିପୋର୍ଟ ଅନୁଯାୟୀ, ଭୂମିକମ୍ପରେ ମୃତ ସଂଖ୍ୟା ବର୍ତ୍ତମାନ ଅଧିକ ବଢିଯାଇଛି । ଭୂମିକମ୍ପର ସୂଚନା ରଖୁଥିବା ମରକ୍କୋର ସଂସ୍ଥା ଭୂମିକମ୍ପର ତୀବ୍ରତା ସାତ ରୁ ଅଧିକ ପାର କରିଛି ବୋଲି କହିଛି । ଆମେରିକୀୟ ଜିଓଲୋଜିକାଲ ସର୍ଭେ ମୁତାବକ, ଏହି ଭୂକମ୍ପର କେନ୍ଦ୍ରସ୍ଥଳ ୧୮.୫ କିଲୋମିଟର ଗଭୀରତାରେ, ପର୍ଯ୍ୟଟନ ସହର ମାରାକେଶର ୭୧ କିଲୋମିଟର ଦକ୍ଷିଣ-ପଶ୍ଚିମ ଦିଗରେ ଥିଲା। ସ୍ଥାନୀୟ ସମୟ ରାତି ପ୍ରାୟ ୧୧.୧୧ ସମୟରେ ଏଠାରେ କମ୍ପନ ଅନୁଭୂତ ହୋଇଥିଲା। କିଛି ସମୟ ପରେ, ଏହି ସ୍ଥାନଗୁଡିକରେ ଭୂମିକମ୍ପର ପ୍ରଭାବ ମଧ୍ୟ ଅନୁଭୂତ ହୋଇଥିଲା, ଯାହାର ତୀବ୍ରତା ୪.୯ରେ ମାପ କରାଯାଇଥିଲା।
