ବଜାରରେ ହୁ ହୁ ହୋଇ ବଢୁଛି ଅଦା- ରସୁଣ ଦର, ଗ୍ରାହକ ଅସନ୍ତୁଷ୍ଟ
ଭୁବନେଶ୍ୱର: ବଜାରରେ ହଠାତ ଅଦା ରଶୁଣ ଦର ବଢିଛି । ଏଥିରେ ଜନସାଧାରଣ ବହୁମାତ୍ରାରେ ପ୍ରଭାବିତ ହୋଇଛନ୍ତି । ପ୍ରତି ବର୍ଷ ଏହି ମେ’ ମାସରେ ରସୁଣ -ଅଦା ମୂଲ୍ୟ କିଲୋ ପିଛା ୪୦ ରୁ ୫୦ ଟଙ୍କା ଥିବା ବେଳେ ବର୍ତ୍ତମାନ ତାହା ବଢି ଆକାଶ ଛୁଆଁ ହୋଇଛି ।
ରାଜ୍ୟ ବ୍ୟବସାୟୀ ସଂଘର ସଂପାଦକ ସୁଧାକର ପଣ୍ଡା ସୂଚନା ଦେଇ କହିଛନ୍ତି ଯେ, ଉତ୍ପାଦନ କମ୍ ଥିବାରୁ ଏପରି ଦର ଅଚାନକ ବଢିଛି । ବର୍ତ୍ତମାନ ହୋସେଲ ଦର ଅଦା କିଲୋ ପିଛା ୨୦୦ ଟଙ୍କା ରହିବା ବେଳେ ରସୁଣ ଦର ୧୦୦ ଟଙ୍କା ରହିଛି । ଗ୍ରାହକମାନେ ଏହି ଅଦା ରସୁଣ କିଣିବା ପୂର୍ବରୁ ୧୦ ଥର ଭାବୁଛନ୍ତି । ଏଥିସହ ଆବଶ୍ୟକତା ଠାରୁ କମ କିଣିବାକୁ ଲୋକେ ବାଧ୍ୟ ହେଉଛନ୍ତି ।
ଅଦା ରସୁଣର ନୂଆ ଅମଳ ଆଉ ମାସେ-ଦୁଇ ମାସ ମଧ୍ୟରେ ଆସିବାର ଆଶଙ୍କା କରାଯାଉଛି। ଏହା ବଜାରକୁ ଆସିବା ପରେ ଦର କମିବ ବୋଲି କୁହାଯାଉଛି। ଅନ୍ୟପଟେ ସାଧାରଣ ଲୋକେ ରସୁଣ ଅଦା କିଣିବା ନେଇ ଅସନ୍ତୁଷ୍ଟ ପ୍ରକାଶ କରୁଛନ୍ତି।
