ଦେଶରେ ବିଦ୍ୟୁତ୍ ବ୍ୟବହାର ବଢିଲା ୧୦ ପ୍ରତିଶତ, ହେଲା ୧୩୭୫ ବିଲିୟନ ୟୁନିଟ
ନୂଆଦିଲ୍ଲୀ: ଚଳିତ ଆର୍ଥିକ ବର୍ଷରେ ଏପ୍ରିଲ-ଫେବୃଆରୀ ମଧ୍ୟରେ ଭାରତରେ ବିଦ୍ୟୁତ୍ ବ୍ୟବହାର ୧୦ ପ୍ରତିଶତ ବୃଦ୍ଧି ହୋଇ ୧୩୭୫.୫୭ ବିଲିୟନ ୟୁନିଟ୍ (BU) ରେ ପହଞ୍ଚିଛି। ୨୦୨୧-୨୨ ଆର୍ଥିକ ବର୍ଷରେ ମୋଟ ବିଦ୍ୟୁତ୍ ଯୋଗାଣଠାରୁ ଏହି ସଂଖ୍ୟା ଅଧିକ। ସରକାରୀ ତଥ୍ୟ ଅନୁଯାୟୀ, ଏପ୍ରିଲ୍-ଫେବୃଆରୀ ୨୦୨୧-୨୨ ରେ ବିଦ୍ୟୁତ୍ ବ୍ୟବହାର ୧୨୪୫.୫୪ BU ଥିଲା।
ସେହିଭଳି, ୨୦୨୧-୨୨ ସମଗ୍ର ଆର୍ଥିକ ବର୍ଷରେ ବିଦ୍ୟୁତ୍ ବ୍ୟବହାର ୧୩୭୪.୦୨ BU ଥିଲା। ବିଶେଷ କରି ଗ୍ରୀଷ୍ମ ଋତୁରେ ବିଦ୍ୟୁତର ଅଧିକ ଚାହିଦାକୁ ଦୃଷ୍ଟିରେ ରଖି ଆସନ୍ତା ମାସରେ ଭାରତରେ ବିଦ୍ୟୁତ୍ ବ୍ୟବହାର ଦୁଇ ଅଙ୍କରେ ବୃଦ୍ଧି ପାଇବ ବୋଲି ବିଶେଷଜ୍ଞମାନେ କହିଛନ୍ତି। ଶକ୍ତି ମନ୍ତ୍ରଣାଳୟ ଆକଳନ କରିଛି ଯେ, ଚଳିତ ବର୍ଷ ଏପ୍ରିଲରେ ଦେଶରେ ୨୨୯ ଗିଗାୱାଟର ସର୍ବୋଚ୍ଚ ଚାହିଦା ରହିଛି, ଯାହାକି ଏକ ବର୍ଷ ପୂର୍ବେ ସମାନ ମାସରେ ରେକର୍ଡ ହୋଇଥିବା ୨୧୫.୮୮ ଗିଗାୱାଟ (GW) ଠାରୁ ଅଧିକ ଅଟେ।
ଉଚ୍ଚ ବିଦ୍ୟୁତ୍ ଚାହିଦା ପୂରଣ ପାଇଁ ମନ୍ତ୍ରଣାଳୟ ଅନେକ ପଦକ୍ଷେପ ନେଇଛି ଏବଂ ବିଦ୍ୟୁତ୍ କାଟ କିମ୍ବା ଲୋଡ୍ ସେଡିଙ୍ଗରୁ ଦୂରେଇ ରହିବାକୁ ରାଜ୍ୟ ୟୁନିଟ୍ ମାନଙ୍କୁ କହିଛି। ଏହା ସହିତ ମନ୍ତ୍ରଣାଳୟ ସମସ୍ତ ଆମଦାନୀ ହୋଇଥିବା କୋଇଲା ଭିତ୍ତିକ ବିଦ୍ୟୁତ୍ ଉତ୍ପାଦନ କେନ୍ଦ୍ରଗୁଡ଼ିକୁ ମାର୍ଚ୍ଚ ୧୬, ୨୦୨୩ ରୁ ଜୁନ୍ ୧୫, ୨୦୨୩ ପର୍ଯ୍ୟନ୍ତ ସମ୍ପୂର୍ଣ୍ଣ କ୍ଷମତାରେ ଚାଲିବାକୁ କହିଛି।
