ବିଳମ୍ବିତ ରାତିରେ ଜଣଙ୍କ ଘରେ ପଶି ନିଧୁମ୍ ଛେଚା ଖାଇଲେ ୪ ଯୁବକ, ୨ଟି ବାଇକ୍ ଜବତ
ଭୁବନେଶ୍ୱର (ଭାସ୍କର ନ୍ୟୁଜ୍): ଘରେ ପଶି ଧରାପଡି ୪ ଜଣ ଯୁବକ ନିଧୁମ୍ ଛେଚା ଖାଇଛନ୍ତି । ଠିକଣା ସମୟରେ ଘର ଲୋକ ଓ ଗ୍ରାମବାସୀ ୪ ଯୁବକଙ୍କୁ କାବୁ କରିବା ସହ ଛେଚିଛନ୍ତି । ପରେ ସୋମାନଙ୍କୁ ପୋଲିସ ଜିମା ଦେଇଥିଲେ ଗ୍ରାମବାସୀ । ଏହି ଘଟଣା ବାଲିପାଟଣା ଥାନା ପୋଇଝାରୀ ଗ୍ରାମରେ ଦେଖିବାକୁ ମିଳିଛି ।
ସୂଚନା ଅନୁଯାଇ, ପୋଇଝାରୀ ଗ୍ରାମର ୨ ଜଣ ବ୍ୟକ୍ତିଙ୍କ ଘରେ ବିଳମ୍ବିତ ରାତିରେ ୬ଜଣ ଯୁବକ ପଶିଥିଲେ । ଏହି ସମୟରେ ପରିବାର ଲୋକ ଉଠି ପଡିବାରୁ ଘରେ କେହି ପଶିଥିବା ଜାଣି ପାରିଥିଲେ । ପରେ ଗ୍ରାମର କିଛି ଯୁବକଙ୍କୁ ଏହି ସୂଚନା ଦେଇଥିଲେ ପରିବାର ଲୋକ । ଗ୍ରାମବାସୀ ଏକତ୍ରିତ ହୋଇ ୪ ଜଣ ଦୁର୍ବୃତ୍ତଙ୍କୁ କାବୁ କରିଥିଲେ । ତେବେ ଘଟଣାସ୍ଥଳରୁ ୨ଜଣ ଯୁବକ ଖସିଯାଇଥିଲେ । ଏହି ଘଟଣା ପରେ ବାଲିପାଟଣା ପୋଲିସ ଘଟଣାସ୍ଥଳରୁ ୪ ଜଣଙ୍କୁ ଉଦ୍ଧାର କରି ଥାନାରେ ଅଟକ ରଖିଛି । ୪ ଯୁବକ ହେଲେ ମଞ୍ଚେଶ୍ୱର ଥାନା ନହରକଣ୍ଟା ଅଞ୍ଚଳର ସଂଗ୍ରାମ ବେହେରା (୨୧), ଚନ୍ଦନ ବେହେରା (୨୧), ବାଦଲ ଭୋଇ (୧୯) ଏବଂ ରାହୁଲ ଭୋଇ (୨୦) । ଏଥିସହ ପୋଲିସ ସେମାନଙ୍କଠାରୁ ୨ଟି ବାଇକ୍ ଜବତ କରିବାରେ ସଫଳ ହୋଇଛି ।
