କୁସ୍ତି ଯୋଦ୍ଧାଙ୍କ ସମର୍ଥନରେ ବାହାରିଲେ ବାବା ରାମଦେବ: କହିଲେ-ବ୍ରଜଭୁଷଣଙ୍କୁ ତୁରନ୍ତ ଗିରଫ କରାଯିବା ଉଚିତ୍

ନୂଆଦିଲ୍ଲୀ: ଯୌନ ଶୋଷଣ ଅଭିଯୋଗରେ ଫସିଥିବା ଭାରତୀୟ କୁସ୍ତି ସଂଘ(WFI) ଅଧ୍ୟକ୍ଷ ବ୍ରଜଭୁଷଣ ଶରଣ ସିଂହଙ୍କୁ ନେଇ ବଡ଼ ବୟାନ ଦେଇଛନ୍ତି ଯୋଗ ଗୁରୁ ବାବା ରାମଦେବ । ଜନ୍ତରମନ୍ତରରେ ଆନ୍ଦୋଳନରତ କୁସ୍ତିଯୋଦ୍ଧାଙ୍କୁ ସମର୍ଥନ କରି ବାବା ରାମଦେବ କହିଛନ୍ତି ଯେ, ତୁରନ୍ତ ବ୍ରଜଭୁଷଣଙ୍କୁ ଗିରଫ କରିବା ଉଚିତ୍ ।

ବାବା ରାମଦେବ କହିଛନ୍ତି ଯେ, ‘କୁସ୍ତି ସଂଘର ସଭାପତିଙ୍କ ଉପରେ ଯୌନ ଶୋଷଣ ଅଭିଯୋଗ ରହିଛି । ତାଙ୍କୁ ତୁରନ୍ତ ଗିରଫ କରାଯିବା ଉଚିତ୍ । ଏହା ସହିତ ସେ କହିଛନ୍ତି ଯେ ଦେଶର କୁସ୍ତିଯୋଦ୍ଧାମାନେ ଜନ୍ତର ମନ୍ତ୍ରରେ ବସି କୁସ୍ତି ସଙ୍ଗଠନର ସଭାପତିଙ୍କ ଉପରେ ଯୌନ ଶୋଷଣ ଅଭିଯୋଗ କରିବା ଅତ୍ୟନ୍ତ ଲଜ୍ଜାଜନକ । ଏପରି ବ୍ୟକ୍ତିଙ୍କୁ ତୁରନ୍ତ ଗିରଫ କରି କୋର୍ଟ ପଛରେ ପଠାଇବା ଉଚିତ୍ ।’

ବାବା ରାମଦେବ କେବଳ ବ୍ରିଜ ଭୂଷଣଙ୍କୁ ଗିରଫ କରିବାକୁ ଦାବି କରିନାହାଁନ୍ତି, ବରଂ ତାଙ୍କ ବିବୃତ୍ତି ପାଇଁ ବିଜେପି ସାଂସଦଙ୍କୁ ମଧ୍ୟ ଟାର୍ଗେଟ କରିଛନ୍ତି । ସେ କହିଛନ୍ତି ଯେ ପ୍ରତିଦିନ ସେ ପାଟି ଉଠାନ୍ତି ଏବଂ ମା-ଭଉଣୀ- ଝିଅମାନଙ୍କ ପାଇଁ ବାରମ୍ବାର ଖରାପ କଥା କୁହନ୍ତି, ଏହା ଅତ୍ୟନ୍ତ ନିନ୍ଦନୀୟ ଦୁଷ୍କର୍ମ ଏବଂ ପାପ ।

ତେବେ ଅନ୍ୟପଟେ ମହିଳା କୁସ୍ତିଯୋଦ୍ଧାଙ୍କୁ ଯୌନ ନିର୍ଯାତନା ଅଭିଯୋଗକୁ ବିଜେପି ସାଂସଦ ବ୍ରଜ ଭୂଷଣ ଶରଣ ସିଂ କ୍ରମାଗତ ଭାବେ ଅସ୍ୱୀକାର କରୁଛନ୍ତି । ଏହି ସମୟରେ ସେ କୁସ୍ତି ଆନ୍ଦୋଳନ ବିରୋଧରେ ଗୁରୁତର ଅଭିଯୋଗ ଆଣିଥିଲେ । ବ୍ରଜ ଭୂଷଣ କହିଛନ୍ତି ଯେ ଏହି ଆନ୍ଦୋଳନ ଦିଲ୍ଲୀରୁ ପଞ୍ଜାବ, ଖାଲିସ୍ତାନ ଏବଂ କାନାଡା ଆଡକୁ ଗତି କରୁଛି । ଏହି ଆନ୍ଦୋଳନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀଙ୍କ ବିରୋଧରେ ସ୍ଲୋଗାନ ଦିଆଯାଉଛି ।