ବଦଳିଯିବ ରାସନ ଦୋକାନର ପୂରା ସିଷ୍ଟମ! ଫାଇଦାରେ ରହିବେ ହୀତାଧିକାରୀ
ନୂଆଦିଲ୍ଲୀ: ରାସନ କାର୍ଡ ହିତାଧିକାରୀଙ୍କ ପାଇଁ ଆସିଛି ବଡ଼ ଖବର । ରାସନ ଦୋକାନଗୁଡ଼ିକର ବ୍ୟବସ୍ଥାକୁ ସଂପୂର୍ଣ୍ଣ ରୂପେ ବଦଳାଇବାକୁ ବିଚାର କରୁଛନ୍ତି ସରକାର । ଏବେ ରାସନ ଦୋକାନ ଉପରେ ନଜର ରଖିବା ପାଇଁ ସିସିଟିଭି ଲଗାଇବା ନେଇ ପ୍ରସ୍ତୁତି ଚାଲିଛି । ଏହା ବ୍ୟତୀତ ହେଲ୍ପଲାଇନ ନମ୍ବରର ସିଷ୍ଟମ ମଧ୍ୟ ପୂର୍ବ ଅପେକ୍ଷା ଭଲ ହେବ ବୋଲି ଆଶା କରାଯାଉଛି । ସଂସଦର ଏକ କମିଟି ଏହାକୁ ସୁପାରିଶ କରିଛି ।
ତେବେ ସଂସଦର ଏକ ସ୍ଥାୟୀ ସମିତି ସାର୍ବଜନୀନ ବିତରଣ ପ୍ରଣାଳୀ(ପିଡିଏସ)ର ହିତାଧିକାରୀଙ୍କ ଅଭିଯୋଗର ସମାଧାନ କରିବାକୁ ‘ହେଲ୍ପଲାଇନ୍ ନମ୍ବର’ ସିଷ୍ଟମରେ ଉନ୍ନତି ଆଣିବା ଓ ରାସନ ଦୋକାନରୁ ସାମଗ୍ରୀର କଳାବଜାରୀ ଉପରେ ନଜର ରଖିବାକୁ ସିସିଟିଭି କ୍ୟାମେରା ଲଗାଇବାକୁ ସୁପାରିଶ କରିଛି । ଖାଦ୍ୟ ଏବଂ ଉପଭୋକ୍ତା ବ୍ୟାପାର ଏବଂ ସାଧାରଣ ବଣ୍ଟନ ଉପରେ ସଂସଦୀୟ ଷ୍ଟାଣ୍ଡିଂ କମିଟି ମଧ୍ୟ ସୁପାରିଶ କରିଛି ଯେ, ଦୋକାନଗୁଡିକ ଉପରେ ନଜର ରଖିବା ପାଇଁ ସରକାର ନିରପେକ୍ଷ ଯାଞ୍ଚ ପାଇଁ ବ୍ୟବସ୍ଥା କରିବା ଉଚିତ୍ ।
ଏହା ସହ କମିଟି କହିଛି ଯେ, ବିଭିନ୍ନ ରାଜ୍ୟରେ ୧୯୬୭ ଏବଂ ୧୮୦୦ ଟେଲିଫୋନ୍ ନମ୍ବର ମାଧ୍ୟମରେ ୨୪ ଘଣ୍ଟିଆ ଅଭିଯୋଗ ସମାଧାନର ବ୍ୟବସ୍ଥା ରହିଛି । କିନ୍ତୁ ଏହା ହିତାଧିକାରୀଙ୍କ ଦୈନନ୍ଦିନ ସମସ୍ୟାର ସମାଧାନ କରିବାରେ ସହାୟକ ହେଉନି । ରିପୋର୍ଟ ଅନୁଯାୟୀ, ‘ ସମସ୍ତେ ଜାଣନ୍ତି ଯେ ଏହି ଟୋଲ୍ ଫ୍ରି ନମ୍ବର ହିତାଧିକାରୀଙ୍କ ଆବଶ୍ୟକତା ଅନୁଯାୟୀ କାମ କରୁନାହିଁ ଏବଂ ଅଧିକାଂଶ ସମୟରେ ସମ୍ପୃକ୍ତ ଅଧିକାରୀମାନେ କଲ୍ ଉଠାଉ ନାହାନ୍ତି ।’
