Same Sex Marriage:ଏଠି ସମଲିଙ୍ଗୀ ବିବାହରେ ନାହିଁ ପ୍ରତିବନ୍ଧକ, ମିଳୁଛି ସମସ୍ତ ଆଇନଗତ ମାନ୍ୟତା
ନୂଆଦିଲ୍ଲୀ: ସମଲିଙ୍ଗୀ ବିବାହର ସ୍ୱୀକୃତି ପାଇବା ପାଇଁ ସୁପ୍ରିମକୋର୍ଟ ନିଜେ ଏକ ଆବେଦନପତ୍ର ହସ୍ତାନ୍ତର କରିଥିଲେ। ଏହି ସମସ୍ତ ଆବେଦନ ଦିଲ୍ଲୀ ଏବଂ କେରଳ ହାଇକୋର୍ଟରେ ବିଚାରାଧୀନ ଥିଲା। ଗତ ଦଶନ୍ଧି ମଧ୍ୟରେ ଭାରତରେ ସମାନ ଲିଙ୍ଗ ବିବାହକୁ ନେଇ ମିଶ୍ରିତ ପ୍ରତିକ୍ରିୟା ପ୍ରକାଶ ପାଇଛି। ତେବେ ଆଜି ଏହାକୁ ନେଇ ସୁପ୍ରିମ କୋର୍ଟ ତାର ରାୟ ପ୍ରଦାନ କରିବ। କିନ୍ତୁ ବିଶ୍ୱରେ ଏଭଳି କିଛି ଦେଶ ରହିଛି ଯେଉଁଠାରେ ଏହାକୁ ସାଧାରଣ ବୋଲି ଗ୍ରହଣ କରାଯାଇଛି । ଏହାସହିତ କୋର୍ଟଙ୍କ ନିର୍ଦ୍ଦେଶ ପରେ ୧୦ ଟି ଦେଶରେ ଏହା ସମ୍ଭବ ହୋଇପାରିଛି ।
ସୂଚନାମୁତାବକ ଆମେରିକାରେ, ୨୦୦୪ ପର୍ଯ୍ୟନ୍ତ, କେବଳ ଗୋଟିଏ ରାଜ୍ୟରେ ସମଲିଙ୍ଗୀ ବିବାହ ବୈଧ ଥିଲା, କିନ୍ତୁ ୨୦୧୫ ସୁଦ୍ଧା ସମସ୍ତ ୫୦ ଟି ରାଜ୍ୟରେ ଆଇନଗତ ବୈଧତା ଦେଖିବାକୁ ମିଳିଛି। ସମଲିଙ୍ଗୀ ବିବାହ ପାଇଁ ବିଭିନ୍ନ ରାଜ୍ୟରେ ଭିନ୍ନ ନିୟମ ରହିଛି। ବର୍ତ୍ତମାନ କେନ୍ଦ୍ର ସରକାର ଏବଂ ସମସ୍ତ ରାଜ୍ୟ ପାଇଁ ଏଭଳି ବିବାହକୁ ସ୍ୱୀକୃତି ଦେବା ଆବଶ୍ୟକ। ଏହା ପରେ ଅଷ୍ଟ୍ରେଲିଆ, ଆୟର୍ଲାଣ୍ଡ, ସ୍ୱିଜରଲ୍ୟାଣ୍ଡରେ ମଧ୍ୟ ଏହିପରି ବିବାହ ମାନ୍ୟତା ପାଇଲା ।
ଅଷ୍ଟ୍ରେଲିଆ:ଅଷ୍ଟ୍ରେଲିଆରେ ୨୦୧୭ ରେ ହୋଇଥିବା ଉପନିର୍ବାଚନ ପରେ ସଂସଦ ସମଲିଙ୍ଗୀ ବିବାହକୁ ସ୍ୱୀକୃତି ଦେଇ ଏକ ଆଇନ ପ୍ରଣୟନ କଲା। ଏଥି ସହିତ, ଆୟର୍ଲାଣ୍ଡ ଏବଂ ସ୍ୱିଜରଲ୍ୟାଣ୍ଡ ମଧ୍ୟ ଭୋଟ୍ ମାଧ୍ୟମରେ LGBTQ ବିବାହକୁ ଆନୁଷ୍ଠାନିକ ସ୍ୱୀକୃତି ପ୍ରଦାନ କଲେ ।
ଆଫ୍ରିକା ମାଳଦ୍ୱୀପରେ ଦକ୍ଷିଣ ଆଫ୍ରିକା ପ୍ରଥମ ଆଫ୍ରିକୀୟ ଦେଶ ଥିଲା ଯାହା ୨୦୦୬ ରେ ସମଲିଙ୍ଗୀ ବିବାହକୁ ଆଇନଗତ କରିଥିଲା। ୨୦୧୯ ମସିହାରେ, ତାଇୱାନ ପ୍ରଥମ ଏସୀୟ ଦେଶ ଭାବରେ ସମାନ ଲିଙ୍ଗ ବିବାହକୁ ସ୍ୱୀକୃତି ଦେଇଥିଲା।
ସେହିଭଳି ୨୦୧୦ ରେ, ଆର୍ଜେଣ୍ଟିନା ପ୍ରଥମ ଲାଟିନ୍ ଆମେରିକୀୟ ଦେଶ ଯିଏ ସମଲିଙ୍ଗୀ ବିବାହକୁ ଆଇନଗତ କରିବାରେ ବିଶ୍ୱର ଦଶମ ଦେଶ ହେଲା। ସମାନ ଲିଙ୍ଗ ବିବାହ କାନାଡାରେମଧ୍ୟ ଆଇନଗତ ଯାହା ୨୦୦୫ ରେ କାନାଡା ସଂସଦ ଦ୍ୱାରା ଆନୁଷ୍ଠାନିକ ଭାବରେ ସ୍ୱୀକୃତିପ୍ରାପ୍ତ ହେଇଥିଲା ।
ବ୍ରିଟେନ: ଯୁକ୍ତରାଜ୍ୟ (ୟୁକେ) ର ସମସ୍ତ ଅଞ୍ଚଳରେ ସମାନ ଲିଙ୍ଗ ବିବାହ ଆଇନଗତ ଅଟେ । ୨୦୧୪ ରେ ଇଂଲଣ୍ଡ, ସ୍କଟଲ୍ୟାଣ୍ଡ ଏବଂ ୱେଲ୍ସରେ ସମାନ ଲିଙ୍ଗ ବିବାହ ଆଇନଗତ ହୋଇଥିଲା। ଏହା ବ୍ୟତୀତ, ୧୪ ଟି ବ୍ରିଟିଶ ଓଭରସିଜ୍ ଟେରିଟୋରୀ ମଧ୍ୟରୁ ୯ ଟିରେ ସମଲିଙ୍ଗୀ ବିବାହ ବୈଧ ଅଟେ ।
ଫ୍ରାନ୍ସ: ୟୁରୋପର ଏହି ଦେଶରେ ୨୦୧୩ ଠାରୁ ସମାନ ଲିଙ୍ଗ ବିବାହ ଆଇନଗତ ଅଟେ। ୧୯୯୯ ମସିହାରୁ ଫ୍ରାନ୍ସରେ ଏକ ସିଭିଲ୍ ୟୁନିଅନ୍ ସ୍କିମ୍ ଅଛି ଯେଉଁଥିରେ ଏକ ସମଲିଙ୍ଗୀ ଦମ୍ପତି ଏକ ସମ୍ପର୍କ ସ୍ଥାପନ କରିପାରିବେ। ଆଇନ ପ୍ରଣୟନ ହେବା ପରେ ସମଲିଙ୍ଗୀ ଦମ୍ପତିମାନେ ମଧ୍ୟ ବିବାହ ଏବଂ ସନ୍ତାନ ଗ୍ରହଣ କରିବାର ଅଧିକାର ପାଇଲେ।
ଜର୍ମାନୀ: ସମାନ ଲିଙ୍ଗ ବିବାହ ଅକ୍ଟୋବର ୨୦୧୭ ରେ ଆଇନଗତ ହୋଇଥିଲା । ଦେଶର ନୂତନ ନିୟମ ସମଲିଙ୍ଗୀ ଦମ୍ପତିଙ୍କୁ ଏକ ସନ୍ତାନ ଗ୍ରହଣ କରିବା ସହିତ ସମସ୍ତ ବୈବାହିକ ଅଧିକାର ପ୍ରଦାନ କରିଥାଏ।
ଏହି ତାଲିକାରେ ଫିନଲ୍ୟାଣ୍ଡ, ସ୍ୱିଡେନ, ଆଇସଲ୍ୟାଣ୍ଡ, ଡେନମାର୍କ, ବେଲଜିୟମ, ଚିଲି, ମେକ୍ସିକୋ, ନ୍ୟୁଜିଲ୍ୟାଣ୍ଡ, ନରୱେ, ସ୍ପେନର ନାମ ମଧ୍ୟ ଅନ୍ତର୍ଭୁକ୍ତ। କେବଳ ଦେଖିବା ବାକି ରହିଲା ଆଜିର ନିଷ୍ପତି ପରେ ଏହି ତାଲିକାରେ ଭାରତ ନାମ ଯୋଡି ହେଉଛି କି ନାହିଁ ।
