ବଳାତ୍କାର ହେତୁ ଗର୍ଭବତୀ ହୋଇଥିବା ୧୧ ବର୍ଷର ଝିିଅକୁ ସନ୍ତାନ ପ୍ରସବ କରିବାକୁ ପଡିବ: ଗର୍ଭପାତ କରିବାକୁ ଅନୁମତି ଦେଲେନାହିଁ କୋର୍ଟ
ନୂଆଦିଲ୍ଲୀ: ବଳାତ୍କାର ପରେ ଗର୍ଭବତୀ ହୋଇଥିବା ୧୧ ବର୍ଷର ଝିିଅକୁ ବର୍ତ୍ତମାନ ସନ୍ତାନ ପ୍ରସବ କରିବାକୁ ପଡିବ । ଝିଅକୁ ୩୧ ସପ୍ତାହର ଗର୍ଭକୁ ନଷ୍ଟ କରିବାର ଅନୁମତି ଦେବାକୁ ମନା କରି ଦେଇଛନ୍ତିି ରାଜସ୍ଥାନ ହାଇକୋର୍ଟ । ବୁଧବାର ଦିନ ହାଇକୋର୍ଟ ଝିଅର ଆବେଦନକୁ ଖାରଜ କରି କହିଛନ୍ତି ଯେ, ‘ଏକ ସଂପୂର୍ଣ୍ଣ ବିକଶିତ ଗର୍ଭସ୍ଥ ଶିଶୁର ମଧ୍ୟ ବଞ୍ଚିବାର, ଏହି ଦୁନିଆକୁ ଆସି ସୁସ୍ଥ ଜୀବନଯାପନ କରିବାର ଅଧିକାର ରହିଛି ।’
ଟାଇମ୍ସ ଅଫ୍ ଇଣ୍ଡିଆ ରିପୋର୍ଟ ଅନୁଯାୟୀ, ଶୁକ୍ରବାର ଦିନ ହାଇକୋର୍ଟଙ୍କ ଆଦେଶର ଏକ କପି ଅନୁଯାୟୀ ଜଷ୍ଟିସ ଅନୁପ କୁମାର ଚାନ୍ଦ କହିଛନ୍ତି ଯେ, ମେଡିକାଲ ବୋର୍ଡର ପରାମର୍ଶ ଅନୁଯାୟୀ ଗର୍ଭସ୍ଥ ଶିଶୁର ଓଜନ ବଢ଼ୁଛି ଏବଂ ଏହାର ସମସ୍ତ ଗୁରୁତ୍ୱପୂର୍ଣ୍ଣ ଅଙ୍ଗ ସମ୍ପୂର୍ଣ୍ଣ ବିକଶିତ ହୋଇଛି ।
ଜଷ୍ଟିସ୍ ଚାନ୍ଦ କହିଛନ୍ତି, ପିଲାଟି ବର୍ତ୍ତମାନ ଜନ୍ମ ନେବାର ନିକଟତର ହୋଇଛି, ତେଣୁ ଗର୍ଭପାତକୁ ଅନୁମତି ଦିଆଯାଇପାରିବ ନାହିଁ । ସେ କହିଛନ୍ତି ଯେ ସମାନ ଦୁଇଟି ମାମଲାର ଶୁଣାଣି ବେଳେ ପଞ୍ଜାବ ଏବଂ ହରିୟାଣା ହାଇକୋର୍ଟ ମଧ୍ୟ ଗର୍ଭପାତକୁ ଅନୁମତି ଦେବାକୁ ମନା କରି ଦେଇଥିଲେ ।
ହାଇକୋର୍ଟ କହିଛନ୍ତି ଯେ, ଗର୍ଭପାତ ଶିଶୁଙ୍କ ପାଇଁ ନିରାପଦ ନୁହେଁ ଏବଂ ଏହା ତାଙ୍କ ଜୀବନକୁ ବିପଦରେ ପକାଇପାରେ ବୋଲି ମେଡିକାଲ ବୋର୍ଡ ମଧ୍ୟ ମତ ଦେଇଛି । ନାବାଳିକା ଜଣକ ଏକ ପିଟିସନ ଦାଖଲ କରିଥିଲେ ଯେ ସେ ଗର୍ଭପାତ କରିବାକୁ ଚାହୁଁଛନ୍ତି କାରଣ ଶିଶୁଟି ବଳାତ୍କାରରୁ ଜନ୍ମ ହେଲେ ଏହା ତାଙ୍କ ପ୍ରତି ହେଉଥିବା ଅତ୍ୟାଚାର ବିଷୟରେ ମନେ ପକାଇବ । ସନ୍ତାନ ଜନ୍ମ କରିବା ତାଙ୍କ ମାନସିକ ଏବଂ ଶାରୀରିକ ସ୍ୱାସ୍ଥ୍ୟ ପାଇଁ ଭଲ ହେବ ନାହିଁ ବୋଲି ସେ କହିଛନ୍ତି ।
ଝିଅଟିକୁ ଏକ ସରକାରୀ ‘ବାଳିକା ଗୃହ’ରେ ଭର୍ତ୍ତି କରିବା ଏବଂ ପ୍ରସବ ପୂର୍ବରୁ ଏବଂ ପରେ ଭଲ ଖାଦ୍ୟ ଏବଂ ଚିକିତ୍ସା ସେବା ସହିତ ସମସ୍ତ ଆବଶ୍ୟକୀୟ ଯତ୍ନ ନେବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି । ଏଥିସହ ସେ ବାଳିକା ନହେବା ପର୍ଯ୍ୟନ୍ତ ତାଙ୍କୁ ଶିକ୍ଷା ସମେତ ଅନ୍ୟାନ୍ୟ ସୁବିଧା ଯୋଗାଇ ଦିଆଯିବା ଉଚିତ ବୋଲି କୋର୍ଟ କହିଛନ୍ତି ।
