ବଞ୍ଚିଗଲା ଜୀବନ… ତାଲିବାନ କବଳରୁ ଖସି ଆଫଗାନିସ୍ତାନରୁ ପାକିସ୍ତାନ ପହଞ୍ଚିଲେ ୩୨ ମହିଳା ଫୁଟବଲ୍ ଖେଳାଳି
ନୂଆଦିଲ୍ଲୀ : ଆଫଗାନିସ୍ତାନରେ ତାଲିବାନ ଶାସନ ଆରମ୍ଭ ହେବା ପରେ ମହିଳାଙ୍କ ଜୀବନ ନର୍କ ପରି ହେବାରେ ଲାଗିଛି । ସବୁଥିରେ ମହିଳାଙ୍କ ପାଇଁ କଟକଣା ଜାରି କରାଯାଉଛି । ସେ ଖେଳ ହେଉ କି ରାଜନୀତି, ମହିଳାଙ୍କ ପାଇଁ ପ୍ରତିଟି କ୍ଷେତ୍ରରେ ମାର୍ଗ ବନ୍ଦ କରି ଦିଆଯାଉଛି । ଏହା ମଧ୍ୟରେ ଆଫଗାନିସ୍ତାନର ୩୨ ମହିଳା ଫୁଟବଲ୍ ଖେଳାଳି ଦେଶରୁ ଖସି ପାକିସ୍ତାନ ପହଞ୍ଚି ଯାଇଛନ୍ତି । ଏହି ଖେଳାଳିଙ୍କୁ ତାଲିବାନଠୁ ଧମକ ମିଳୁଥିଲା ।
ଖବର ଅନୁଯାୟୀ, ଜରୁରୀକାଳୀନ ଭିସା ମିଳିବା ପରେ ଏହି ଖେଳାଳି ନିଜର ପୂରା ପରିବାର ସହ ପାକିସ୍ତାନ ପହଞ୍ଚିଛନ୍ତି । ସମସ୍ତେ ଜାତୀୟ ଜୁନିୟର ମହିଳା ଦଳର ଖେଳାଳି । ସମସ୍ତ ଖେଳାଳିଙ୍କୁ କାତାର ଯିବାର ଥିଲା, ଯେଉଁଠି ୨୦୨୦ରେ ଫିଫା ବିଶ୍ୱ କପ୍ ଆୟୋଜନ ହେବାକୁ ଯାଉଛି । କିନ୍ତୁ ଅଗଷ୍ଟ ୨୬ରେ କାବୁଲ ବିମାନ ବନ୍ଦରରେ ଘଟିଥିବା ବୋମା ବିସ୍ଫୋରଣ ପରେ ସମସ୍ତ ଖେଳାଳି ଆଫଗାନିସ୍ତାନରେ ଫସି ଯାଇଥିଲେ ।
ଡନ ନ୍ୟୁଜ୍ ଅନୁଯାୟୀ, ଏହି ମହିଳା ଖେଳାଳିଙ୍କୁ କ୍ରୀଡାରେ ଜଡିତ ହେବା କାରଣରୁ ତାଲିବାନଠୁ ଲଗାତାର ଧମକ ମିଳୁଥିଲା । ହେଲେ ଏମାନେ ତାଲିବାନ ଧମକକୁ ନଡରି ସାହାସର ସହ ପାକିସ୍ତାନ ଆସି ପହଞ୍ଚିଛନ୍ତି । ଉଲ୍ଲେଖନୀୟ ଅଗଷ୍ଟ ୧୫ରେ ତାଲିବାନ ଆଫଗାନିସ୍ତାନକୁ ସଂପୂର୍ଣ୍ଣ ଅକ୍ତିକାର କରିଥିଲା । ତେବେଠୁ ସମସ୍ତ ଖେଳାଳି ତାଲିବାନ ନଜରରୁ ବଞ୍ଚିବା ପାଇଁ ଛପି ରହିଥିଲେ ।
ଏବେ ଏହି ୩୨ ଖେଳାଳିଙ୍କୁ ପାକିସ୍ତାନ ନେଇଯିବାର ପ୍ରୟାସ ବ୍ରିଟେନର ଏକ ଏନଜିଓ ସଂସ୍ଥା କରିଛନ୍ତି । ଫିଫା ଅଧ୍ୟକ୍ଷ ଗିୟାନି ଇନଫାତିନୋ ଗତ ସପ୍ତାହରେ ଦୋହା ଗସ୍ତରେ ଆଫଗାନ ଶରଣାର୍ଥୀଙ୍କୁ ଭେଟିଥିଲେ । ଆଫଗାନିସ୍ତାନରେ ଫସିଥିବା ମହିଳା ଖେଳାଳିଙ୍କ ସୁରକ୍ଷା ଉପରେ ଧ୍ୟାନ ନଦେବା କାରଣରୁ ଫିଫାକୁ ବହୁତ ସମାଲୋଚନାର ଶିକାର ହେବାକୁ ପଡିଥିଲା । ଏବେ ସମସ୍ତ ଖେଳାଳିଙ୍କୁ ପେଶାୱରରୁ ଲାହୋର ନିଆଯାଇଛି । ଏଠାରେ ସେମାନଙ୍କୁ ପିଏଫଏଫ ମୁଖ୍ୟାଳୟରେ ରଖାଯିବ ।
