NEET ମାମଲା: ଅନୀୟମିତତା ପ୍ରମାଣ ହେଲେ ପରୀକ୍ଷା ହେବ, ଆବେଦନକାରୀଙ୍କୁ ଏପରି କହିଲେ ସୁପ୍ରିମକୋର୍ଟ
ନୂଆଦିଲ୍ଲୀ: ନୀଟ୍ ବିବାଦକୁ ନେଇ ସୁପ୍ରିମକୋର୍ଟରେ ଶୁଣାଣି ଆରମ୍ଭ ହୋଇସାରିଛି । ତେବେ ଶୁଣାଣି ପୂର୍ବରୁ NTA ସୁପ୍ରିମକୋର୍ଟରେ ଏକ ଲିଖିତ ଆଫିଡେଭିଟ୍ ଦାଖଲ କରିଥିଲା । ଏଥିରେ ଉଲ୍ଲେ୍ଖ ରହିଛି ଯେ IIT Madras ରିପୋର୍ଟ ଅନୁଯାୟୀ ପରୀକ୍ଷାରେ କୌଣସି ପ୍ରକାର ଅନିୟମିତତା ସାମ୍ନାକୁ ଆସିନି । IIT ନିର୍ଣ୍ଣୟ ଅନୁଯାୟୀ ପରୀକ୍ଷା ପରିଣାମରେ ଅସ୍ୱାଭାବିକତାର କୌଣସି ସୂଚନା ନାହିଁ । ଅପରପକ୍ଷରେ ଶୁଣାଣି ଆରମ୍ଭ ହେବା ପରେ ସୁପ୍ରିମକୋର୍ଟର ପ୍ରଧାନ ବିଚାରପତି ଡିୱାଇ ଚନ୍ଦ୍ରଚୂଡ଼ ନୀଟ୍ ମାମଲାକୁ ପ୍ରାଥମିକତା ଦିଆଯିବା ଉପରେ ଗୁରୁତ୍ୱାରୋପ କରିଥିଲେ ।
ଶୁଣାଣି ସମୟରେ ପ୍ରଧାନ ବିଚାରପତିଙ୍କ ନେତୃତ୍ୱରେ ଗଠିତ ବେଞ୍ଚ୍ ଆବେଦନକାରୀଙ୍କ ଆଇନଜୀବୀଙ୍କୁ କହିଛନ୍ତି ଏହି ଅନିୟମିତତା ଏବଂ ଲିକ୍ ବହୁ ପରିମାଣରେ ଘଟିଛି ତେଣୁ ପରୀକ୍ଷା ରଦ୍ଦ ବ୍ୟତୀତ ଅନ୍ୟ କୌଣସି ବିକଳ୍ପ ନାହିଁ ବୋଲି ପ୍ରମାଣ କରିବାକୁ ପଡ଼ିବ । ସୁପ୍ରିମକୋର୍ଟ ଆବେଦନକାରୀଙ୍କୁ କହିଛନ୍ତି ଯେ ଯଦି ଆପଣ ଆମ ସମ୍ମୁଖରେ ପ୍ରମାଣ କରନ୍ତି ଯେ ଏକ ବଡ଼ ଧରଣର ଅନିୟମିତତା ହୋଇଛି ତେବେ ପୁନଃପରୀକ୍ଷା ପାଇଁ ନିର୍ଦ୍ଦେଶ ଦିଆଯାଇପାରିବ। ଆବେଦନକାରୀ ଛାତ୍ରଛାତ୍ରୀମାନଙ୍କ ପକ୍ଷରୁ ଆଇନଜୀବୀ କହିଛନ୍ତି ଯେ କିଛି ଛାତ୍ରଛାତ୍ରୀ ମଧ୍ୟ ଆସିଛନ୍ତି ଯେଉଁମାନଙ୍କର ସ୍ଥାନ ୧ ଲକ୍ଷ ୮ ହଜାରଙ୍କ ମଧ୍ୟରେ ଅଛି, କିନ୍ତୁ ସେମାନେ ସରକାରୀ କଲେଜ ପାଇ ନାହାନ୍ତି। ଆବେଦନକାରୀଙ୍କ ଆଇନଜୀବୀ କହିଛନ୍ତି ଯେ ଯଦି ପୁନଃପରୀକ୍ଷା ହୁଏ ତେବେ ଏହା ପ୍ରାୟ ୧,୦୦,୦୦୦ ଛାତ୍ରଛାତ୍ରୀଙ୍କୁ ପ୍ରଭାବିତ କରିବ। କିନ୍ତୁ କୋର୍ଟ କହିଛନ୍ତି ଯେ ଏହି ପରୀକ୍ଷାରେ ୨୩ ଲକ୍ଷ ଛାତ୍ରଛାତ୍ରୀ ଉପସ୍ଥିତ ଥିବାରୁ ୧ ଲକ୍ଷ କୁହାଯାଇପାରିବ ନାହିଁ। ଯଦି ପରୀକ୍ଷା ହେବ ତେବେ ସମସ୍ତ ଛାତ୍ରଛାତ୍ରୀ ପୁନର୍ବାର ସୁଯୋଗ ପାଇବେ । ଆଜି ଶୁଣାଣି ସମୟରେ ସୁପ୍ରିମକୋର୍ଟରେ NTA ସମେତ ୪୦ରୁ ଉର୍ଦ୍ଧ୍ୱ ଆବେଦନର ଶୁଣାଣି ଚାଲିଛି । ସିଜେଆଇ ଡିୱାଇ ଚନ୍ଦ୍ରଚୂଡ଼, ଜଷ୍ଟିସ ଜେବି ପାରଦିୱାଲା ଏବଂ ଜଷ୍ଟିସ ମନୋଜ ମିଶ୍ରଙ୍କ ବେଞ୍ଚ୍ ମାମଲାର ଶୁଣାଣି କରୁଛନ୍ତି ।