ସିଜ୍ଫାୟାର କିପରି ବଦଳାଇଦେଲା ଅମ୍ବାନୀ- ଆଦାନୀଙ୍କ ଭାଗ୍ୟ, ଜାଣନ୍ତୁ ୫ ଦିନରେ କେତେ ଅର୍ଜନ କଲେ ସମ୍ପତ୍ତି ?
ନୂଆଦିଲ୍ଲୀ: ଭାରତ ଓ ପାକିସ୍ତାନ ମଧ୍ୟରେ ସିଜ୍ଫାୟାର (ଯୁଦ୍ଧବିରତି) ଘୋଷଣା ପରେ ଭାରତୀୟ ଶେୟାର ବଜାରରେ ଦେଖାଦେଇଥିବା ତୀବ୍ର ଉଛାଳ ଦେଶର ଦୁଇ ପ୍ରମୁଖ ଶିଳ୍ପପତି ମୁକେଶ ଅମ୍ବାନୀ ଏବଂ ଗୌତମ ଆଦାନୀଙ୍କ ସମ୍ପତ୍ତିରେ ବୃହତ୍ ବୃଦ୍ଧି ଆଣିଛି। ବ୍ଲୁମବର୍ଗ ବିଲିୟନେୟାର୍ସ ଇଣ୍ଡେକ୍ସର ତଥ୍ୟ ଅନୁସାରେ, ଏସିଆର ସବୁଠାରୁ ଧନୀ ବ୍ୟବସାୟୀ ମୁକେଶ ଅମ୍ବାନୀଙ୍କ ନେଟ୍ୱର୍ଥ ୫ ଦିନରେ ୬ ବିଲିୟନ ଡଲାର (ପ୍ରାୟ ୫୦,୪୦୦ କୋଟି ଟଙ୍କା) ବୃଦ୍ଧି ପାଇଛି।
ଅନ୍ୟପକ୍ଷରେ, ଏସିଆର ଦ୍ୱିତୀୟ ଧନୀ ବ୍ୟବସାୟୀ ଗୌତମ ଆଦାନୀଙ୍କ ନେଟ୍ୱର୍ଥ ୯.୨ ବିଲିୟନ ଡଲାର (ପ୍ରାୟ ୭୭,୨୮୦ କୋଟି ଟଙ୍କା) ବୃଦ୍ଧି ପାଇଛି। ଏହି ଅଭୂତପୂର୍ବ ବୃଦ୍ଧି ସିଜ୍ଫାୟାର ପରେ ଶେୟାର ବଜାରରେ ଆସିଥିବା ସ୍ଥିରତା ଓ ନିବେଶକଙ୍କ ବିଶ୍ୱାସ ଫେରିବାର ସୂଚନା ଦେଉଛି।
ଅମ୍ବାନୀ-ଆଦାନୀଙ୍କ ନେଟ୍ୱର୍ଥ ବର୍ତ୍ତମାନ କେତେ?
ମୁକେଶ ଅମ୍ବାନୀ: ବ୍ଲୁମବର୍ଗ ଇଣ୍ଡେକ୍ସ ଅନୁସାରେ, ମୁକେଶ ଅମ୍ବାନୀଙ୍କ ନେଟ୍ୱର୍ଥ ବର୍ତ୍ତମାନ ୧୦୩ ବିଲିୟନ ଡଲାର (ପ୍ରାୟ ୮.୬୫ ଲକ୍ଷ କୋଟି ଟଙ୍କା)ରେ ପହଞ୍ଚିଛି। ଏହା ସହ ସେ ବିଶ୍ୱର ଧନୀମାନଙ୍କ ତାଲିକାରେ ୧୭ତମ ସ୍ଥାନରେ ରହିଛନ୍ତି। ରିଲାୟାନ୍ସ ଇଣ୍ଡଷ୍ଟ୍ରିଜ୍ର ଶେୟାରରେ ଦେଖାଦେଇଥିବା ତୀବ୍ର ଉଛାଳ, ବିଶେଷତଃ ଟେଲିକମ୍ ଓ ଏନର୍ଜି ସେକ୍ଟରରେ ନିବେଶକଙ୍କ ଆଗ୍ରହ ଏହାର ମୁଖ୍ୟ କାରଣ।
ଗୌତମ ଆଦାନୀ: ଗୌତମ ଆଦାନୀଙ୍କ ନେଟ୍ୱର୍ଥ ୭୯.୮ ବିଲିୟନ ଡଲାର (ପ୍ରାୟ ୬.୭୧ ଲକ୍ଷ କୋଟି ଟଙ୍କା)ରେ ପହଞ୍ଚିଛି। ଏହା ସହ ସେ ବିଶ୍ୱର ଶୀର୍ଷ ୨୦ ଧନୀମାନଙ୍କ ତାଲିକାରେ ପୁଣି ପ୍ରବେଶ କରିଛନ୍ତି। ଆଦାନୀ ଗ୍ରୁପର ଶେୟାର, ବିଶେଷତଃ ଅଡ଼ାଣୀ ଏଣ୍ଟରପ୍ରାଇଜେସ୍ ଓ ଆଦାନୀ ପୋର୍ଟସ୍ରେ ଦେଖାଦେଇଥିବା ରେକର୍ଡ ବୃଦ୍ଧି ଏହାର ପଛରେ ରହିଛି।
ସିଜ୍ଫାୟାରର ପ୍ରଭାବ
ମେ’ ୧୨ରେ ଭାରତ-ପାକିସ୍ତାନ ମଧ୍ୟରେ ସିଜ୍ଫାୟାର ଘୋଷଣା ହେବା ପରେ ଭାରତୀୟ ଶେୟାର ବଜାରରେ ଏକ ବୃହତ୍ ରାଲି ଦେଖାଯାଇଥିଲା। ସୋମବାର (ମେ’ ୧୩) ବିଏସ୍ଇ ସେନସେକ୍ସ ୨୯୭୫ ପଏଣ୍ଟ ବୃଦ୍ଧି ପାଇ ୭୮,୦୧୭ରେ ବନ୍ଦ ହୋଇଥିଲା, ଯେତେବେଳେ ଏନଏସଇ ନିଫ୍ଟି ୯୧୬ ପଏଣ୍ଟ ବୃଦ୍ଧି ପାଇ ୨୩,୪୫୦ରେ ପହଞ୍ଚିଥିଲା। ଏହି ଉଛାଳରେ ରିଲାୟାନ୍ସ ଇଣ୍ଡଷ୍ଟ୍ରିଜ୍ ଓ ଆଦାନୀ ଗ୍ରୁପର କମ୍ପାନୀଗୁଡ଼ିକର ଶେୟାର ମୁଖ୍ୟ ଭୂମିକା ଗ୍ରହଣ କରିଥିଲା। ସିଜ୍ଫାୟାର ଯୋଗୁଁ ଭୌଗୋଳିକ-ରାଜନୈତିକ ଅନିଶ୍ଚିତତା ହ୍ରାସ ପାଇଥିଲା, ଯାହା ନିବେଶକଙ୍କ ମନୋବଳକୁ ବୃଦ୍ଧି କରିଥିଲା।