ମୁଖ୍ୟମନ୍ତ୍ରୀ ଅଭିଯୋଗ ପ୍ରକୋଷ୍ଠରେ ଅଭିଯୋଗ କଲେ ଅର୍ଚ୍ଚନା ନାଗ, କହିଲେ ସମସ୍ତଙ୍କ ମୁଖା ଖୋଲିବି
ଭୁବନେଶ୍ୱର: ବହୁଚର୍ଚ୍ଚିତ ଅର୍ଚ୍ଚନା ନାଗ ମାମଲାରେ ନୂଆ ମୋଡ଼ ଆସିଛି। ଅର୍ଚ୍ଚନା ନାଗ ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠରେ ଏକ ଅଭିଯୋଗ ଦାଖଲ କରି ନିଜ ସହ ଅନ୍ୟାୟ ହୋଇଥିବା ଦାବି କରିଛନ୍ତି। ସେ କହିଛନ୍ତି ଯେ, ପୂର୍ବତନ ସରକାର ଓ ପୋଲିସ ମିଳିତ ଭାବେ ତାଙ୍କ ନାଁରେ ମିଛ ଅଭିଯୋଗ ରୁଜୁ କରିଥିଲେ, ଯାହା ଆଜି ପର୍ଯ୍ୟନ୍ତ ପ୍ରମାଣିତ ହୋଇପାରି ନାହିଁ।
୨୦୨୨ରେ ଅର୍ଚ୍ଚନା ନାଗଙ୍କୁ ବ୍ଲାକମେଲିଂ ଓ ସେକ୍ସ ରାକେଟ୍ ଚଳାଇବା ଅଭିଯୋଗରେ ଗିରଫ କରାଯାଇଥିଲା। ଏହି ମାମଲା ରାଜ୍ୟରେ ବେଶ୍ ଚର୍ଚ୍ଚାରେ ଥିଲା, ଯେଉଁଥିରେ ଅନେକ ରାଜନେତା ଓ ବିଶିଷ୍ଟ ବ୍ୟକ୍ତିଙ୍କ ନାଁ ଜଡ଼ିତ ଥିବା ଅଭିଯୋଗ ହୋଇଥିଲା। କିନ୍ତୁ ୧୪ ମାସ ଜେଲ୍ରେ ରହିବା ପରେ ୨୦୨୩ ଡିସେମ୍ବରରେ ଅର୍ଚ୍ଚନା ହାଇକୋର୍ଟରୁ ଜାମିନ ପାଇ ମୁକୁଳିଥିଲେ। ଜେଲରୁ ବାହାରିବା ପରେ ସେ କହିଥିଲେ, “ଜେଲ୍ ଯିବା ମୋ ପାଇଁ ଏକ ସୁବର୍ଣ୍ଣ ସୁଯୋଗ ଥିଲା। ମୁଁ ଅନେକ କିଛି ଶିଖିଛି। ଆଇନ ଉପରେ ମୋର ଭରସା ଅଛି ଓ ମୁଁ ନିଶ୍ଚିତ ନ୍ୟାୟ ପାଇବି।”
ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠରେ ଦାଖଲ କରିଥିବା ଅଭିଯୋଗରେ ଅର୍ଚ୍ଚନା ଦାବି କରିଛନ୍ତି ଯେ, ତନାଘନା ପୂର୍ବକ ଯୋଜନା ଅନୁସାରେ ତାଙ୍କୁ ଫସାଇ ଗିରଫ କରାଯାଇଥିଲା। ସେ କହିଛନ୍ତି, “ମୋ ସହ ଅନ୍ୟାୟ ହୋଇଛି। ମୋ ନାଁରେ ମିଛ ଅଭିଯୋଗ ଆଣି ମୋତେ ଅପମାନିତ କରାଯାଇଛି। ପୂର୍ବତନ ସରକାର ଓ ପୋଲିସ ମିଳିତ ଭାବେ ଏହି ଷଡ଼ଯନ୍ତ୍ର କରିଥିଲେ, କିନ୍ତୁ ଏହାର କୌଣସି ପ୍ରମାଣ ଆଜି ପର୍ଯ୍ୟନ୍ତ ମିଳି ନାହିଁ।” ସେ ଆହୁରି କହିଛନ୍ତି, “ଯେଉଁମାନେ ଏହି ମାମଲାରେ ସଂପୃକ୍ତ, ମୁଁ ସମସ୍ତଙ୍କୁ ସାମ୍ନାକୁ ଆଣିବି।”
ଏହି ମାମଲାରେ ଅର୍ଚ୍ଚନାଙ୍କ ଅଭିଯୋଗକୁ ନେଇ ରାଜନୈତିକ ମହଲରେ ଚର୍ଚ୍ଚା ଜୋର୍ ଧରିଛି। ୨୦୨୨ରେ କଂଗ୍ରେସ ବିଧାୟକ ତାରା ପ୍ରସାଦ ବାହୀନିପତି ଏହି ପ୍ରସଙ୍ଗକୁ ବିଧାନସଭାରେ ଉଠାଇ ବିଜେଡି ଓ ବିଜେପି ନେତାଙ୍କ ସମ୍ପୃକ୍ତି ଥିବା ଅଭିଯୋଗ କରିଥିଲେ। ସେ ଦାବି କରିଥିଲେ ଯେ ପୋଲିସ ଏହି ମାମଲାରେ ସଠିକ ତଦନ୍ତ କରୁନାହିଁ ଏବଂ ରାଜନୈତିକ ଚାପରେ ମୌନ ରହୁଛି।
ଅର୍ଚ୍ଚନାଙ୍କ ଏହି ନୂଆ ଅଭିଯୋଗ ମାମଲାଟିକୁ ପୁନର୍ବାର ଚର୍ଚ୍ଚାକୁ ଆଣିଛି। ସେ ନ୍ୟାୟ ପାଇଁ ଲଢ଼େଇ ଜାରି ରଖିବେ ବୋଲି ଦୃଢ଼ୋକ୍ତି ପ୍ରକାଶ କରିଛନ୍ତି। ଏହି ଅଭିଯୋଗର ତଦନ୍ତ କେଉଁ ଦିଗରେ ଗତି କରୁଛି, ତାହା ଦେଖିବାକୁ ରହିଛି।